Da Ndiye Uduot N̄kpri N̄wed Tan̄a Eti Mbụk Obio Ubọn̄
1 Nso n̄kpọ idatesịt ke edi ntem ndidiọn̄ọ akpanikọ ndinyụn̄ nsịne ke otu mbon oro ẹtan̄ade eti mbụk ifịk ifịk! Mbon ẹmi mîdụhe ke esop Abasi ẹnen̄ede ẹyom ndikop eti mbụk Obio Ubọn̄. Ẹnam akpanikọ oro aban̄ade Obio Ubọn̄ oro an̄wan̄a mmemmem mmemmem ke ndiye uduot n̄kpri n̄wed Dara Uwem ke Isọn̄ ke Nsinsi!, “Sese! Mmanam Kpukpru N̄kpọ Ẹdi Mbufa,” ye Ukara Emi Edidade Paradise Edi. Mmọ ẹwụt in̄wan̄în̄wan̄ nte uwem editiede ke isọn̄ ke idak Obio Ubọn̄ Abasi, mmọ ẹnyụn̄ ẹdụri ntịn̄enyịn andikot ẹka mme ata idem n̄kpọ Obio Ubọn̄ oro ẹnamde ẹn̄wan̄a ke Ikọ Abasi. Nte ededi, ndinịm ediye uduot ekpri n̄wed nnọ owo emi enyenede udọn̄ edi sụk ntọn̄ọ ke utom nnyịn. (1 Cor. 9:23) Ẹyak nnyịn isọsọp ifiak ika kpukpru itie oro ikonịmde n̄wed, ye uduak nditọn̄ọ ukpepn̄kpọ ke n̄wed Ifiọk Oro Adade Osịm Nsinsi Uwem. Didie ke nnyịn ikeme ndinam emi ke August?
2 Ẹkeme ndinọ ediye uduot ekpri n̄wed oro “Dara Uwem ke Isọn̄ ke Nsinsi!” ye ata ibio ibio nneme. Nte afo owụtde ikpaedem esie, emekeme ndidọhọ:
◼ “N̄kpama ndiwụt fi n̄kpọ emi esịnede inem inem etop.” Kụbọde ediye uduot ekpri n̄wed Uwem ke Isọn̄, nyụn̄ kot akpa ikpehe ekikere ntọn̄ọikọ oro. Ekem ka iso: “Enye n̄ko ọbọrọ mbụme emi [kụbọde ka ibuotikọ ke enyọn̄ ọyọhọ ndise 8]: ‘Ntak emi owo ẹsikpade?’ Afo eyekụt nte edide n̄kpọ udọn̄ ndikpep n̄kpọ mban̄a mme ndise oro nnyụn̄ n̄kot mme itien̄wed Abasi ẹdude ke ediye uduot ekpri n̄wed emi. Ke afo oyomde ndinam oro, afo emekeme ndinyene enye ke etịbe ₦25.”
3 Nso ke afo editịn̄ ke ini anamde mfiakn̄ka ke itie okonịmde ediye uduot ekpri n̄wed “Uwem ke Isọn̄” oro okonịmde? Afo emekeme ndidomo usụn̄ enyeemi nse:
◼ Wụt ọyọhọ ndise 49 ke ediye uduot ekpri n̄wed Uwem ke Isọn̄ nyụn̄ bụp ete, “Nte emi idịghe ediye ndise? [Bet ibọrọ.] Enye odu ke ediye uduot ekpri n̄wed oro n̄kọnọde fi isan̄ oko. N̄kpama ndibụp fi mbụme oro odude ke page oro etienede.” Kụbọde ka ọyọhọ ndise 50 nyụn̄ kot mbụme oro: “‘Nte afo omoyom ndidu uwem ke nsinsi ke ediye paradise oro?’ [Bet ibọrọ.] Edieke oro edide uduak fo, tịm fiọk se enye ọdọhọde ke afo ekpenyene ndinam: ‘Ntre kpep ekese ban̄a se Abasi ọdọhọde.’ [Kot John 17:3.] Nyekop inemesịt ndikpep Bible ye afo ke mfọn. Nte afo akpama oro?” Nam akpan ndutịm ndifiak n̄ka.
4 Ke ini ọnọde ediye uduot ekpri n̄wed oro “Sese! Mmanam Kpukpru N̄kpọ Ẹdi Mbufa,” afo emekeme nditọn̄ọ ke nditat ofụri ndise ikpaedem n̄wụt nnyụn̄ mbụp ete:
◼ “Afo ekere ke oyom nso man ẹnam ofụri isọn̄ etie ntem?” Bet ibọrọ. Tịn̄ ban̄a ndusụk ikpehe ndise oro, emi ẹbụkde ke page 3. Ekem dọhọ: “Ata ediwak owo ẹkere ke owo ikemeke ndinam ererimbot etie ntem. Edi enye idịghe se Abasi mîkemeke ndinam. [Buana mme akpan n̄kpọ ẹdude ke ikpehe ekikere 43; ekem kot Isaiah 9:6, 7.] Abasi ọmọn̄wọn̄ọ ndida obufa ererimbot ndi emi mme owo ẹtode kpukpru idụt ẹdidarade utịbe utịbe paradise. N̄kpama fi okot ediye uduot ekpri n̄wed emi. Enye eyewụt nte afo ye ubon fo ẹkemede ndidara utịbe utịbe ini iso oro Abasi edinamde.”
5 Ke mfiakn̄ka, afo emekeme ndikama ediye uduot ekpri n̄wed “Sese!” ndinam an̄wan̄a ntak oyomde ẹkpep n̄kpọ efen efen ẹban̄a Bible. Emekeme ndifiak n̄wụt ikpaedem oro onyụn̄ ọdọhọ:
◼ “Akpa ini n̄kowụtde fi ndise emi, nnyịn ima inyịme ite ke nnyịn ikpama ndidu uwem ke utọ utịbe utịbe ererimbot oro. Man ẹkeme ndinam emi, odu n̄kpọ oyomde kpukpru nnyịn inam.” Kụbọde ediye uduot ekpri n̄wed “Sese!” ka ikpehe ekikere 52; kot ikpehe ekikere oro ye itien̄wed oro ke John 17:3. Buan ntọt oro ye uwụtn̄kpọ oro odude ke ikpehe ekikere 53 aban̄ade nnennen ukpep Bible, ndien ekem nam an̄wan̄a nte ke Mme Ntiense Jehovah ẹsinọ utọ ukpep oro ke mfọn ke ufọk. Ke adade n̄wed Ifiọk, dọhọ ke imọn̄ inam nte isinịmde ukpepn̄kpọ nnyịn iwụt.
6 Ke ini ọnọde ediye uduot ekpri n̄wed oro “Ukara Emi Edidade Paradise Edi,” afo emekeme ndidomo nditịn̄ emi:
◼ “Mmokop ediwak owo ẹdọhọde ke mmimọ ikpama ndidu uwem ke idak ukara oro ekemede ndikọk ikpọ mfịna oro nnyịn isobode mfịn. [Siak mme mfịna n̄kann̄kụk utọ nte unana utom, ubiatibet oro ọkọride-kọri, m̀mê edida n̄kpọsọn̄ ibọk ke idiọk usụn̄.] Mme n̄kpọ ẹmi ẹnam nnyịn ikop ndịk iban̄a ini iso nnyịn ye eke mbonima nnyịn. Nte afo emekere ke tutu amama ukara eyedu emi edikọkde mme mfịna ẹmi? [Bet ibọrọ.] Eyedi afo emesibọn̄ Akam Ọbọn̄. Ke edide ntre, ndi afo ama ọdiọn̄ọ ke afo esinen̄ede ọbọn̄ akam oyom edinen ukara?” Kụbọde ka page 3 ke ediye uduot ekpri n̄wed Ukara, nyụn̄ kot akpa ikpehe ekikere iba. Nọ ediye uduot ekpri n̄wed oro.
7 Edieke okonịmde ediye uduot ekpri n̄wed oro “Ukara Emi Edidade Paradise Edi,” afo emekeme nditọn̄ọ nneme ke mfiakn̄ka ke ndidọhọ:
◼ “Ke akpa nnyịn ima ineme iban̄a udọn̄ oro odude kaban̄a edinen ukara emi ekemede ndikọk mme mfịna owo. Ediye uduot ekpri n̄wed oro n̄kọnọde fi anyan ubọk owụt Obio Ubọn̄ Abasi nte n̄kukụre idotenyịn nnyịn. Ndusụk owo ẹsikere se ukara oro edikemede ndinam man ofori idaha nnyịn ke uwem. Bible owụt ke Christ ama owowụt ke imọ iyekụt unen ke ebiet emi mme adaiso ukara ẹdide owo ẹkpude.” Kụbọde ediye uduot ekpri n̄wed Ukara ka page 29, nyụn̄ kot akpatre ikpehe ekikere inan̄. Ekem dọhọ ete: “Nte oro idịghe utịbe utịbe ini iso? Nte afo akpama ndikụt enye?” Bet ibọrọ. Kot John 17:3. Sịn udọn̄ nọ edibọ ukpep efen efen ebe ke ukpepn̄kpọ Bible.
8 Edieke afo akamade ndiye uduot n̄kpri n̄wed eken, afo emekeme nditịm mme nneme idemfo, adade mme ekikere oro ẹnọde ke enyọn̄ emi nte mme uwụtn̄kpọ. Tịm idem mfọn mfọn nyụn̄ yom edidiọn̄ Jehovah nte afo atan̄ade eti mbụk Obio Ubọn̄.