“Ẹnam Emi Nditi Mi”
1 Etie nte mme owo ẹsifre ẹban̄a se akpan n̄kpọ ọwọrọde nte ini akade. Emi edi ntak kiet emi, ke ini ọkọtọn̄ọde “Udia Ọbọn̄,” Jesus okowụkde mbet esie ete: “Ẹnam emi nditi Mi.” Toto ke ini oro, ke edifiak nti n̄kpa Jesus, mme Christian ke nsụhọdeidem ẹmeka iso “ẹkwọrọ n̄kpa Ọbọn̄ tutu Enye edi.”—1 Cor. 11:20, 23-26.
2 Idahaemi ke mîbịghike, Jesus ọyọbọ akpatre ke otu nsụhọ “ekpri otuerọn̄” oro osụhọrede ke ibat esịn ke ebietidụn̄ eke heaven. (Luke 12:32; John 14:2, 3) Isua emi nsụhọ mbon oro ẹyetde aran ke adianade ye akwa otuowo eke “mme erọn̄ en̄wen” oro ibat akade-ka iso ndikọri ẹyetọn̄ọ ntak ẹnyene ifet edinịm Udia Mbubịteyo Ọbọn̄, ke April 11. (John 10:16; Edi. 7:9, 10) Ẹyesọn̄ọ esịtekọm kaban̄a akwa ima Jehovah ke ndikọnọ ikpọn̄îkpọn̄ edibon Eyen esie ke ibuot ubonowo. Ẹyewụt uwụtn̄kpọ Jesus, ima esie, edinam akpanikọ esie tutu esịm n̄kpa ke ndinọ ufak, ye edikara oro enye akarade idahaemi nte Edidem Obio Ubọn̄ Abasi oro ẹma ẹkewụk, ọkọrọ ye mme edidiọn̄ oro Obio Ubọn̄ oro edidade edi. Ke akpanikọ edinam editi!
3 Tịm Idem Idahaemi: Ẹyak kpukpru nnyịn inam n̄kpọ ndinam ini Editi emi edi eke akwa inemesịt ye ekọm kaban̄a idem nnyịn ye eke kpukpru mbon oro ẹdibuanade ye nnyịn. Nnyịn imekeme nditịm esịt nnyịn ebe ke ndifiak n̄kot mme mbụk Bible ẹban̄ade mme akpatre usen utom ukwọrọikọ Jesus ye mme n̄kpọntịbe ẹmi ẹkedade ẹkesịm n̄kpa esie. Imekeme ndiyak ukpepn̄kpọ ubon nnyịn ediwak urua mbemiso Editi nsịn ke ndidụn̄ọde mme ibuot 112-116 ke n̄wed Akakan Owo.
4 Owo ifan̄ ke afo ọdiọn̄ọ emi ẹkpedide Editi oro edieke afo edinamde usio-ukot ndinam esịtekọm mmọ ọkọri kaban̄a usọrọ emi, ndikot mmọ, nnyụn̄ nnam mmọ ẹdiọn̄ọ ke ẹdara mmọ? Tịm udịm enyịn̄ idahaemi, nyụn̄ nam se ekemede ndin̄wam mmọ ẹdi. Ke oro ebede, n̄wam mmọ ẹka iso ẹkọri ke n̄kan̄ eke spirit ebe ke ndisịn udọn̄ nnọ mmọ ndidụk mme mbono esop kpukpru ini.
5 Ke ini Editi, ẹyenam san̄asan̄a ndutịm man ẹnam ifet kpukpru owo ndikwọrọ ikọ ọkọri. Ye eti ndutịm, nte afo emekeme ndinam usiakusụn̄ unọ un̄wam ke April? ke May? Kiet ke otu mfọnn̄kan usụn̄ ndiwụt ke nnyịn imada esịtekọm iti kpukpru se uwa Jesus ọwọrọde ọnọ nnyịn edi ke nditịn̄ mban̄a Abasi nnyịn, Jehovah, ye mme edidiọn̄ emi ukara Obio Ubọn̄ ke ubọk Eyen esie edidade edi.—Ps. 79:13; 147:1.