Kpukpru N̄wed Abasi Ẹfọn Ndida N̄kpep Owo N̄kpọ
1 Mme ekikere ẹnyenede ẹban̄a ufọn oro Bible enyenede ẹwak ẹnyụn̄ ẹdi nsio nsio. Nte ededi, nnyịn imenyene mbuọtidem nte ke ibọrọ kaban̄a mme awak-n̄kukọhọ mfịna ubonowo ọkọrọ ye ndausụn̄ oro ẹkemede ndiberi edem ke ọkpọkpọ usụn̄uwem ẹdu ke esịt esie. (N̄ke 3:5, 6) Ọniọn̄ emi odude ke item esie inyeneke mbiet. Idụhe mme idaha oro ẹkande mme idaha ido uwem oro enye ọnọde. Etop esie okop odudu, “enyene ukeme ndidụn̄ọde ekikere ye uduak esịt owo.” (Heb. 4:12) Didie ke nnyịn ikeme ndin̄wam mbon efen ẹkụt ufọn edidorode n̄wed emi ke itie unịmn̄wed mmọ nnyụn̄ ntịn̄ enyịn ndụn̄ọde enye? Ekeme ndidi afo ayama ndidomo ndusụk ke otu ekikere ẹtienede mi ke ini ọnọde N̄wed Mi eke Mme Mbụk Bible ke November. Ẹtịm n̄wed emi akpan akpan ẹnọ nditọwọn̄, kpa ye oro kpukpru owo ẹkeme ndibọ ufọn ntọ mbụk 116 ẹdude ke n̄wed emi.
2 Sia ediwak owo ẹkpemade ndifiọk se Bible etịn̄de, afo emekeme ndida usụn̄ edisobo enyeemi ye owo:
◼ “N̄wedmbụk n̄kpọntịbe kiet ọkọtọt ete: ‘Ediwak Christian ẹfiọk esisịt n̄kpọ ẹban̄a Bible.’ Owo efen ọkọdọhọ ete: ‘Bible edi ndịben̄kpọ, n̄wed oro owo mîkewetke man an̄wan̄a owo.’ Nso idi ekikere fo? Nte ẹkewet Bible man an̄wan̄a owo?” Bet ibọrọ. Kot Joshua 1:8 nyụn̄ kaiso: “Owụt eti ibuot nte ke Bible ekpenyene ndin̄wan̄a owo. Emi edi akpan n̄kpọ. Afo emekeme ndinyene akpan ifiọk Bible ye un̄wam n̄wed emi N̄wed Mi eke Mme Mbụk Bible. Enye edi mmemmem editịn̄ se idude ke Bible ibio ibio.” Kot ikpehe ekikere 2 ye 3 ke ntọn̄ọikọ nọ enyeneufọk, nyụn̄ nọ n̄wed emi ke etịbe oro ẹsinọde.
3 Ekikere efen oro afo ekemede ndikere mban̄a edi emi:
◼ “Kpukpru ini oro nnyịn ikotde n̄wedmbụk m̀mê ikpan̄de utọn̄ ke mbụk nnyịn imesikop akama-mfụhọ mfịna efen oro anamde nnyịn ikop editịmede esịt. [Siak ndusụk n̄kpọntịbe oro ẹtịmerede owo ekikere ẹmi ẹtọtde ndondo emi ke mbụk.] Nte mme mfịna ẹmi ẹyetre tutu amama? [Bet ibọrọ.] Yak n̄wụt fi ntak emi nnyịn ikemede ndinyene mbuọtidem ke Bible.” Wụt ndusụk akpan n̄kpọ ke tract oro Ntak Afo Ekemede Ndiberi Edem ke Bible. Nọ N̄wed Mi eke Mme Mbụk Bible nyụn̄ nam ediomi ndifiak n̄ka nte ini akade man ekeneme ọyọhọ Mbụk 114.
4 Sia ediwak owo ẹmehede ye mme utịben̄kpọ Jesus, afo emekeme ndida usụn̄ edisobo enyeemi ye owo:
◼ “Ediwak owo ẹnen̄ede ẹmehe ye mme utịben̄kpọ oro Jesus akanamde ke ini utom ukwọrọikọ esie mi ke isọn̄. Edi nte odu mme ukpepn̄kpọ oro nnyịn ikemede ndikpep nto mme utịben̄kpọ ẹmi?” Bet ibọrọ. Kụbọde ka ọyọhọ Mbụk 96 nyụn̄ tịn̄ akpan n̄kpọ ẹdude. Nam an̄wan̄a nte ke mme utịben̄kpọ oro Jesus akanamde ẹma ẹkan ediwụt odudu ke usụn̄ oro aduaide owo idem. Mmọ ẹma ẹsịn udọn̄ ẹnọ edinam nti n̄kpọ, ediwụt ntatubọk, ye ediwụt mbọm. Ke edide akpan n̄kpọ akan, mmọ ẹma ebem iso ẹwụt se enye edinamde ke ini Ukara Tọsịn Isua esie. Nọ n̄wed emi ke etịbe oro ẹsinọde, nyụn̄ dọhọ ke iyefiak idi kaban̄a n̄kaiso nneme.
5 Akwa Anditeme nnyịn okụt ete ke ifiọk uduak esie odu ọnọ kpukpru owo. Da N̄wed Mi eke Mme Mbụk Bible n̄wam mbon oro ẹyomde ndikpep n̄kpọ. Ndin̄wam mbon efen ẹkụt ata ufọn oro Bible enyenede edi kiet ke otu mfọnn̄kan n̄kpọ oro nnyịn ikemede ndinam nnọ mmọ; emi ekeme ndinyan̄a uwem mmọ.—N̄ke 1:32, 33.