Obufa Ndutịm Usen Akpan Mbono

Ibuotikọ ndutịm usen akpan mbono oro editọn̄ọde ke March 2000 edi “Ndidụn̄ọde Nditụn̄ọ N̄kpọ Abasi.” (1 Cor. 2:10) Nso nti n̄kpọ ke nnyịn idikpep?

Se ediwak owo ẹkụtde ke mmọ ndiyom ifiọk inọhọ mmọ nduọkodudu. Bible ọnọ nnyịn nduọkodudu, nte esenyịn circuit ediwụtde ke utịn̄ikọ esie oro ọdọhọde “Ndidụn̄ọde Ikọ Abasi Ada Nduọkodudu Edi.” Etịn̄ikọ oro otodo-to edi oyowụt ebuana oro edikwọrọ eti mbụk enyenede ye edidụn̄ọde nditụn̄ọ n̄kpọ Abasi nte enye ọbọrọde mbụme oro “Didie ke Afo Ese Edikwọrọ Obio Ubọn̄?”

Didie ke mme ete ye eka ẹkeme ndin̄wam nditọ mmọ ndidụn̄ọde Ikọ Abasi ntotụn̄ọ ntotụn̄ọ? Ẹyenọ nti ekikere ke utịn̄ikọ oro “Siak Ikọ Abasi nọ Nditọ Fo.” Edidụk nsan̄a ye mbon oro ẹma ẹkekọri ẹsịm ọyọhọ idaha ke n̄kan̄ eke spirit ke esop esinyene eti odudu ke idem mme uyen Christian. Ẹyewụt nte emi esinyenede odudu ke idemmọ mfọn mfọn ke utịn̄ikọ oro “N̄kparawa Owo Oro Ẹkpepde N̄kpọ Ẹto N̄kani Owo.”

Ntak emi nnyịn ikpesịnde ifịk iyom n̄kpọuto eke spirit idahaemi? Jehovah edi Andiyarade ndịben̄kpọ. Etịn̄ikọ oro otodo-do edi ayanam an̄wan̄a se Jehovah akayararede ke eset ye ke eyomfịn ke utịn̄ikọ oro “Jehovah Ayarade Nditụn̄ọ N̄kpọ ke Adiana ke Adiana.” Emi ọyọsọn̄ọ ubiere nnyịn ndika iso ‘ndụn̄ọde nditụn̄ọ n̄kpọ Abasi.’

Diomi idahaemi ndidụk. Mbon oro ẹyomde ndiyarade uyakidem mmọ nnọ Jehovah ebe ke baptism ẹkpenyene ndisian esenyịn oro etiede ibuot usọp usọp nte ẹkekeme. Se nnyịn idikopde ọyọsọn̄ọ ọkpọsọn̄ udọn̄ nnyịn ndidụn̄ọde Ikọ Abasi. Ntre kûtaba akpan usen item eke spirit emi!