Nam Ẹkụt N̄kọri Fo
1 Kere fiak edem ka akpa ini emi afo okokopde etop Obio Ubọn̄. Ekpri akpanikọ ama edemede udọn̄ fo kaban̄a ifiọk ye asian. Ikebịghike afo ama okụt ke oyom anam mme ukpụhọde ke usụn̄uwem fo koro mme usụn̄ Jehovah ẹkon̄de etieti ẹkan mme usụn̄ fo. (Isa. 55:8, 9) Afo ama anam n̄kọri, ayak uwem fo ọnọ, onyụn̄ ana baptism.
2 Idem ke ama akanam ndusụk n̄kọri eke spirit, mme mmeme oro oyomde akan ẹkesụk ẹdodu. (Rome 12:2) Ekeme ndidi afo ama esifehe owo enyịn, emi akanamde afo emen̄e ndibuana ke utom ukwọrọikọ. Mîdịghe, ekeme ndidi afo ekenyene mmeme edision̄o mbun̄wụm spirit Abasi. Utu ke ndision̄o idem n̄kpọn̄, afo ama ebiere ndinam n̄kọri ebe ke ndinịm mme utịtmbuba ukara Abasi nnọ idemfo.
3 Ekeme ndidi ndusụk isua ẹbe idahaemi tọn̄ọ nte afo akayak idem ọnọ. Ke afiakde ese edem, nso n̄kọri ke afo okụt ke idemfo? Nte afo omosịm ndusụk utịtmbuba fo? Nte afo ke enyene ukem ifịk oro afo ‘ekenyenede ke editọn̄ọ’? (Heb. 3:14) Timothy ama ededi Christian oro ọkọride osịm ọyọhọ idaha enyenede ediwak isua ifiọkutom ke ini Paul ọkọdọhọde enye ete: “Tịn̄ enyịn nam mme n̄kpọ ẹmi; sịn idem ke esịt ofụri ofụri; man kpukpru owo ẹkụt n̄kọri fo ke eti ido.”—1 Tim. 4:15.
4 Oyom Ndụn̄ọde Idemowo: Ke ini nnyịn ikerede iban̄a akani usụn̄uwem nnyịn, ndi nnyịn imokụt ite ke nnyịn ke isụk inyenyene ndusụk mmeme oro nnyịn ikenyenede ke ini ikọtọn̄ọde? Nte nnyịn imokpu ndisịm ndusụk utịtmbuba oro nnyịn ikonịmde? Edieke edide ntre, ntak-a? Idem okposụkedi nnyịn ikenyenede nti uduak, ekeme ndidi nnyịn ima isịk enye inịm. Ekeme ndidi nnyịn imayak editịmede esịt uwem emi m̀mê mme mfịghe eke editịm n̄kpọ emi ẹdụri nnyịn ẹfiak edem.—Luke 17:28-30.
5 Ke adan̄aemi nnyịn mîkemeke ndinam n̄kpọ mban̄a se ikebede, nnyịn ke akpanikọ imekeme ndinam n̄kpọ mban̄a ini iso. Nnyịn imekeme ndidụn̄ọde idem nnyịn ke esịt akpanikọ, ifiọk ebiet emi nnyịn mînamke ọfọn, ndien ekem isịn ifịk ifịk ukeme ndinam n̄kọri. Ekeme ndiyom nnyịn inam ọfọn akan ke ndision̄o mbun̄wụm spirit Abasi, utọ nte mfara ke idem, ifụre ifụre ido, m̀mê ime. (Gal. 5:22, 23) Edieke nnyịn inyenede mfịna ke ndinam n̄kpọ ye mbon efen m̀mê ke ndidiana kiet ye mbiowo, edi akpan n̄kpọ nnyịn ndikọri nsụhọdeidem ye nsụkesịt.—Phil. 2:2, 3.
6 Nte nnyịn imekeme ndinam ẹkụt n̄kọri nnyịn ebe ke ndinyanade mbịne mme ifetutom? Ye ukeme efen efen nditọete irenowo ẹkeme ndidot nte mme asan̄autom unamutom m̀mê mbiowo. Ndusụk owo ke otu nnyịn ẹkeme ndisịn enyịn̄ nte mme asiakusụn̄ ofụri ini. Ye ediwak owo efen, usiakusụn̄ unọ un̄wam ekeme ndidi utịtmbuba oro ẹkemede ndisịm. Mbon eken ẹkeme ndin̄wana ndifori edu ọkpọkpọ ukpepn̄kpọ mmọ, ẹkabade ẹdi mme andibuana ifịk ifịk ke mme mbonoesop, mîdịghe ẹdi mme asuanetop esop oro ẹnen̄erede ẹn̄wụm mfri.
7 Nte ededi, edi mbiomo nnyịn owo kiet kiet ndibiere ebiet emi oyomde nnyịn inam n̄kọri. Nnyịn imekeme ndinịm ke akpanikọ nte ke ukeme ofụri esịt nnyịn ‘ndibịne ifiọk eke ọfọnde ama’ eyetịp n̄kpọ akamba akamba esịn ke idatesịt nnyịn onyụn̄ anam nnyịn idi mme andibuana ke esop oro ẹnen̄erede ẹn̄wụm mfri.—Heb. 6:1.