Ndikpep Ikpọ Owo Ndikot N̄wed

Ukeme edikot n̄wed ada idatesịt esịtidem ye n̄kọri ke ifiọk edi. Se inọde uyụhọ akpan akpan edi edikot ye edida Ikọ Abasi emi adade nsinsi uwem edi nsịn ke edinam. (Edi. 1:3) Ediwak owo ẹketọn̄ọ ndinam n̄kpọ Jehovah ke ini usọn̄ mmọ. N̄wakn̄kan ke otu mmọ ẹmi ẹdara uyụhọ esịtidem ke ini mmọ ẹkemede ‘ndidụn̄ọde N̄wed Abasi ke usen ke usen, man ẹfiọk m̀mê mme ikọ oro ẹkem ntre.’ (Utom 17:11) Ke ntre akpana kpukpru nnyịn inyene udọn̄ edin̄wam mmọ efen ẹmi mînyeneke ukeme edikot n̄wed ke idemmọ. Mme ndausụn̄ ẹtienede mi ayan̄wam mbon oro ẹnyenede ifet ndinịm ufọkn̄wed oro ẹkpepde nte ẹkotde n̄wed ẹnyụn̄ ẹwetde n̄kpọ.

◼ Kûnen̄ede utie uyịre uyịre, kûnyụn̄ ukaha eyen ufọkn̄wed ke ndikpep ata ediwak n̄kpọ ini kiet. Emi ekeme ndinam idem akabade emem eyen ufọkn̄wed ndien etre ndidụk mme ukpepn̄kpọ.

◼ Sịn udọn̄ ndien ndien nọ nyụn̄ tie in̄wan̄în̄wan̄. Ẹkọri usọ ukot n̄wed nsịt nsịt, ke adiana ke adiana. Nditọ ufọkn̄wed ẹkpenyene ndikop uyụhọ ke n̄kọri mmọ. Sịn udọn̄ nọ nditọ ufọkn̄wed ẹda se mmọ ẹkpepde ẹnam n̄kpọ usọp usọp nte ẹkekeme. Mme andikpep ẹkeme ndin̄wam mmọ ndikot mme ibọrọ m̀mê mme itien̄wed Abasi ke mme mbono esop Christian mîdịghe ndikot itien̄wed Abasi ke an̄wautom. Emi oyowụt ata ufọn ufọkn̄wed oro ẹkpepde nte ẹkotde n̄wed ẹnyụn̄ ẹwetde n̄kpọ.

◼ Kûbiat ini ke se mîtịmke idi akpan n̄kpọ. Ikpọ owo ẹsiyọhọ ye utom. Da n̄wakn̄kan ke ikpehe ini ukpepn̄kpọ kpep mme akpan n̄kpọ.

◼ Kpono nditọ ufọkn̄wed kpukpru ini, ọnọde mmọ uku oro mmọ ẹdotde. Kûsuene m̀mê ndisụhọde mmọ itie. Du ke edidemede ban̄a mme mfịna owo kiet kiet. Eyedi ndusụk nditọ ufọkn̄wed idikemeke ndikot n̄kpri ubọkn̄wed koro oyomde mmọ ẹsịne akrasi. Ẹkeme ndisọn̄ mmọ eken ndikop n̄kpọ. Oyom edikere mban̄a ye mbufiọk ke ndinam n̄kpọ ye kpukpru owo.

◼ Man ẹnam n̄kọri, nditọ ufọkn̄wed ẹkpenyene ndinam utomufọk ke ediwak hour ke hour kiet kiet oro ẹnọde ata ukpep. Andikpep ekeme ndinọ mbon en̄wen ikot edin̄wam nditọ ufọkn̄wed ke utomufọk mmọ.

Ke akpatre, nyene ime, nọ nsịnudọn̄, nyụn̄ yọhọ ye itoro kpukpru ini. Ke ndida mme edumbet eke enyọn̄ emi nnam n̄kpọ, afo eyetịp esịn ke inemesịt ikpọ owo oro ẹyomde un̄wam ke ndikeme ndikot n̄wed.