Da Mme N̄kpọntịbe Ndondo Emi Demede Udọn̄
1 Nte akpama ndika iso nnyene ediwak nti ekikere oro ẹdinamde utom ukwọrọikọ fo etie obufa obufa onyụn̄ edemede udọn̄ mme owo ke etop Bible? Do da se itịbede ke ererimbot ye ke n̄kann̄kụk fo tọn̄ọ nneme. Afo emekeme ndida mme n̄kpọntịbe ndondo emi ke n̄kann̄kụk ye ke idụt m̀mê mbụk n̄kpọntịbe ofụri ererimbot. Mme n̄kpọntịbe emi ke ẹkpụhọde ke ubọk ke ubọk. (1 Cor. 7:32) Kere ban̄a mme uwụtn̄kpọ ẹtienede mi.
2 Mme mfịna ndutịm uforo ye ekọmurua n̄kpọ udu uwem ẹnen̄ede ẹbehe mme owo. Ntem, afo emekeme ndidọhọ ete:
◼ “Nte ama okop ke mbụk n̄kpọntịbe nte ke urua [siak mme n̄kpọ oro] afiak ọdọk?” Mîdịghe afo emekeme nditịn̄ mban̄a unana utom edieke akwa usiakifia osion̄ode ediwak mme anamutom ke utom. Etienede nte afo oyomde ndika iso ke nneme oro, emekeme nditọn̄ọ ke ndibụp ekededi ke otu mbụme iba emi: “Nte akanam afo emekere ntak emi ọsọn̄de ntem ndinyene mme n̄kpọ udu uwem?” mîdịghe “Nte afo emekere ke nsọn̄ọn̄kpọ oyodu kpukpru ini?”
3 Mbụk afai, utọ nte nnama ke mme ubon m̀mê ke otu nditọ ufọkn̄wed, ọnọ isọn̄ nneme efen. Emekeme ndibụp ete:
◼ “Nte ama okot ke n̄wedmbụk n̄kpọntịbe nte ke [siak nnama ke n̄kann̄kụk]?” Ekem bụp “Afo ekere ke nso idi ntak emi afai odude ntem ke ererimbot?” mîdịghe “Nte afo emekere ke ini oyodu oro nnyịn ikemede ndidu ke ifụre?”
4 Mbụk aban̄ade akama-nsobo ukwọ, unyekisọn̄, m̀mê ndutịme mbio obio ke nsio nsio itie ke ererimbot ọnọ n̄ko ibuot nneme oro edemerede udọn̄. Ke uwụtn̄kpọ, afo emekeme ndibụp ete:
◼ “Nte Abasi edi ntak [siak oto-obot afanikọn̄]?” Mîdịghe afo emekeme nditịn̄ mban̄a ndutịme mbio obio eke ndondo emi onyụn̄ ọdọhọ ete: “Edieke kpukpru owo ẹyomde emem, ntak emi ọsọn̄de ndinyene enye?”
5 Du ke edidemede kaban̄a mme n̄kpọntịbe ndondo emi oro afo ekemede ndikama ke ntọn̄ọikọ fo. Nti ekikere ẹdu ke ekpri n̄wed Nte Ẹkpetọn̄ọde Ẹnyụn̄ Ẹkade Iso ke Nneme Bible, page 4, ke idak “Mme N̄kpọntịbe Ndondo Emi.” Nte ededi, fep ndinyene n̄kan̄ emi adade ọnọ ke mme mfịna ukaraidem m̀mê eke n̄kaowo. Utu ke oro, dụri ntịn̄enyịn wụt N̄wed Abasi ye Obio Ubọn̄ esie nte n̄kukụre nsinsi usọbọ ke mme mfịna ubonowo.