Oyom Kpukpru Nnyịn Man Inam Utom Ima
1 Mbet Jesus Christ kiet kiet ekpenyene ndifiọk nte ke mme ukeme imọ ndin̄wam nnyụn̄ mbuana ke utom ukwọrọikọ Obio Ubọn̄ ẹnen̄ede ẹdi akpan n̄kpọ. Jesus ama ọdiọn̄ọ ke mme mbet imọ ẹdision̄o mfri Obio Ubọn̄ ke nsio nsio udomo. (Matt. 13:23) Okposụkedi mme asiakusụn̄ oro ẹnamde utom ọkpọsọn̄ ẹnamde akamba ubak utom ukwọrọikọ, kpukpru mbon oro ẹkade iso ndinọ Abasi ubọn̄ ifịk ifịk ebe ke ndin̄wụm ekese mfri nte ẹkekemede ẹdot itoro.—John 15:8.
2 Ukeme Otu Ẹnam Ekese: Jesus ama ebem iso etịn̄ ete ke ukeme kpukpru mbet imọ oro ẹtan̄de ẹdian ọtọkiet ayanam utom eke okponde akan eke imọ. (John 14:12) Edide mme idaha nnyịn ẹsụhọde se ikemede ndinam m̀mê ẹyak nnyịn isịn ekese ini ke utom ukwọrọikọ Obio Ubọn̄, oyom kpukpru nnyịn man inam utom ima. Edi kpa nte Paul ekewetde ete: “Ofụri Idem ada se kpukpru ikek etịpde, nte idomo utom ndido kiet kiet edide, ọsọn̄ọ akpaha adiana, ọdọdiọn̄ ọkọri adaha ada.”—Eph. 4:16.
3 Ndusụk owo ẹkeme ndikere ke mme ukeme mmimọ ikemke. Nte ededi, se idide akpan n̄kpọ ke enyịn Jehovah edi nte utom nnyịn edide eke ofụri ukpọn̄. Kpukpru n̄kpọ ẹmi inamde inọ enye ẹsọn̄ urua enye onyụn̄ adara.—Men Luke 21:1-4 domo.
4 Ka Iso Ndinọ Utom Emi Ibetedem: Kpukpru nnyịn imenyene ifet nditịp n̄kpọ ke n̄kan̄ eke obụk nsịn ke utom ofụri ererimbot. Ndusụk owo n̄ko ẹkeme ndin̄wam ke utom ubọk oro abuanade ke ndinọ utom Obio Ubọn̄ ibetedem. Owo kiet kiet ekeme ndinọ mme ibọrọ oro ẹtịmde idem nte ọfọnde ke mme mbono esop onyụn̄ abuana ke Ufọkn̄wed Utom Ukara Abasi. Ebede ke ndida ifet edisịn udọn̄ nnọ nditọete nnam n̄kpọ nte ọfọnde, nnyịn iyetịp ekese isịn ke n̄kọri eke spirit esop, ndien emi eyetịp n̄ko esịn ke ukeme esie ndiyọhọ utom emi ẹnọde enye.
5 Ih, oyom kpukpru nnyịn man inam utom ima. Owo ndomokiet ikpekereke ke owo iyomke imọ. Mme ukeme nnyịn oro idiande kiet, ikpọ ye n̄kpri, ke ndinam n̄kpọ Jehovah anam ẹdiọn̄ọ nnyịn nte mme ata andituak ibuot nnọ Abasi. (Mal. 3:18) Nnyịn owo kiet kiet imekeme ndinyene akpan udeme ke ndikpono Jehovah ye ke ndin̄wam mbon efen ẹfiọk ẹnyụn̄ ẹnam n̄kpọ ẹnọ enye.