Obufa Ndutịm Mbono Circuit
1 Ọtọn̄ọde ke January, ibuotikọ mbono circuit edidi “Ẹkop Ẹnyụn̄ Ẹkpep Ndinịm Ikọ Abasi.” Ibuotikọ emi, emi ọkọn̄ọde ke Deuteronomy 31:12, 13, ọnọ isọn̄ oro odotde kaban̄a ofụri ndutịm oro man owụt mme ukpepn̄kpọ oro oyomde nnyịn ikpep inyụn̄ ida isịn ke edinam.
2 Okposụkedi ata ediwak owo mfịn ẹkpan̄de utọn̄ ẹnọ mme spirit abian̄a, enen̄ede oyom nnyịn owo kiet kiet ikpan̄ utọn̄ inọ Ikọ Abasi inyụn̄ ikpep ndinam enye. (Luke 11:28; 1 Tim. 4:1) Ye emi ke ekikere, ẹnam ndutịm mbono circuit emi man ọnọ mme asuanetop, mme ubon, mbiowo, ye mme asiakusụn̄, nsịnudọn̄ ye un̄wam. Ke Saturday, nneme edide ikpehe inan̄ eyedu ke ibuotikọ emi “Ndiyọ Mme Mfịna Nnyịn—Ebe ke Ndibiọn̄ Utọn̄ ke Ikọ Abasi.” Ndien ke usenubọk Sunday, nneme eyedu oro ibuotikọ edidide “Nte N̄wed Abasi Ọnọde Ntụnọ ke Edinen Ido.” Ofụri ndutịm oro eyenọ nsịnudọn̄ eke spirit oro mînaha afo ye ubon fo ẹtaba.
3 Ke Saturday ye Sunday, ẹyenọ nti ekikere kaban̄a utom ukwọrọikọ ẹnyụn̄ ẹnanam ẹwụt. Ẹyenọ mme ifiọkutom n̄ko ẹnyụn̄ ẹnam mme ndụn̄ọde oro ẹsịnede item. Ntem, ke ndidu do nnyụn̄ nnọ n̄kpan̄utọn̄ ye ekikere edida se afo ekpepde nsịn ke edinam, afo eyedu ke eti idaha ndinam mme ewụhọ Ikọ Abasi ọyọhọ ọyọhọ.
4 Kiet ke otu akpan n̄kpọ mbono circuit oro edidi baptism nditọete iren ye iban oro ẹyakde idem ẹnọ obufa obufa. Anyanini mbemiso an̄wan̄wa uyarade uyakidem mmọ emi, mbon oro ẹdinade baptism mi ẹkpenyene nditịn̄ udọn̄ mmọ nnọ esenyịn oro etiede ibuot man otode enye anam ndutịm ọnọ mbiowo ndisobo ye mmọ.
5 Ibuotikọ utịn̄ikọ an̄wa eke udịm udịm mbono circuit emi edi “Ntak Ayakde Bible Ada Fi Usụn̄-ọ?” Kot mbon oro ẹnyenede udọn̄ ẹdidụk. Ye idotenyịn kaban̄a ekese nsịnudọn̄ ye un̄wam oro ẹyomde oro afo ye ubon fo ẹdibọde, ẹnam ndutịm oro enyenede iwụk ndidu do ke ofụri ndutịm oro.