Eduuwem Christian ke Ufọkn̄wed
1 Edieke afo edide uyen Christian emi osụk odude ke ufọkn̄wed, oyom afo enyene ọkpọsọn̄ mbuọtidem man omụm nsọn̄ọnda fo akama. Ẹsio fi ẹnyan ẹnọ ndiọi nsan̄a ye mme idaha oro ẹkemede ndisịn mbuọtidem fo ke udomo. Edi akpan n̄kpọ afo ndida item Peter emi ọdọhọde ete “ẹkama idem nte odotde ke iso mme Gentile, man . . . mmọ ẹkpeda nti ido mbufo, ẹmi ẹdikụtde ke ini eke ẹdide ndidomo mbufo nse, ẹnọ Abasi ubọn̄” nsịn ke edinam. (1 Pet. 2:12) Oyom afo enyene uko ye iwụk man akan n̄kpọ-ata emi.
2 Ke esịt ufọkn̄wed m̀mê ke ọwọrọde ọkpọn̄ ufọkn̄wed, mbiara odudu idan̄ mbemiso ndọ, ndek ndek ikọ, edida un̄wọn̄, ye edida n̄kpọsọn̄ ibọk ke idiọk usụn̄ ẹkan fi ẹkụk. Kpukpru usen, afo osobo mme idomo oro ẹn̄wanade ndibiat eti eduuwem fo. Ukem nte ikpọ owo, ana afo ‘ọsọn̄ọ an̄wana kaban̄a ikọ mbuọtidem’ edieke afo ediyọde mme utọ idomo oro.—Jude 3; se Enyọn̄-Ukpeme eke July 15, 1991, page 23-26.
3 Ke ufọkn̄wed, ẹsinam mme usọrọ ufreidụt ye mme usen nduọkodudu ererimbot. Nte afo ọmọfiọk mme usen nduọkodudu idụt ye eke ido ukpono oro ẹsinịmde ke ufọkn̄wed mbufo? Edieke mme idaha oro ẹdomode mbuọtidem ẹdemerede, nte afo emekeme ‘nditịn̄ enyịn nnyene esịt eke asanade, man mmọ eke ẹsuede eti uwem fo ke Christ ẹkpedia bụt’?—1 Pet. 3:16.
4 Mme mbre mbuba ye mme mboho unọ idem inemesịt ufọkn̄wed ẹkeme ndidi n̄kpọ etabi nnọ fi. Ana afo odu ke edidemede man ọfiọk nte mme edinam ẹmi ẹtiede nte se inọde inemesịt mi ẹkemede ndibiat mbuọtidem fo. Oyom afo emek mme nsan̄a ẹmi afo ekemede ‘nditiene n̄kop ndọn̄esịt,’ emi mbuọtidem kiet edibọpde eke enye eken.—Rome 1:12.
5 Afo Emekeme Ndiyọ, ye Un̄wam Jehovah: Satan odomo mbuọtidem fo kpukpru ini. Idomo oro anade afo ọyọ ẹkeme ndisọn̄ ubọk, edi utịp oro edibọde odot ofụri ukeme oro esịnde. (1 Pet. 1:6, 7) Afo ukemeke ndiyọ ke idemfo uforo uforo; ana afo eberi edem ke Jehovah kaban̄a un̄wam. Jesus ama akpak mme mbet esie ete: “Ẹkpeme, ẹnyụn̄ ẹbọn̄ akam, mbak mbufo ẹdidụk ke idomo.” (Matt. 26:41) Ntụnọ ye mfara ke idem ẹdi akpan n̄kpọ.—1 Cor. 9:27.
6 Kpukpru ini ti ete ke imọ inyene ndinam ibat nnọ Jehovah kaban̄a eduuwem imọ. (Eccl. 11:9) Idem okposụkedi ekemede ndidi mbon en̄wen ikwe se afo anamde, Jehovah ọfiọk se afo anamde ndien eyekpe ikpe ọnọ fi. (Heb. 4:13) Udọn̄ esịt akpanikọ ndinem enye esịt ekpenyene ndinụk fi ‘ndisan̄a ke ndịk ye nnyekidem nnam edinyan̄a fo ọwọrọ usụn̄.’ (Phil. 2:12) Ndikot Ikọ Abasi ke usen ke usen edi akwa un̄wam. Enye ọyọhọ ye ata nti item ye nti uwụtn̄kpọ oro ẹkemede ndikpebe.—Heb. 12:1-3.
7 Mme ete ye eka, mbufo ẹmenyene akpan utom. Oyom mbufo ẹse nditọ mbufo enyịn, ẹfiọk mme mfịna oro mmọ ẹsobode, ẹnyụn̄ ẹnọ un̄wam ke ini ẹyomde. Nte mbufo ẹmenyene eti itie ebuana ye nditọ mbufo? Nte mbufo ẹmenam mmọ ẹkọri esịtekọm ẹban̄a edifiọk mme mbet ye mme edumbet Abasi? Ke ini ẹsobode mfịghe ye mme idomo, nte nditọ mbufo ẹsisọn̄ọ ẹda, mîdịghe nte mmọ ẹsisọsọp ẹkpa mba? Nte mmọ ẹsikop mmemidem koro mmọ ẹnyenede ndidi isio ye ubọkn̄ka mmọ? Nte ete ye eka, mbufo ẹmenyene mbiomo ndin̄wam mmọ. (Deut. 6:6, 7) Edieke mbufo ẹtịmde ẹnam utom mbufo, mbufo ẹmekeme ndin̄wam mmọ ẹdi mme andikan ke en̄wan mbuọtidem.—N̄ke 22:6.