Ndinọ “Kpukpru Owo” Ikọ Ntiense
1 Ke ini nnyịn isobode mme owo ẹmi ẹnyenede nsio nsio ido m̀mê idaha ido ukpono, nnyịn iti nte ke Jehovah oyom “kpukpru owo ẹnyene edinyan̄a, ẹnyụn̄ ẹsịm ifiọk akpanikọ.” (1 Tim. 2:4) Ke adianade ye mme tract ye ndiye uduot n̄kpri n̄wed oro ẹtịmde san̄asan̄a, nnyịn imenyene ata nti n̄wed iba ẹmi ikemede ndikama ini ekededi ndin̄wam mme owo ẹmi ido ukpono mmọ mîkekpepke mmọ akpanikọ aban̄ade Abasi ye Christ.
2 N̄wed oro Ifiọk Oro Adade Osịm Nsinsi Uwem ekeme ndinyene ufọn nnọ mme owo ke kpukpru ebiet ke ndimen mme edinịm ke akpanikọ mmọ ndomo ye se Bible ekpepde aban̄a ata Abasi kierakiet. Ke n̄kan̄ eken, ke ndiwụt uwem Jesus Christ, Akakan Owo Oro Akanam Odude Uwem ekeme ndin̄wam owo etịm emehe ye Eyen Abasi onyụn̄ edi se ẹdụride ẹkpere enye, nte ekedide ye ediwak owo ke akpa isua ikie. (John 12:32) Ini ekededi eke odotde, afo emekeme ndidomo mme ekikere oro ẹtienede mi ke ndinọ mme n̄wed ẹmi.
3 Edieke afo ekerede ke ọyọfọn ndinọ owo n̄wed “Akakan Owo,” afo emekeme ndibụp:
◼ “Nso isidụk fi ekikere ke ini afo ekerede aban̄a Jesus Christ? [Bet ibọrọ.] Ediwak mme ewetmbụk eset ẹnyịme Jesus nte akakan owo oro akanam odude uwem. [Kot uwụtn̄kpọ kiet to ntọn̄ọikọ emi odude ke n̄wed Akakan Owo.] Bible owụt ke uwem Jesus ekedi uwụtn̄kpọ ọnọ nnyịn nditiene.” Kot 1 Peter 2:21 ye akpa ikpehe ekikere ke akpatre page ntọn̄ọikọ oro odude ke n̄wed Akakan Owo. Edieke enyeneufọk enyenede udọn̄ ndikpep n̄kpọ mban̄a Jesus, nọ n̄wed. Mbemiso ọkpọn̄de, kot John 17:3 nyụn̄ bụp ete, “Didie ke nnyịn ikeme ndibọ ifiọk emi adade esịm nsinsi uwem mi?” Nam ndutịm oro enyenede iwụk ndifiak n̄ka ye ibọrọ.
4 Ke ini afiakde aka ndinam an̄wan̄a nte ẹkemede ndinyene ọnọ-uwem ifiọk, afo emekeme ndidọhọ:
◼ “Mma ndọhọ ke nyafiak ndiwụt fi nte nnyịn ikemede ndinyene ifiọk oro adade esịm nsinsi uwem.” Nọ n̄wed Ifiọk, ndien ke adade akpa ibuot, wụt nte ẹnịmde ukpepn̄kpọ.
5 Edieke afo oyomde ndinọ n̄wed oro “Ifiọk Oro Adade Osịm Nsinsi Uwem,” afo emekeme ndibụp ete:
◼ “Sia ediwak nsio nsio ido ukpono ẹdude mfịn, nte akanam afo emeyịk nte nnyịn ikemede ndibiere enye emi Abasi enyịmede?” Ke ẹma ẹkenọ ibọrọ, kụbọde n̄wed Ifiọk ka page 46. Kot ikpehe ekikere 6 ye 7, nyụn̄ bụp m̀mê enyeneufọk enyịme nte ke idịghe kpukpru ido ukpono ‘ẹnam uduak Ete’ Jesus mfịn. Tịn̄ ete ke ido ukpono akpanikọ mfịn esịm mme n̄kpọ oro ẹyomde oro ẹsiakde ke enyọn̄ emi. Nọ n̄wed ke etịbe oro ẹsinọde. Ke ini ọkpọn̄de, afo emekeme ndibụp, “Didie ke ido ukpono akpanikọ okpotụk edu uwem owo?” Diomi mfiakn̄ka man ọbọrọ mbụme oro.
6 Ke ini afiakde aka ndinam an̄wan̄a nte ido ukpono akpanikọ otụkde uwem owo, afo emekeme ndibụp:
◼ “Afo ekere ke ido ukpono okpotụk edu uwem owo didie? [Bet ibọrọ.] Christ ama ọnọ nnyịn idaha emi ẹkpedade ẹdiọn̄ọ ido ukpono.” Kot Matthew 7:17-20. Ekem dọhọ enyeneufọk okot ikpehe ekikere 18 ke page 50-51. Edieke ini ayakde, neme ikpehe ekikere 20 ke page 51. Dọhọ ke iyafiak idi man ika iso ke nneme.
7 Mme N̄kpọ Ndida Ntọn̄ọ Nneme: Ediwak un̄wam ukpepn̄kpọ ẹdu ke n̄wed Ifiọk, ẹmi ẹkemede ndikama nte mme n̄kpọ ndida ntọn̄ọ nneme ke akpa ediwaha m̀mê ke mfiakn̄ka. Afo emekeme nditọn̄ọ nneme n̄kukụre ke ndibụp mbụme emi odotde. Ke uwụtn̄kpọ, tịm fiọk mbụme emi ye mme ibuotikọ ye mme page ẹmi ẹnemede mmọ:
“Se Idọn̄ọde ke Bible”—Page 13.
“Nte Afo Emekeme Ndiberi Edem ke Bible?” —Page 15.
“Ata Abasi Enyene Enyịn̄” —Page 24.
“Kpeme Idem ye Mme N̄kari Satan!” —Page 59.
“Mme Ikpehe Ukperedem Ini” —Page 99.
“Mme N̄kpọ Ẹyomde Kaban̄a Edisan̄a N̄kpere Abasi” —Page 152.
“Mme Usio-Ukot Ẹmi Ẹdade Ẹsịm Uwem Nsinsi” —Page 173.
8 Afo emekeme ndikụbọde n̄ka (mme) page oro ẹsatde-sat ke n̄wed Ifiọk onyụn̄ anam n̄kpọ oro ẹnemede an̄wan̄a. Ekem nam ndutịm nọ mfiakn̄ka ebe ke ndibụp mbụme emi enyenede ebuana emi ẹkemede ndida ediye uduot ekpri n̄wed Oyom m̀mê n̄wed Ifiọk mbọrọ. Kụt ete ke omokot enyeneufọk edi An̄wan̄wa Mbono Esop, nyụn̄ nọ n̄wedikot.
9 Kpukpru orụk mbon esịt akpanikọ ke ẹdụn̄ọde ẹyom akpanikọ aban̄ade Abasi ye Christ. Nnyịn imekeme ndin̄wam mmọ ke utom unọ ikọ ntiense nnyịn. Ntre, ndien, ẹyak nnyịn ika iso “ikpa utom ye en̄wan, koro nnyịn ikodoride enyịn ke odu-uwem Abasi, emi edide Andinyan̄a kpukpru owo.”—1 Tim. 4:10.