Nte Afo Omowụt Esịtekọm Aban̄a Ime Jehovah?
1 Edieke Jehovah mîkpekenyeneke ime ke isua 10 m̀mê 20 oro ẹkebede m̀mê akande oro, ayakde ẹnọ ntatara ikọ ntiense, nte afo ekpekekpep akpanikọ? Nnyịn idat esịt didie ntem nte ke enye ayak ediwak owo efen efen “ẹtua n̄kpọfiọk ẹkabade esịt.” Kpa ye oro, akwa usen ikpe Jehovah “edibuat nte inọ.” (2 Pet. 3:9, 10) Ntem, owo ikpadaha ime Abasi ke ukwan̄ usụn̄ nte edinam ubịghi ke ndida utịt nsọk editịm n̄kpọ emi.—Hab. 2:3.
2 Kop Mbọm Ban̄a Mme Owo: Anyanime Jehovah enen̄ede okpon akan se nnyịn ikemede ndifiọk. Inaha nnyịn ifre iban̄a uduak esie. (Jonah 4:1-4, 11) Jehovah okụt mfụhọ mfụhọ idaha ubonowo onyụn̄ okop mbọm aban̄a mmọ. Jesus okop mbọm ukem ntre. Ke okopde mbọm aban̄a otuowo oro enye ọkọkwọrọde ikọ ọnọ, enye ama oyom utom ukwọrọikọ atara man ediwak mbon efen ẹnyene ifet ndinyene nsinsi uwem.—Matt. 9:35-38.
3 Ke ini mme n̄kpọ mmọn̄eyet ye afanikọn̄ ẹtịbede, nte nnyịn isikopke mbọm iban̄a mbon oro mîfiọkke akpanikọ? Mme owo mfịn ẹbiet “mme erọn̄ eke mînyeneke andikpeme” nte mmọ ẹn̄wanade ndiyọ nnyụn̄ mfiọk se ndutịme odude ke ererimbot ọwọrọde. (Mark 6:34) Ebede ke ndikwọrọ eti mbụk ifịk ifịk, nnyịn inọ mbon oro ẹnyenede eti esịt ndọn̄esịt inyụn̄ iwụt esịtekọm oro inyenede iban̄a ime Jehovah.—Utom 13:48.
4 Utom Nnyịn Edi Usọp Usọp: Isua oko owo 323,439 ẹkena baptism ndien se ibede owo 14,000,000 ẹkedụk Editi. Nso idotenyịn idu ntem inọ ediwak owo efen efen ndibọhọ nsobo idiọk editịm n̄kpọ emi! Nnyịn ifiọkke adan̄a nte “akwa otu owo” ediwakde. (Edi. 7:9) Nnyịn ifiọkke adan̄a nte utom ẹnọde nnyịn ẹte ikwọrọ ikọ edibịghide. Edi Jehovah ọfiọk. Ẹyekwọrọ eti mbụk ẹsịm udomo oro oyụhọde enye, “ndien adan̄aoro ke utịt eyedi.”—Matt. 24:14
5 Ẹsịbe ini omụhọ, ndien usen Abasi emekpere. (1 Cor. 7:29a; Heb. 10:37) Nte eyịghe mîdụhe, “edinyan̄a ekpere nnyịn ke emi, akan nte ekekperede ke ini nnyịn inịmde ke akpanikọ.” (Rome 13:11) Ẹyak nnyịn ikûtaba uduak ime Abasi. Utu ke oro, ẹyak nnyịn ikwọrọ ikọ usọp usọp man ediwak owo oro ẹnyenede udọn̄ ke edinen ido ẹkpekụt akwa mbọm Jehovah.