Utom Ukwọrọikọ Nnyịn—Ediwụt Ata Ima
1 Ebede ke utom ukwọrọikọ nnyịn nnyịn iwụt ke imenịm akakan ewụhọ iba. (Matt. 22:37-39) Ima oro inyenede inọ Jehovah onụk nnyịn nditịn̄ eti ikọ mban̄a enye. Ima oro inyenede inọ mme mbọhọidụn̄ nnyịn onụk nnyịn ndisịn udọn̄ nnọ mmọ ndiyom ifiọk uduak Abasi man otodo, ukem nte nnyịn, mmọ ẹkeme ndidi ndima Jehovah nnyụn̄ nsịn idem mmọ ke udịm ndibọ enọ nsinsi uwem. Ntre, ndien, ebede ke utom ukwọrọikọ nnyịn nnyịn ikpono enyịn̄ Jehovah inyụn̄ ibuana ọsọn̄urua idotenyịn Obio Ubọn̄ ye mme mbọhọidụn̄ nnyịn. Ih, utom ukwọrọikọ nnyịn edi ediwụt ata ima nnọ Abasi ye owo.
2 Ima nnyịn onụk nnyịn nditịn̄ ikọ nnọ kpukpru orụk owo ke kpukpru orụk idaha. (1 Cor. 9:21-23) Ke ndinam an̄wan̄a: Ke esịt ubomofụm, ebiowo Christian kiet eketie ekpere oku Roman Catholic. Ebiowo oro ama anam oku oro etịn̄ ikọ ebe ke ndibụp enye mbụme ifan̄ ke mbufiọk ndien ekem ọwọn̄ọde eneme aban̄a Obio Ubọn̄. Etisịm ini emi oku oro ọwọrọde ke ubomofụm, enye ama ọbọ n̄wed nnyịn iba. Nso eti utịp ke emi ekedi ntem ke ebiowo oro ndiwụt ata ima nnọ mbọhọidụn̄ esie!
3 Ata Ima Onụk Nnyịn Ndikwọrọ Ikọ: Mbon oro ẹbuanade ke utom usiakusụn̄ unọ un̄wam ye eke uyọhọ ini ke akpanikọ ẹwụt ata ima ẹnọ Abasi ye mbọhọidụn̄. Mme asiakusụn̄ kpukpru ini ẹwa ini ye odudu mmọ ndin̄wam mbon en̄wen ke n̄kan̄ eke spirit. Nso isinụk mmọ ndinam emi? Asiakusụn̄ kiet ọkọdọhọ ete: “Ami mmọfiọk nte ke ima edi mbun̄wụm spirit Abasi. Ntre ke enye mîdụhe, ami n̄kpekemeke ndidu ke akpanikọ ndomokiet, ntịn̄ke-tịn̄ mban̄a edikụt unen nte asiakusụn̄. Ima anam mi n̄kere mban̄a mme owo, mfiọk se inanade mmọ, mmonyụn̄ mfiọk nte ke mme owo ẹsinyịme ẹnọ ima.” Jesus ama owụt mme owo utọ ima oro. Ini kiet ke ini enye ye mme mbet esie oro ẹkekpade mba ẹkekade ebiet ‘ndiduọk odudu esisịt,’ otuowo ẹma ẹbem mmọ iso ẹsịm do. Nso ke Jesus akanam? “Atua mmọ mbọm,” onụk mme ọkpọkpọ udọn̄ esie enịm man ‘ekpep mmọ ediwak n̄kpọ.’—Mark 6:30-34.
4 Idem ke ini mme owo ẹsịnde eti mbụk oro nnyịn inọde, nnyịn imesinyene ntotụn̄ọ idatesịt, ifiọkde ite ke idide se ima onụkde, nnyịn imanam ofụri ukeme nnyịn ndin̄wam mmọ ẹnyene edinyan̄a. Ke ini Christ edibierede ikpe ọnọ kpukpru nnyịn ke akpatre, nnyịn iyenen̄ede ikop inemesịt nte ke ima iwụt ata ima ebe ke ‘ndinam utom nnyịn mma.’—2 Tim. 4:5.