Ẹsịn Esịt ke N̄kpọ Enyọn̄
1 Ke etịn̄de n̄kpọ aban̄a emana oro akande nnyịn okụk ye ekikere mmọ kaban̄a ini iso, ibuotikọ kiet ke The New York Times eke December 31, 1994, ọkọdọhọ ete: “Mmọ ẹkop ndịk ẹban̄a ini iso. Mmọ ẹkop ndịk ke ntak utom, ke ntak udọn̄ọ, ke ntak ndutịm uforo, ke ntak mme idaha ererimbot.” Ebiet ekededi oro nnyịn isede, ekikere unana idotenyịn odu kaban̄a uwem. Utom ukwọrọikọ nnyịn nte Mme Ntiense Jehovah esinam nnyịn isobo mme owo oro ẹkerede n̄kpọ ke usụn̄ emi ke usen ke usen. Ke adan̄aemi nnyịn isobode mme ukem mfịna oro mmọ ẹsisobode, mbuọtidem ye idotenyịn nnyịn ke mme un̄wọn̄ọ akpanikọ eke Ikọ Abasi ẹn̄wam nnyịn ndinyene ekikere oro edide ata isio isio kaban̄a uwem ye ini iso ubonowo.—Isa. 65:13, 14, 17.
2 Ekikere nnyịn kaban̄a idotenyịn oro enyenede nsọn̄ọ anam ediwak owo oro ẹnyenede esịt-akpanikọ ẹkpan̄ utọn̄ ẹnọ etop oro nnyịn idade isọk mmọ. Ediwak owo oro ẹkopde mfụhọ ye editịmede esịt ẹsikop ndọn̄esịt ndineme nneme ye nnyịn. Sia mmọ ẹsimade se ẹsikopde, ndusụk mmọ ẹnyịme ndikpep Bible ye nnyịn. Nte ededi, ndusụk ini, mme owo ẹkeme ndiyom ndibem iso ntịn̄ ọkpọkpọ mfịna mmọ man efịghede mmọ ke esịt. Ke adan̄aemi ikemede ndibiat ndusụk ini n̄kpan̄ utọn̄ nnọ ọkpọkpọ mfịna owo, nnyịn ikpenyeneke ndifre uduak nnyịn, emi edide ndikpep mme owo in̄wan̄în̄wan̄ akpanikọ Ikọ Abasi.
3 Nnyịn imoyom ndiwụt mbon oro ẹkopde iduọesịt mbọm. Jesus ama onịm uwụtn̄kpọ ke ini enye ọkọdọhọde, nte ẹwetde ke Matthew 11:28, ete: “Ẹtiene Mi, kpukpru mbufo ẹmi ẹkpade mba ẹnyụn̄ ẹbiomde edidobi mbiomo.” Nnyịn iyom ndisịn udọn̄ nnọ mme owo ke ukem usụn̄ oro. Nte ededi, fiọk ete ke utịt ufan̄ikọ 28, Jesus ọkọdọhọ ete: “Ami nyenọ mbufo nduọkodudu.” Oro ekpedi uduak nnyịn. Nnyịn inam oro ebe ke ndibuana mme inem inem un̄wọn̄ọ ẹtode Ikọ Abasi. Ndidi eti andikpan̄ utọn̄ owụt ọkpọkpọ udọn̄ ye edikere mban̄a nnyịn onyụn̄ edi akpan n̄kpọ ke ndiyọhọ utom ẹnọde nnyịn ẹte ikwọrọ eti mbụk Obio Ubọn̄, in̄wamde mbon efen ẹfiọk ẹte ke Obio Ubọn̄ edi n̄kukụre ata usọbọ kaban̄a kpukpru mfịna ubonowo.—Matt. 24:14.
4 Utom nnyịn idịghe eke nta mme ese n̄kpọ mban̄a nsọn̄idem. Utu ke oro, enye edi nte apostle Paul akanamde an̄wan̄a, nte ẹwetde ke 1 Timothy 4:6, utom ukwọrọikọ oro owụkde ntịn̄enyịn ke “eti ukpepn̄kpọ,” ukpepn̄kpọ oro ẹdude ke Ikọ Abasi. Ekeme ndiyom ẹsịn udọn̄ ẹnọ mbon oro ẹnyenede ọkpọkpọ mfịna m̀mê eke ntụk ẹte ẹberi edem ke Jehovah. Kpep mmọ “ẹsịn esịt ke n̄kpọ enyọn̄”—mme n̄kpọ oro ẹnyenede ebuana ye idotenyịn Obio Ubọn̄. (Col. 3:2) Ke ini mme owo ẹwụkde ntịn̄enyịn mmọ ke Ikọ Abasi, mmọ ẹkeme ndikọri nte utịp odudu emi enye enyenede ke uwem mmọ.—Heb. 4:12.
5 Ntre utịtmbuba nnyịn edi ndin̄wam mme owo ẹwụk ekikere mmọ ke mme n̄kpọ oro ‘ẹnende, ẹsanade, ẹdotde ẹte ẹma, ẹnyụn̄ ẹwọrọde eti etop.’ (Phil. 4:8) Edieke mmọ ẹwụkde ntịn̄enyịn ke idotenyịn Obio Ubọn̄, ẹyediọn̄ mmọ ke ukem usụn̄ oro ẹdiọn̄de nnyịn. Mmọ n̄ko ẹyenyene idatesịt oro asan̄ade ye ifiọk oro nte ke Jehovah ke akpatre eyekọk kpukpru mfịna mmọ ebe ke Obio Ubọn̄ esie.—Ps. 145:16.