Nditịm Idem nnọ Mme Mfiakn̄ka Oro Ẹnyenede Uforo
1 Jesus ọkọdọhọ mme anditiene enye ete: “Mbufo ẹka ẹkenam kpukpru mme idụt ẹdi mbet Mi, . . . ẹnyụn̄ ẹkpep mmọ ẹnam kpukpru n̄kpọ eke n̄ketemede mbufo.” (Matt. 28:19, 20) Ẹnam utom edikpep mbufa mbet emi ebe ke edinam mme mfiakn̄ka ye edinịm mme ukpepn̄kpọ Bible. Anaedi mbon oro ẹkewụtde udọn̄ ke n̄wed Akakan Owo ke akpa ini oro afo akawahade etiene mmọ ẹyenem esịt ndifiak n̄kụt fi. Edieke afo ebemde iso anam ndutịm, otịmde idem ọfọn onyụn̄ odiomide ndinam mme mfiakn̄ka oro ẹnyenede uforo, afo emekeme nditọn̄ọ nnyụn̄ nnịm mme ukpepn̄kpọ Bible.
2 Edieke afo ekenemede ikpehe ekikere 2 ye 3 ke ntọn̄ọikọ n̄wed “Akakan Owo,” afo emekeme ndidọhọ:
◼ “Isan̄ oko n̄kedide mi, nnyịn ima ineme akpan n̄kpọ oro nte ke Jesus Christ ekedi akakan owo oro akanam odude uwem. Ikpọ ndidem ye mme ewetmbụk n̄ko ẹnyịme ẹte ke Jesus ekedi akakan owo oro akanam odude uwem. Edi nso ikanam enye edi akakan owo? [Bet ibọrọ.] Jesus akanam kpukpru n̄kpọ ukem nte Ete esie, kpa Ata Ọkpọsọn̄ Abasi, akpakanamde. (Kot John 14:9, 10.) Enye ndikpebe Abasi ke mfọnmma usụn̄ akanam enye edi akakan owo. Edi ewe mme edu Abasi ke Christ okowụt?” Kụbọde ka ntọn̄ọikọ nyụn̄ neme ndusụk akpan n̄kpọ ke ekpri ibuotikọ oro “Se Ikanamde Enye Edi Akakan.” Nam ndutịm nọ edifiak n̄ka fo efen.
3 Edieke afiakde aka man akaiso ke nneme aban̄ade itie edikara eke Jesus Christ, afo emekeme ndidọhọ:
◼ “Nnyịn ima inyịme ke nneme nnyịn isan̄ oko nte ke ẹma ẹmek Jesus Christ ndikara ererimbot. Edi ntak emi Jesus edidide mfọnn̄kan andikara oro ererimbot akanam enyenede? [Bet ibọrọ.] Enye asasua ukwan̄ikpe onyụn̄ ama se inende. (Kot Mme Hebrew 1:9.) Ke ini okodude ke isọn̄ enye ama owụt ke ekpri udomo se enye edinamde nte Edidem ke isọn̄. Enye ama ọkọk mbon udọn̄ọ, ọnọ mbon ọbiọn̄ udia, onyụn̄ akam anam mme akpan̄kpa ẹset. Akan oro, enye n̄ko ama enyene odudu oro akande eke owo ndinam mme afanikọn̄ ẹtre. Nte odu andikara ekededi oro ekemede ndinyene ukeme nte enye? [Bet ibọrọ.] Nnyịn imekeme ndikpep ekese mban̄a andikara emi okponde akan owo mi ke ibuot 53.” Ekem neme ndusụk ikpehe ekikere nyụn̄ dọhọ ke iyefiak iwaha.
4 Afo emekeme nditọn̄ọ nneme ke usụn̄ emi ye owo oro enyenede udọn̄ ndinyene n̄kpet n̄kpet itie ebuana ye Jesus:
◼ “Isan̄ oko n̄kawahade mi, nnyịn ima ikot John 17:3. Nnyịn imọfiọk ke oyom inyene nnennen ifiọk man otodo inyene n̄kpet n̄kpet itie ebuana ye Jesus Christ ye Ete esie eke heaven. Ke uwụtn̄kpọ, nte afo ọmọfiọk ntak emi Jesus okotode ke heaven osụhọde edi? [Bet ibọrọ.] Ediwak owo ẹsibọrọ ẹte ke enye ekedi man edifak nnyịn osio ke idiọkn̄kpọ ye n̄kpa. Edi akpanikọ! Nte ededi, odu akpan ntak efen oro akanamde Jesus edi isọn̄. (Kot Luke 4:42, 43.) Enye ekedi akpan akpan man edikwọrọ ikọ onyụn̄ ekpep mbon efen aban̄a Obio Ubọn̄ Abasi.” Neme ndusụk akpan n̄kpọ ban̄a Obio Ubọn̄ ke ibuot 133. Edieke ekemede, tọn̄ọ ukpepn̄kpọ Bible.
5 Edieke afo afiakde etiene owo emi afo akadade nnennen usụn̄ edisobo ye owo ọtọn̄ọ ukpepn̄kpọ Bible, emekeme nditọn̄ọ nneme fo ke usụn̄ emi:
◼ “Isan̄ oko n̄kawahade edem fo, nnyịn ima ineme iban̄a m̀mê ‘Anie ke Jesus Enen̄ede Edi?’ ke n̄wed Akakan Owo Oro Akanam Odude Uwem, ibuot 59. Afo eyeti ete ke edi Jesus okobụp mme mbet esie mbụme emi. N̄waha idahaemi man nneme akpatre ikpehe ke ibuotikọ oro ye afo. Enye ayarade mme ntọt efen efen aban̄a enyeemi Jesus ekenen̄erede edi.” Afo emekeme ndikaiso ke nneme fo ye enyeneufọk.
6 Owo kiet ke ama okokot n̄wed emi ama, ọkọdọhọ ete: “Edi mfọnn̄kan n̄wed oro akananam n̄kotde! Enye ama okpụhọde uwem mi.” Ndinam mfiakn̄ka oro enyenede uforo nnọ mbon oro ẹkewụtde udọn̄ ke n̄wed Akakan Owo ekeme ndida nti utịp ndi ke efakutom mbufo.