Dụk N̄kpri ye Ikpọ Mbono ke Ebiet Emi Esop Jehovah Emekde
1 Kpukpru ini ikọt Jehovah ẹsibere ye mme ndutịm oro enye anamde aban̄a mme itie utuakibuot. Ke idak Obio Ubọn̄ Israel oro akadianade kiet, ẹma ẹwụk nditọ Israel ẹte ẹka Jerusalem, “obio oro Jehovah ekemekde ke otu kpukpru esien Israel, ndisịn enyịn̄ esie do,” ke se iwakde ibe ini kiet ke isua.—1 Ndi. 14:21; Ex. 34:23, 24.
2 Oyom Spirit N̄waidem: Ediwak nditọ Israel ẹma ẹdụn̄ ẹyom usụn̄ ẹkpọn̄ Jerusalem ẹkenyụn̄ ẹnyene ndisan̄a ediwak usen n̄kesịm Jerusalem. Edi mbon oro ẹkenyenede udọn̄ ke n̄kpọ eke spirit ke otu mmọ ẹma ẹwụt esịtekọm ẹnọ ikpọ mboho emi ẹnyụn̄ ẹnam mme n̄waidem oro okoyomde man ẹdụk. Mmọ ẹma ẹwụt esịtekọm ẹnọ ndutịm Jehovah, ẹfiọkde ẹte ke ekedi kaban̄a nsinsi ufọn mmimọ.—Luke 2:41.
3 Edi akpanikọ, ndisan̄a anyan usụn̄ man ẹkedụk ikpọ mboho ekeme ndibuana n̄waidem. Kpa ye n̄waidem oro ekemede ndibuana, idatesịt ye mme ufọn eke spirit oro ibọde ito n̄kpri ye ikpọ mbono nnyịn inyeneke udomo. (2 Chron. 30:26; Neh. 8:17) Ke ediwak isua ke edem, nditọete nnyịn ẹma ẹnam ekese n̄waidem man ẹdụk n̄kpri ye ikpọ mbono oro ẹkesimende ke ebiet kiet ẹka ebiet efen—ndusụk ẹnen̄erede ẹyom usụn̄ ẹkpọn̄ ufọk. (yb86-E 198-199) Mme uwụtn̄kpọ eyomfịn ẹdu ẹban̄ade mme owo oro ẹsan̄ade anyan usụn̄ man ẹkedụk. Ndjaukua Ulimba, eren emi edide isua 73 ke emana esiwak ndisan̄a kilomita 450 ke usen 16 man ekesịm ufọkmbono odude ke n̄kan̄ mmọ!—Se w98-EF 8/1 p. 32; km 9/98 p. 3 ikp. eki. 3-4.
4 Nte afo emeben̄e idem ndisobo nsọn̄ọn̄kpọ, idomo, ye mme n̄kpọ-ata oro ẹkemede ndidemede ke ukperedem ini emi man otodo ekeme ndidia udia ye ikọt Jehovah? Nte apostle Paul etide nnyịn ke Utom 14:22: “Nnyịn inyene ndibe ke ediwak ukụt ndụk ke Obio Ubọn̄ Abasi.” Ke ntre, kûkop mmemidem ke ntak oro okụk ukpeusụn̄ ọdọkde, m̀mê idem ke ntak usụn̄ ọdiọkde ndien ke ntre esịnde ikot ndisop idem man ọbọ item otode Abasi. Ndisịn ukeme oro oyomde nnyụn̄ nnyene ọkpọsọn̄ udọn̄ ndidu ke kpukpru ikpọ mboho oro Jehovah etịmde ebe ke esop esie eyenen̄ede ada mme edidiọn̄ eke spirit edi, ‘koro usen kiet ke okụre Jehovah ọmọfọn akan tọsịn’ ke ebiet en̄wen.—Ps. 84:10.
5 Kûnyene Edu Nda-ke-Idem: Ediwak mme asuanetop ẹsikụt edikpu ke ini N̄ka ke ndusụk ntak mînyịmeke ye udọn̄ mmọ kaban̄a Ufọk Mbono oro mîdịghe enye oro ẹdade ẹnam n̄kpọ idahaemi. Ke mfụhọ, ndusụk owo ẹma ẹfan̄a ẹban̄a ebiet oro ẹnọde mmọ, ẹma ẹnyụn̄ ẹsịn ndidụk ndutịm n̄kpri ye ikpọ mbono ke ini mmọ ẹkenyenede ukeme ndinam oro, m̀mê ẹkam ẹmen̄e ndidụk ke ntak idiọk enyọn̄ ye idiọk usụn̄. Emi ifọnke. Ndinam mbon efen ẹfụmi ndutịm ukara Abasi ke mme n̄kpọ ntem ifọnke, onyụn̄ owụt edu nda-ke-idem. (1 Cor. 4:2) Ke adan̄aemi esop odomode ndinam edi mfefere ọnọ nditọete ini ekededi ẹkemede, mme ini ẹdu oro ekemede ndiyom nnyịn inam n̄kpọ ke ufọn mbon efen ye ke ufọn esop. Edieke nnyịn inamde se inemde Jehovah esịt mînyụn̄ iyomke ufọn idem nnyịn kpukpru ini, idịghe mbon efen ikpọn̄ ẹdibọ ufọn, edi ke utịt nnyịn iyọbọ edidiọn̄ Jehovah.—Rome 15:1, 2; 1 Cor. 10:31-33; 1 Thess. 2:4.
6 Domo Fiọk Se Itịmde Ifọn Ikan: Ke akpanikọ, akpana kpukpru nnyịn, nte mme anam-akpanikọ nditọ Israel, inyene udọn̄ ke udia eke spirit ikan ebiet oro Ufọk Mbono odude. Okposụkedi edinịm mme mbono circuit ye usen akpan mbono ke n̄kann̄kụk owo ekemede ndidi mfefere mfefere nnọ kpukpru owo, oro isidịghe mmemmem kpukpru ini m̀mê ndimem urua. Mme mfịna okụk ye utom oro ẹbuanade ke kpukpru circuit ndidomo ndinyene ufọkmbono mmọ ẹkeme ndikpon n̄kan idaha unana edikop inem idahaemi. Kere ban̄a nsọn̄urua ubọpn̄kpọ, edinịm ke eti idaha, ye ufọk ndisọp mbiara sia owo mîdaha inam n̄kpọ kpukpru ini. Ke akpanikọ, enye ekeme ndikam n̄wọn̄ọde ntịn̄enyịn owo n̄kpọn̄ se idide akpan n̄kpọ ikan, edieke ẹtọn̄ọde ndibọp n̄kpọ ke ini owo mînen̄ekede iyom.
7 Ubiere nnyịn ekpedi ndiwụt edu andiwet psalm nte ẹwụtde ke Psalm 122:1: “Mmọ eke ẹdọhọde mi, ẹte, ‘Nnyịn iyaka ke ufọk Jehovah,’ ẹdat mi esịt.” Nọ ndutịm Jehovah ibetedem ke ofụri esịt ebe ke ndidụk n̄kpri ye ikpọ mbono ke ebiet emi ẹmekde. (Heb. 10:24, 25) N̄waidem ekededi oro nnyịn inamde man otodo ibọ ukpep eke spirit edidi ke nsinsi ufọn nnyịn.