Spirit Jehovah Odu ye Nnyịn
1 Nte Mme Ntiense Jehovah, nnyịn imenyene akwa utom oro ẹnọde nnyịn inam. Jesus ọkọdọhọ ete: “Ẹnyene ndibem iso n̄kwọrọ gospel nnọ kpukpru mme idụt.” (Mark 13:10) Ke ẹsede ke idaha ekikere owo, ẹkeme nditie nte owo idikemeke, edi idịghe ntre. Nnyịn imenyene ata ọkpọsọn̄ odudu ke ekondo oro ọnọde nnyịn ibetedem—spirit Abasi.—Matt. 19:26.
2 Uyarade eke Akpa Isua Ikie: Ke adade prọfesi Isaiah etịn̄ aban̄a idemesie, Jesus ama ọdọhọ ete: “Spirit Jehovah odoro Mi ke idem, . . . ete, n̄kwọrọ eti mbụk.” (Luke 4:17, 18) Mbemiso ọdọkde aka heaven, enye ama ọdọhọ mme apostle esie ete ke ebede ke edisana spirit ẹyenọ mmọ odudu kpasụk ntre ndidi ntiense “tutu esịm utịt ererimbot.” Ke oro ebede, edisana spirit ama ada Philip usụn̄ ndikwọrọ ikọ nnọ akwa owo esopikpe Ethiopia, spirit ama ọdọn̄ Peter aka ebịne etubom ekọn̄ Rome, ndien enye ama osio Paul ye Barnabas ọdọn̄ ẹkekwọrọ ikọ ẹnọ mme idụt Gentile. Anie ekpekekere nte ke mme owo ẹtode mme utọ idaha oro ke uwem ẹkpenyịme akpanikọ? Edi mmọ ẹma ẹnyịme.—Utom 1:8; 8:29-38; 10:19, 20, 44-48; 13:2-4, 46-48.
3 Uyarade eke Eyomfịn: N̄wed Ediyarade ọsọn̄ọ etịn̄ nte edisana spirit abuanade ke utom ukwọrọikọ eyomfịn ke ndidọhọ: “Spirit ye n̄wanndọ ẹdọhọ ẹte, Di. . . . Owo eke amade, yak edi edibọ mmọn̄ uwem ke ikpîkpu.” (Edi. 22:17) Spirit omonụk otu n̄wanndọ Christ ye “mme erọn̄ en̄wen” ẹdide nsan̄a mmọ ndikwọrọ eti mbụk nnọ kpukpru owo. (John 10:16) Ana nnyịn inyene uko ke ukwọrọikọ nnyịn, imen̄eke ndika mbịne mme owo eke kpukpru orụk, ibuọtde idem kpukpru ini nte ke spirit Abasi ayan̄wam nnyịn. Ẹnọ nsọn̄ọ oro anamde ẹnịm ke akpanikọ nte ke spirit Abasi aka iso ndidu ye mme asan̄autom esie ke 1998 Yearbook. Kam se utịp! Ke isua utom iba oro ẹbede, se ibede owo 1,000 ke ẹbaharede ukem ukem ẹkena baptism ke usen kiet kiet.
4 Nịm ke akpanikọ nte ke spirit Abasi ayaka iso odu ye nnyịn nte nnyịn ikwọrọde etop Obio Ubọn̄ ikesịm udomo oro Jehovah oyomde. Ifiọk emi ekpenyene ndisịn udọn̄ nnọ nnyụn̄ ndemede nnyịn ndisịn̄ede idem nnyịn ọkpọsọn̄ ọkpọsọn̄ ke akakan utom Obio Ubọn̄.—1 Tim. 4:10.