Se Ẹyomde—Mme Ukpepn̄kpọ Bible Efen Efen

¹ Jehovah Abasi ada n̄kaiso n̄kọri ọdiọn̄ esop esie eke isọn̄. Ke isua utom 1997, owo 375,923 ẹkena baptism ke ofụri ererimbot—se ibede mbufa mbet 1,000 ke usen kiet kiet, m̀mê n̄kpọ nte owo 43 ke kpukpru hour ke ẹbaharede ukem ukem! Kpa ye nsọn̄ọn̄kpọ oro ekemede ndidi nditọete nnyịn ẹsobo ke nsio nsio ikpehe ererimbot ke ediwak isua, utom Obio Ubọn̄ ke enyene uforo ye n̄wọrọnda n̄kọri. Edi n̄kpọ nduaidem didie ntem ndikot mban̄a n̄kọri oro ẹnamde ke ndisuan eti mbụk!

² Ke Nigeria ke isua utom 1997, nnyịn n̄ko ima inyene n̄kọri ke ofụri ibat mme asuanetop ye mme asiakusụn̄ unọ un̄wam ke ẹbaharede ukem ukem, ke ibat hour oro ẹkebiatde ke ukwọrọikọ, ye ke ibat n̄kpri n̄wed, ndiye uduot n̄kpri n̄wed, ye mme magazine oro ẹkenịmde. N̄kọri ama odu ke ibat mbon oro ẹkenade baptism ẹma ẹnyụn̄ ẹnyene n̄wakn̄kan ibat oro akanam ẹsịmde ke ibatowo oro ẹkedụkde Editi. Nso kaban̄a utom mfiakn̄ka ye ukpepn̄kpọ Bible? N̄kọri ama odu n̄ko ke ofụri ibat mfiakn̄ka ẹma ẹnyụn̄ ẹnyene n̄kọri ẹdide mbahade 5 eke ikie ke ukpepn̄kpọ Bible. Ke adan̄aemi inemde esịt iban̄a mme n̄kọri ẹmi, ukpepn̄kpọ Bible edide 0.9 ke ẹbaharede ukem ukem ke isua utom oro owụt nte ke idịghe kpukpru owo ẹsinịm mme ukpepn̄kpọ Bible kpukpru ọfiọn̄. Edi kpa ye oro, mme ikpehe utom ẹmi ẹdi akpan n̄kpọ ke utom unam mbet. Nso ke nnyịn owo kiet kiet ikeme ndinam man ikụt ke imenịm ukpepn̄kpọ Bible kpukpru ini?

³ Nyene Ọkpọsọn̄ Udọn̄ Ndinịm Ukpepn̄kpọ: Oyom nnyịn ke idem nnyịn iwụk ntịn̄enyịn ke ndisọn̄ idem nnyụn̄ nnyene ifịk ke n̄kan̄ eke spirit. Ata mme anditiene Christ ‘ẹsịn esịt ẹnam nti utom.’ (Titus 2:14) Ke ini ifiakde idụn̄ọde utom nnyịn, ndi nnyịn imekeme ndidọhọ ke imenyene ọkpọsọn̄ udọn̄ ndifiak n̄ka mbịne kpukpru mbon oro ikenịmde n̄wed inọ ke an̄wautom? Ndi nnyịn imenyene ifiopesịt iban̄a edinyịme ndinịm ukpepn̄kpọ Bible ye kpukpru mbon oro ẹwụtde udọn̄? (Rome 12:11) Mîdịghe ndi oyom nnyịn ikọri udọn̄ okponde ke ndinam mfiakn̄ka nnyụn̄ ntọn̄ọ mme ukpepn̄kpọ Bible?

⁴ Ọkpọkpọ edikot Bible, edidụk mbono esop kpukpru ini, ye edikpep mme n̄wed ayanam nnyịn isọn̄ idem ke n̄kan̄ eke spirit inyụn̄ inyene odudu spirit Abasi. (Eph. 3:16-19) Emi ọyọsọn̄ọ mbuọtidem ye uko oro inyenede ke Jehovah ye ima oro inyenede inọ ekemmọ owo. Ẹyedemede nnyịn udọn̄ ndikpep owo en̄wen akpanikọ, ke ntre anamde utom nnyịn enyene inem, okụt unen, onyụn̄ edemede udọn̄. Ih, nnyịn ikpenyene ndiyom ediwak ukpepn̄kpọ Bible!

⁵ Bem Iso Kpep N̄kpọ ye Ubon: Mme ete ye eka ẹdide Christian oro ẹnyenede nditọ ke ufọk ẹkpenyene ndikere mban̄a ndutịm ukpepn̄kpọ Bible ofụri ini eke ubon. (Deut. 31:12; Ps. 148:12, 13; N̄ke 22:6) Ekpetịm ọfọn mme ete ye eka ndikpep ediye uduot ekpri n̄wed Oyom ye nditọ mmọ ndien ekem n̄wed Ifiọk man ẹtịm mmọ idem ndidot nte mme asuanetop oro mînaha baptism ye kaban̄a uyakidem ye baptism. Edi akpanikọ, ẹkeme ndikpep udiana n̄wed, etienede se ẹyomde ye isua emana eyen oro. Ete m̀mê eka oro ekpepde n̄kpọ ye eyen oro mînaha baptism ekeme ndibat ukpepn̄kpọ, ini, ye mfiakn̄ka, nte ẹwụtde ke Ekebe Mbụme Utom Obio Ubọn̄ Nnyịn eke June 1987.

⁶ Fori Ọkpọkpọ Ndutịm: Ke ẹkerede ẹban̄a ibat magazine, ndiye uduot n̄kpri n̄wed, ye mme n̄wed ẹnịmde, eyịghe idụhe nte ke ẹsuan ata ediwak n̄kpasịp. Mme n̄kpasịp akpanikọ ẹmi ẹtọde mi ẹnọ akwa idotenyịn kaban̄a edinam mbufa mbet. Edi ndi ọtọin̄wan̄ m̀mê ekpeme in̄wan̄ ekeme ndinyene ata uyụhọ edieke enye akade-ka iso ọtọ ndien, ke ama ekesịn ofụri ukeme esie, idaha ini inam idọk? Ọsọsọn̄. Kpasụk ntre, oyom edifiak n̄ka.

⁷ Ndi afo kpukpru ini emesidiomi ini ndinam mme mfiakn̄ka? Waha bịne kpukpru udọn̄ oro okokụtde ye unana ubiatini. Nam mme mfiakn̄ka ye uduak editọn̄ọ ukpepn̄kpọ Bible. Ndi afo emenyene n̄wetnnịm n̄kpọ mfiakn̄ka oro asanade, edide eke ndondo emi, emi etịmde nte ọfọnde? Ke adianade ye enyịn̄ ye adres enyeneufọk, kụt ete ke emewet usenọfiọn̄ akpa ediwaha, n̄wed ekededi oro ekenịmde, ibio ibio editịn̄ mban̄a se ekenemede, ye akpan n̄kpọ oro ẹkemede nditat ke udiana ediwaha. Nịm ufan̄ ke n̄wetnnịm n̄kpọ fo nọ ntọt efen efen oro ẹdidiande ke ama akanam mfiakn̄ka kiet kiet.

⁸ Dụn̄ọde Nte Ekemede Ndinam Mfiakn̄ka: Nso idi ndusụk akpan n̄kpọ anade enyene ke ekikere ke ini afiakde aka ebịne owo oro enyenede udọn̄? (1) Sịn ufiop, tie ufan ufan, nyene ifiopesịt, nyụn̄ da ido nneme. (2) Neme mme ibuotikọ m̀mê mme mbụme oro ẹnemde enye. (3) Nam nneme edi mmemmem mmemmem onyụn̄ ekem ye N̄wed Abasi. (4) Ke ini kiet kiet oro akade, domo ndikpep enyeneufọk n̄kpọ oro enye edikụtde nte enyenede ọkpọkpọ ufọn ọnọ imọ. (5) Demede udọn̄ ke ibuot nneme oro ẹdinemede ke edifiak n̄ka efen. (6) Kûdu ebịghi akaha. (7) Kûbụp mme mbụme oro ẹnamde enyeneufọk okop bụt m̀mê oro enye mîkemeke ndibọrọ. (8) Da mbufiọk nam n̄kpọ mbak udubiom ukwan̄ ekikere m̀mê ndiọi edu enyeneufọk ikpe mbemiso enye ọkọride esịtekọm ọnọ mme n̄kpọ eke spirit.—Se esịne-esịt Utom Obio Ubọn̄ Nnyịn eke March 1997 kaban̄a un̄wam efen efen ke nte ẹkemede ndikụt unen ke edinam mme mfiakn̄ka ye editọn̄ọ mme ukpepn̄kpọ Bible.

⁹ Yom Kpukpru Ifet Ẹmi Ẹkemede Ndidu: Ke esop kiet, ẹma ẹkeme ndibọ mme enyịn̄ ye nọmba ubet mme andidụn̄ ke ufọk oro ẹnọde ọkpọsọn̄ ukpeme. Ẹma ẹwet ọkpọkpọ leta ẹnọ mme andidụn̄ kiet kiet, ẹnyụn̄ ẹsịn tract iba. Ke utịt leta oro, ẹma ẹnọ ekikere ukpepn̄kpọ Bible ẹnyụn̄ ẹsịn nọmba urụk ukopikọ n̄kann̄kụk man andibọ okpokot. Ke ufọt usen ifan̄, akparawa kiet ama okot oyom ukpepn̄kpọ. Ẹma ẹnam mfiakn̄ka ke ndan̄nsiere, ẹnyụn̄ ẹtọn̄ọ ukpepn̄kpọ ke n̄wed Ifiọk. Kpa okoneyo oro, enye ama odụk Ukpepn̄kpọ N̄wed Esop, onyụn̄ aka iso ndidụk kpukpru mbono esop. Ikebịghike, enye ama ọtọn̄ọ ndikot Bible ke usen ke usen onyụn̄ anam eti n̄kọri ebịne baptism.

¹⁰ Mme asuanetop ẹdude ke otu kiet ẹma ẹdiomi ndinam mfiakn̄ka ọtọkiet. Ke ini eyenete an̄wan kiet akakade kiet ke otu mfiakn̄ka esie, owo emi enye okoyomde ikodụhe ke ufọk, edi n̄kaiferi efen ama ọwọrọ edi, ọdọhọde ete: “Ami n̄ketie mbet fi.” Enyeneufọk oro ama ọbọbọ n̄wed Ifiọk ke mbemiso oto owo emi enye ọdiọn̄ọde. Etisịm ini emi nditọete iban oro ẹkewahade enyịnusụn̄ esie, enye ama okot n̄wed oro ama utịm ikaba onyụn̄ okop inemesịt etieti ke ntọt esịnede ke enye. Enye ama ọdọhọ ke idem ikakpaha imọ ndikụt Mme Ntiense ẹwahade ẹbịne imọ ke usen oro koro ikọbọn̄de akam iyom ite mmọ ẹdikpep Bible ye imọ. Ukpepn̄kpọ ama ọtọn̄ọ, enye onyụn̄ ọtọn̄ọ ndidụk mme mbono esop, onyụn̄ anam usọp usọp n̄kọri.

¹¹ Eyenete an̄wan kiet, emi ama akana baptism ke se ikperede isua 25, ama ọnọ eka esie n̄wed Ifiọk ke ndondo emi. Eka esie, kpa aka ufọkabasi, ama ọtọn̄ọ ndikot n̄wed oro. Ke enye ama okokụre ibuot iba, enye ama okot eyen esie ndien, ke n̄kpaidem eyen oro, ama ọdọhọ ete: “Ami nyom ndikabade ndi kiet ke otu Mme Ntiense Jehovah!” Eka esie ama ọtọn̄ọ ndikpep n̄kpọ ndien idahaemi enye ana baptism.

¹² Domo Mme Ekikere Ẹmi Se: Ndi akanam amada nnennen usụn̄ ọtọn̄ọ mme ukpepn̄kpọ? Afo n̄kukụre emekeme ndidọhọ: “Edieke afo edimade ndinyene ukpepn̄kpọ Bible mfọn, ami mmekeme ndida minit ifan̄ kpọt n̄wụt fi nte ẹkemede ndinam enye. Edieke enemde fi, afo emekeme ndika iso.” Ediwak owo isimen̄eke ndinyịme utọ ukpepn̄kpọ oro, ndien mmọ ẹsiyom ndikụt nte ẹnamde ukpepn̄kpọ Bible ẹwụt ye unana ubiatini.

¹³ Ke ntọn̄ọ ntọn̄ọ ukpepn̄kpọ oro, wụt eyen ukpepn̄kpọ nte ẹnamde mbemiso ntịmidem ebe ke ndikot mme itien̄wed oro ẹsiakde ẹsịn ẹnyụn̄ ẹdụride udịm ke mme ọkpọ ikọ oro ẹdide ibọrọ mbụme oro ẹmịn̄de. Wụk ntịn̄enyịn ke mme akpan n̄kpọ kpọt. Okposụkedi ekemede ndiyom nnyịn ikpụhọ ida ekekem ke mme akpa ikpehe ifan̄, edi akpan n̄kpọ nte inịm ukpepn̄kpọ Bible kpukpru ini. Nyene ke ekikere nte ediwụtde ke akam edi akpan ubak ukpepn̄kpọ ye nte afo edidade N̄wed Abasi etịm eyen ukpepn̄kpọ idem eben̄e ubiọn̄ọ. Ke usụn̄ ekededi, nam ukpepn̄kpọ enyene inem!

¹⁴ Edi akpanikọ, idịghe kpukpru nditọ ukpepn̄kpọ Bible ẹsikọri ke ukem udomo. Ndusụk owo inyeneke udọn̄ n̄kpọ eke spirit nte mbon eken inyụn̄ isọpke ndimụm se ẹkpepde mmọ. Mbon eken ẹdu uwem ọyọhọde ye utom onyụn̄ ekeme ndidi mmọ idikemeke ndisịn ini oro oyomde man ẹkụre ofụri ibuot ke urua kiet kiet. Ntem, ke ndusụk idaha ẹkeme ndiyom se iwakde ikan ini ukpepn̄kpọ kiet ndikụre ndusụk ibuot ye mme ọfiọn̄ efen efen man ẹkụre n̄wed oro. Ke ndusụk idaha nnyịn imekeme ndibem iso n̄kpep ediye uduot ekpri n̄wed Oyom ndien ekem ikpep n̄wed Ifiọk. Emi, adianade ye edidụk mme mbono esop, ayan̄wam eyen ukpepn̄kpọ kiet kiet ndinyene eti itiat idakisọn̄ ke akpanikọ.

¹⁵ Ke akande kpukpru, bọn̄ akam yom ukpepn̄kpọ Bible! (1 John 3:22) Kiet ke otu ifiọkutom oro ọnọde Christian uyụhọ akan edi ndidi se Jehovah adade ndin̄wam owo akabade edi mbet Jesus Christ. (Utom 20:35; 1 Cor. 3:6-9; 1 Thess. 2:8) Idahaemi edi ini ndisịn ọkpọsọn̄ ifịk ke utom ukpepn̄kpọ Bible, inyenede ọyọhọ mbuọtidem ke Jehovah ndidiọn̄ ukeme nnyịn nditọn̄ọ ediwak ukpepn̄kpọ!

[Ekebe ke page 3]

Ndi afo ke ọbọn̄ akam man ọtọn̄ọ obufa ukpepn̄kpọ Bible?