Ifetutom Oro Odude Ọnọ N̄kpri Owo
1 Ediwak owo ẹmi ẹdide mme ete ye eka idahaemi ẹsima nditi ifetutom oro mmọ ẹkesibuanade nte nditọwọn̄ oro ẹkekọride ke akpanikọ—kpa utom Usen Magazine. Ẹketọn̄ọ utom oro ke kpukpru esop ke 1949. Usen kiet ke urua, kpukpru owo ẹkenyene ndiwụk ntịn̄enyịn ke edisuan Enyọn̄-Ukpeme ye Awake! ke mme efak, ke ufọk ke ufọk, ke ufọkurua ke ufọkurua, ye ke mme usụn̄ eken. N̄kpri asuanetop akpan akpan ẹma ẹsidori enyịn ndibuana ke utom emi koro enye ọkọnọde mmọ ifet ndibuana ke ukem utom oro ikpọ owo ke esop ẹkesinamde. Ndi ekedi ntre ke ini afo ekedide ekpri eyen?
2 Buan Nditọ Fo: Ata n̄kpri nditọ oro mîkemeke nditọn̄ọ nneme N̄wed Abasi kan̄a ke enyịnusụn̄ ẹkeme ndisụk nnọ mme magazine. Emi n̄kukụre oyom ẹkpep mmemmem nneme oro esịnede mbio mbio udịmikọ ifan̄. Ibio ibio utịn̄ikọ, eyedi kaban̄a ndise ikpaedem, ekeme ndikem. Ediwak enyeneufọk ẹsisọsọp ẹbọ n̄kpri owo nnyịn mme magazine, ediwak ini ẹtịn̄de eti ikọ ẹban̄a edinam akpanikọ ye eti edu uwem mme uyen ẹmi. Ye esisịt un̄wam, nditọwọn̄ ẹkeme ndinam utom emi ata mfọn mfọn, ẹtịpde n̄kpọ akamba akamba ẹsịn ke ndisuan etop Obio Ubọn̄. Nte ededi, nte nditọ ẹkọride ẹkpon, mme ete ye eka mmọ ẹyeyom ndin̄wam mmọ ẹka iso ẹnam n̄kọri ke ndifori mme usọ unọ ikọ ntiense mmọ.
3 Manuel ọkọtọn̄ọ ndikwọrọ ikọ to ke enyịnusụn̄ sịm enyịnusụn̄ ke ini enye ekedide isua ita ke emana. Ete ye eka esie ẹma ẹkpep enye ndimụm ibio ibio nneme nsịn ke ibuot. Enye ama esikwọrọ ikọ ifịk ifịk ọtọkiet ye mmọ, enịmde ediwak magazine, ndiye uduot n̄kpri n̄wed, ye mme tract. Enye n̄ko ama esinọ ikọ ntiense ido nneme. Ini kiet ke ini ete ye eka esie ẹkedade enye ẹka itie inemesịt kaban̄a unọ idem nduọkodudu, enye ama ọtọn̄ọ ndinọ mbon en̄wen oro ẹkedude do mme tract. Okposụkedi enye osụk edide ata ekpri, ifiopesịt Manuel ke utom ukwọrọikọ edi ata n̄kpọ nsịnudọn̄ ọnọ ete ye eka esie ye ofụri esop.—N̄ke 22:6.
4 Ẹsio kpukpru Saturday ẹnịm nte “Usen Magazine” ke 2000 Calendar of Jehovah’s Witnesses. Mme ete ye eka, nnyịn isịn udọn̄ ite mbufo ẹfiak ẹdemede udọn̄ ke utom emi, ẹn̄wamde nditọ mbufo ndibuana kpukpru ini nte ẹkekeme ke ifetutom emi.