Jesus Christ—Adan̄a nte Etop Esie Okotụkde Mme Owo
“Ke akpanikọ, nte ọfiọkn̄kpọ owo oro okotode Capernaum do akade iso nditụk mme owo mfịn edi akakan ntiense esie.”a—GREGG EASTERBROOK.
IKỌ enyene odudu. Ndinem ikọ ọniọn̄ ekeme ndisịn udọn̄ nnọ owo, ọnọ owo idotenyịn, onyụn̄ okpụhọde owo. Idụhe owo oro akanam etịn̄de ikọ oro okopde odudu nte Jesus Christ. Owo emi okokopde kiet ke otu ukwọrọikọ Jesus ekewet ete: “Ke adan̄aemi Jesus ama eketịn̄ mme ikọ emi ama, idem ama akpa otuowo aban̄a usụn̄ ukpepn̄kpọ esie.”—Matthew 7:28.
Mme owo ke ofụri ererimbot ẹsụk ẹmemehe ye ediwak ikọ Jesus tutu esịm mfịn emi. Kere ban̄a ikọ Jesus ifan̄ emi ẹnen̄erede ẹnyene se ẹwọrọde.
“Mbufo ikemeke ndidụk ufụn nnọ Abasi ye Inyene.”—Matthew 6:24.
“Kpukpru n̄kpọ eke mbufo ẹyomde mme owo ẹnam ye mbufo, ana mbufo n̄ko ẹnam kpasụk ntre ye mmọ.”—Matthew 7:12.
“Ẹnọ Caesar . . . mme n̄kpọ eke ẹnyenede Caesar, edi ẹnọ Abasi mme n̄kpọ eke ẹnyenede Abasi.”—Matthew 22:21.
“Inemesịt okpon ke ndinọnọ akan ke ndibọbọ.”—Utom 20:35.
Edi Jesus iketịn̄ke ikọ oro owo mîkemeke ndifre kpọt. Etop esie ekenyene odudu sia ama anam mme owo ẹfiọk akpanikọ emi aban̄ade Abasi, eteme mme owo nte ẹkpedude uwem emi enen̄erede enyene uduak, onyụn̄ owụt ukara emi edikọkde mfịna ubonowo in̄wan̄-in̄wan̄—oro edi, Obio Ubọn̄ Abasi. Nte ididụn̄ọrede etop emi ke mme ibuotikọ oro ẹtienede, iyokụt ntak emi ikọ Jesus osụk akade iso ‘nditụk ata ediwak owo.’
[Ikọ Idakisọn̄]