IBUOTIKỌ MAGAZINE EMI | MMANIE ẸDI MME NTIENSE JEHOVAH?
Isida okụk ke m̀mọ̀n̄ inam utom nnyịn?
Kpukpru isua, nnyịn imesimịn̄ Bible ye mme n̄wed Ikọ Abasi ke miliọn ke miliọn ideme inọ mme owo. Imọbọp ọfis nnyịn ye mme itie umịn̄n̄wed ke nsio nsio itie ke ererimbot. Ndien utom ke aka iso ke mme ebiet emi. Imọbọp n̄ko ata ediwak ndiye itie emi isitiede ikpono Abasi. Ẹkot mme itie emi Ufọkmbono Obio Ubọn̄. Isida okụk ke m̀mọ̀n̄ inam kpukpru emi?
Enọ imaesịt ke isida inam utom nnyịn. (2 Corinth 9:7) Ke 1879, enyene akpan n̄kpọ emi Zion’s Watch Tower, emi ẹdiọn̄ọde idahaemi nte Enyọn̄-Ukpeme, eketịn̄de ke udiana nsiondi esie. Enye ọkọdọhọ ete: “Nnyịn imenịm ke JEHOVAH ọnọ ‘Zion’s Watch Tower’ ibetedem, ntem tutu amama enye idiben̄eke idinyụn̄ ikpehe owo ubọk iyom un̄wam.” Se isụk inịmde edi oro tutu mfịn.
Ẹkeme ndinọ etịbe nnennen nnennen ẹsọk ọfis nnyịn mîdịghe ẹsịn ke ekebe etịbe emi odude ke kpukpru Ufọkmbono Obio Ubọn̄ nnyịn. Edi nnyịn isikpehe tithe, ibọhọ collection, isinyụn̄ ibọhọ okụk ke se inamde inọ mme owo m̀mê ke mme n̄wed nnyịn. Owo isikpehe nnyịn okụk ke ini ikwọrọde ikọ, ke ini ikpepde mme owo Ikọ Abasi, m̀mê ke ini itienede ibọp mme itie oro isitiede ikpono Abasi. N̄kọ emeti ke Jesus ọkọdọhọ ete: “Mbufo ẹkebọ ke mfọn, ẹnọ ke mfọn.” (Matthew 10:8) Mbon oro ẹnamde utom ke n̄kọk itieutom ye ibuot itieutom nnyịn, esịnede Otu Emi Ẹsede Ẹban̄a Utom Mme Ntiense Jehovah, isibọhọ okụk ọfiọn̄.
“Mme Ntiense Jehovah ẹsinam kpukpru n̄kpọ mmọ ke imaesịt, ntre etịbe mmọ n̄ko esidi ke imaesịt. Owo kiet kiet esibiere m̀mê idinọ okụk ifan̄ m̀mê idinyụn̄ inọ ikafan̄.”—Esopikpe Europe Oro Ẹsede Ẹban̄a Unen Owo, 2011
Ẹsitiene ẹda okụk emi ẹtịpde mi ẹn̄wam mbon oro ẹdụn̄de ke ebiet emi afanikọn̄ etịbede. Ekesinenem akpa mme Christian ndin̄wam mbon oro ẹsobode afanikọn̄. (Rome 15:26) Nnyịn n̄ko imesin̄wam utọ mbon oro ke ndifiak mbọp ufọk mmọ ye itie oro mmọ ẹsitiede ẹkpono Abasi. Imesinyụn̄ inọ mmọ udia, ọfọn̄, ye ibọk.