Kpep Nditọ Fo

Jotham Ama Anam Akpanikọ Kpa ye Oro Mfịna Okodude ke Ufọk Mmọ

UWEM ekeme ndisọn̄ ye eyen ke ini ete m̀mê eka ọkpọn̄de Jehovah emi edide Abasi akpanikọ. Yak ineme iban̄a Jotham. Iyokop mfịna oro enye okosobode ke ufọk mmọ nte enye ọkọkọride.

Uzziah emi ekedide edidem Judah ekedi ete Jotham. Enye ama enen̄ede okop odudu ke idụt oro. Uzziah ama akara nte eti edidem ke ediwak isua, idem mbemiso Jotham akamanade. Nte ini akakade, ke adan̄aemi Jotham okosụk edide eyenọwọn̄, Uzziah ama okohode idem onyụn̄ abiat Ibet Abasi. Ntre Abasi ama ọtọ enye idiọk udọn̄ọ emi ekedide akpamfia. Ndi ọmọfiọk se Jotham akanamde ke n̄kpọ emi ama eketịbe?—a

Jotham ama aka iso anam n̄kpọ Jehovah. Ekeme ndidi Jerusha eka esie akan̄wam enye. Edi, ekeme ndidi ama ọsọn̄ Jotham ndinam akpanikọ nnọ Jehovah ke ẹma ẹkebịn Uzziah ete esie ẹsio ke ufọk Jehovah.

Nso ke akpanam edieke ete m̀mê eka fo etrede ndinam n̄kpọ Jehovah? Oro akpanam n̄kpọ enen̄ede ọsọn̄ ye afo, nte ikpanamke?— Idiọkke ndikere se akpanamde edieke utọ n̄kpọ oro etịbede ọnọ fi. Se David ekewetde ke Bible owụt ke idiọkke ndinam ntre.

Jesse ete David ekedi eti owo. Enye ama anam n̄kpọ Jehovah, ndien imọfiọk ke David ama ama ete esie. Edi David ama ama Jehovah akan nte akamade Jesse. Isan̄a didie ifiọk emi?

Mbọk kụbọde Bible ka Psalm 27:10. David ekewet do ete: “Edieke ete mi ye eka mi ẹkpekpọn̄de mi, Jehovah ekpemen mi akama.” Kere ise: Se Bible ọdọhọde edi nte ke edieke Jesse ete David, m̀mê eka esie ekpeketrede ndinam n̄kpọ Jehovah, ke David akpakaka iso anam n̄kpọ Jehovah.

Afo akpanam nso? Ndi akpaka iso anam n̄kpọ Jehovah edieke ete m̀mê eka fo ekpetrede ndinam?— Ọfọn obụp idemfo mbụme emi ke ntak akpan ewụhọ oro odude ke Bible. Ewụhọ oro edi: “Afo enyene ndima Jehovah Abasi fo ke ofụri esịt fo ye ke ofụri ukpọn̄ fo ye ke ofụri ekikere fo.”

Ewụhọ emi oyom owo anam akpanikọ ọnọ Jehovah idem ke ini n̄kpọ ọsọn̄de. Afo ekere ke anie mîyomke nnyịn inam n̄kpọ Jehovah?— Edi Satan kpa Devil emi edide asua Abasi. Jesus okokot enye “andikara ererimbot emi.” Bible ọdọhọ n̄ko ete ke enye edi “abasi editịm n̄kpọ emi.” Ndi ana nnyịn ifehe Satan?—

Baba. Inaha ifehe enye. Utu ke oro, oyom iti ke Jehovah enen̄ede enyene odudu akan Satan. Jehovah eyekpeme nnyịn edieke ibuọtde idem ye enye. Kot ke Bible fo kop nte Jehovah ekekpemede David osio ke ubọk okopidem Goliath oro mme owo ẹkefehede-fehe. Jehovah ekeme ndikpeme fi n̄ko edieke akade iso anam akpanikọ ọnọ enye.

Kot ke Bible fo

2 Chronicle 26:16-21; 27:1, 2

Matthew 22:37

John 12:31; 2 Corinth 4:4

Mme Hebrew 13:5, 6

1 Samuel 17:41-54

[Ikọ Idakisọn̄]