Mme Mbụme Oro Mme Andikot Ẹbụpde

Ini Satan ọkọdọhọde Eve ke enye idikpaha enye akpadia mfri eto ifiọk eti ye idiọk, ndi ukpepn̄kpọ ukpọn̄ ikpaha ke nsinsi emi ata ediwak owo ẹnịmde ke Satan ọkọtọn̄ọ oro?

Se enye eketịn̄de iwụtke ntre. Devil ikọdọhọke Eve ke enye akpadia mfri eto emi Abasi ọkọdọhọde mmọ ẹkûdia, ke idem esie kpọt edikpa, edi n̄kpọ efen ke idem esie emi owo mîkemeke ndikụt (emi ndusụk owo ẹdọhọde ke edi ukpọn̄ emi mîkemeke ndikpa) ayaka iso odu uwem ke ebiet efen. Ini Satan akadade urụkikọt etịn̄ ikọ ye Eve, enye ọkọdọhọ ke Eve akpadia mfri eto oro, ke ‘enye idikpaha’ tutu amama. Ikọ esie ọkọwọrọ ke enye ayaka iso odu uwem, okop inem uwem ke isọn̄ akan nte enye okokopde oro, inyụn̄ isịneke aba ke idak Abasi.—Gen. 2:17; 3:3-5.

Edieke nsunsu ukpepn̄kpọ ukpọn̄ ikpaha ke nsinsi emi mme owo ẹsikpepde mîkọtọn̄ọke ke In̄wan̄ Eden, ini ewe ndien ke ọkọtọn̄ọ? Nnyịn idiọn̄ọke akpan ini emi ọkọtọn̄ọde. Edi imọdiọn̄ọ ke ẹma ẹsobo kpukpru nsunsu utuakibuot ẹfep ke Ukwọ eyo Noah. Owo ndomokiet ikemenke nsunsu ukpepn̄kpọ ekededi ibe Ukwọ oro sia Noah ye ubon esie kpọt ẹkebọhọ, mmọ ẹkenyụn̄ ẹkpono ata Abasi.

Ntre anaedi ukpepn̄kpọ ukpọn̄ ikpaha ke nsinsi emi mme owo ẹsikpepde ọkọtọn̄ọ ke Ukwọ ama ekebe. Ini Abasi eketịmerede usem ke Babel yak mme owo ẹsuana “ẹyọhọ ofụri iso isọn̄,” imenịm ke mmọ ẹma ẹmen ukpepn̄kpọ ukpọn̄ ikpaha ke nsinsi ẹka ebiet ekededi emi mmọ ẹkekade. (Gen. 11:8, 9) Inamke n̄kpọ m̀mê nsunsu ukpepn̄kpọ emi ọkọtọn̄ọ ini ewe, se idiọn̄ọde edi ke Satan kpa Devil emi edide “ete nsu” eketịbi ukpepn̄kpọ emi edi, ke ama onyụn̄ enem enye ndikụt nte nsunsu ukpepn̄kpọ oro asuanade ọyọhọ ofụri ererimbot.—John 8:44.