N̄wam Mbon En̄wen Ẹnyene Ndọn̄esịt
1 Ediwak owo ẹkpa mba ndikop mban̄a afanikọn̄, ekọn̄, ubiatibet, ye ndutụhọ. Ndọn̄esịt, okposụkedi ananade ofụri ofụri ke mbụk eyomfịn, edi n̄kpọ oro ubonowo enen̄ede oyom. Ndinọ ndọn̄esịt ọwọrọ “ndinọ ukeme ye idotenyịn” ye “ndisụhọde mfụhọ m̀mê afanikọn̄” owo en̄wen. Nte Mme Ntiense Jehovah, ẹtịm nnyịn idem ndin̄wam mme owo ke afan̄ emi. (2 Cor. 1:3, 4) Ndiye uduot n̄kpri n̄wed nnyịn ẹmi ẹkọn̄ọde ke Bible oro nnyịn idinọde ke July ye August ẹdọn̄ọ mme etop akpanikọ ẹmi ẹnọde ndọn̄esịt. (Rome 15:4) Ndusụk ekikere ndida nnọ mmọ ke nsio nsio idaha ẹdi ẹmi:
2 Akama-mmọn̄eyet mbụk n̄kpọntịbe ekeme ndinam ifet odu ndinọ ikọ ntiense nnyụn̄ nda ndọn̄esịt nsọk mbon en̄wen, ekeme ndidi ke afo nditịn̄ n̄kpọ ntem:
◼ “Ke ini mme utọ n̄kpọ oro ẹtịbede, ndusụk owo ẹsiyịk m̀mê Abasi enen̄ede odu ndien, edieke enye odude, m̀mê enye ekere aban̄a nnyịn. Nso idi ekikere fo? [Bet ibọrọ.] Usụn̄ kiet ndida mbiere m̀mê Abasi odu edi ndikama edumbet emi etịmde enyene nsọn̄ọ.” Kot Mme Hebrew 3:4. Wụt mme n̄kpọ eken oro ẹkande nnyịn ẹkụk oro nte an̄wan̄ade ẹkeyomde andinam. Ekem ka iso ete: “Mmenyene ediye uduot ekpri n̄wed emi mfiọkde ke ọyọnọ fi ndọn̄esịt. Enyịn̄ esie edi Nte Abasi Enen̄ede Ekere Aban̄a Nnyịn? [Kot mme mbụme oro ẹdude ke ikpaedem.] Enye idọn̄ọke enyene-nsọn̄ọ uyarade kaban̄a edidu Abasi kpọt edi n̄ko nte ke enye ọyọsọp ndida utịt nsọk kpukpru ukwan̄ idaha oro nnyịn isobode mfịn. Enyeemi ekeme ndidi okwo ke etịbe edide ₦15.” Diomi ndifiak n̄ka.
3 Ke afiakde aka, afo emekeme ndidọhọ ete:
◼ “Nnyịn iketịn̄ iban̄a uyarade kaban̄a edidu Abasi ke ini n̄kọnọde fi ediye uduot ekpri n̄wed oro Nte Abasi Enen̄ede Ekere Aban̄a Nnyịn? Eyedi afo ama okụt n̄kpọ emi ke page 7. [Wụt ndise oro nyụn̄ tịn̄ ikpehe ekikere 15 ibio ibio.] Emi edi uwụtn̄kpọ kiet kpọt ndiwụt nte ke anaedi Abasi emi ekerede aban̄a odu. [Kot ikpehe ekikere 27 ke page 9.] Ọkpọkpọ ukpepn̄kpọ Bible aman̄wam mi ndiyọ mme mfịna uwem ofụri usen koro enye ọnọde mme ekikere Abasi ke mme n̄kpọ.” Dọhọ ke imọn̄ inam nte ẹsinịmde ukpepn̄kpọ iwụt.
4 Ke akamade ediye uduot ekpri n̄wed “Nso Idi Uduak Uwem? Didie ke Afo Ekeme Ndikụt Enye?” afo emekeme nditịn̄ owo emi afo edide onyụn̄ ọdọhọ ete:
◼ “Ami n̄waha ndinọ fi akpan etop emi ẹnamde an̄wan̄a ke ediye uduot ekpri n̄wed emi, Nso Idi Uduak Uwem? Didie ke Afo Ekeme Ndikụt Enye?” Kot akpa ikpehe ekikere ke page 4 ke ediye uduot ekpri n̄wed emi. Bụp enyeneufọk se enye ekerede, nyụn̄ bet ibọrọ. “Bible, ke Isaiah 45:18, owụt ke ẹkebot isọn̄ ye nnyịn ke ekikere.” [Kot.] Ekem, nam uduak ediye uduot ekpri n̄wed oro an̄wan̄a nyụn̄ nọ idem kiet ke etịbe edide ₦15.
5 Ke afiakde okot, afo emekeme ndidomo usụn̄ enyeemi man ọtọn̄ọ ukpepn̄kpọ:
◼ “N̄kpama ndika iso ke nneme oro ikenyenede isan̄ oko ebe ke ndiwụt owo emi ekemede nditịn̄ uduak uwem nnọ nnyịn. [Tịn̄ ibio ibio se idude ke ikpehe ekikere 1 ye 2 ke page 6 ke ediye uduot ekpri n̄wed Uduak Uwem.] Ediyarade 4:10b anam an̄wan̄a ete ke Jehovah Abasi edi Andibot nnyịn. [Kot.] Anaedi enye ke akpanikọ ama enyene ntak ke ndibot nnyịn. Mme owo ẹmi ẹyomde ndidiọn̄ọ se oro edide ẹmekpep Ikọ Abasi oro ẹwetde-wet, kpa Bible. N̄kpama ndinọ fi ifet oro.” Nam an̄wan̄a nte isinịmde ukpepn̄kpọ Bible mfọn nnyịn, nyụn̄ nam ndutịm nditọn̄ọ ukpepn̄kpọ oro.
6 In̄wan̄în̄wan̄ usụn̄ edisobo ye owo emi ekeme ndinọ mbon ẹmi owo ima mmọ akpade ndọn̄esịt:
◼ “Ami nnam an̄wan̄wa utom ke ufọn mbon ẹmi ẹtabade owo ima mmọ ke n̄kpa. Sia emi ekemede ndidi kiet ke otu n̄kpọ emi ọsọn̄de akan oro owo nnyịn ekededi edinyenede ndiyọ, ẹtịm ediye uduot ekpri n̄wed emi, Ke Ini Owo Oro Afo Amade Akpade. Enye aman̄wam ediwak miliọn owo. N̄kpama ndiwụt fi se enye etịn̄de aban̄a aduai-owo-idem un̄wọn̄ọ emi Jesus Christ ọkọn̄wọn̄ọde. [Kot ọyọhọ ikpehe ekikere ition ke page 26, esịnede John 5:21, 28, 29.] Tịm se ndise emi odude ke page 29 owụtde mbụk Gospel aban̄ade nte Jesus ekenen̄ede anam Lazarus eset ke n̄kpa. Nyama ndikpọn̄ ọnọ-ndọn̄esịt ediye uduot ekpri n̄wed emi nnọ fi ke etịbe edide ₦15.”
7 Ke afiakde aka, afo emekeme ndifiak n̄wụt ndise oro ke page 29 ke ediye uduot ekpri n̄wed oro “Ke Ini Owo Oro Afo Amade Akpade” onyụn̄ ọdọhọ ete:
◼ “Ti nneme oro ikenemede iban̄a Christ ndikanam Lazarus eset ke n̄kpa. [Kot uwetn̄kpọ ndise ke page 28, nyụn̄ neme se ẹwetde ke idak ekpri ibuotikọ oro “Nte Emi Ama Enen̄ede Otịbe?”] Edieke ọdọn̄de fi ke esịt ndinịm nte ke afo emekeme ndifiak n̄kụt owo ima fo oro akakpade, yak n̄n̄wam fi anam idotenyịn ediset ke n̄kpa edi okwo.” Dọhọ ke imọn̄ itọn̄ọ ukpepn̄kpọ Bible.
8 Nnyịn ikpakam inam ukeme nnyịn ke mme ọfiọn̄ ẹdide ndikpebe Jesus ebe ke ‘ndidọn̄ kpukpru mme atua eyet esịt.’—Isa. 61:2.