Se Idinamde Bible An̄wan̄a Fi

2. Da In̄wan̄-In̄wan̄ Esịt Kot

Ndi akanam ufan fo etịn̄ ndiọi edu owo emi akanam mûkwe ọnọ fi? Ke ini okokụtde owo oro, ndi se okokopde aban̄a enye ama ayak okụt nti edu owo oro? Ukem n̄kpọ oro ekeme nditịbe ke ini owo okotde Bible.

APOSTLE Paul ama etịn̄ se ikemede nditịbe edieke owo mîdaha in̄wan̄-in̄wan̄ esịt ikot Bible. Paul ekewet ntem aban̄a mme Jew eyo esie ete: “Ndi ntiense nnọ mmọ nte ke mmọ ẹnyene ifịk ẹban̄a Abasi; edi emi isan̄ake ikekem ye nnennen ifiọk.”—Rome 10:2.

Ndusụk mme Jew eyo oro ikamaha ndinyịme ke Jesus edi Messiah, okposụkedi emi N̄wed Abasi Usem Hebrew eketịn̄de emi in̄wan̄-in̄wan̄. Kpukpru se N̄wed Abasi eketịn̄de aban̄a Messiah ẹma ẹsu ke idem Jesus eyen Nazareth. Edi ukpọtiọ ukpọtiọ edu oro mme Jew ẹkenyenede ikayakke Ikọ Abasi an̄wan̄a mmọ.

Nso ke ikeme ndikpep nto oro? Ọfọn owo ada in̄wan̄-in̄wan̄ esịt okot Bible. Asari m̀mê ekikere oro owo ama ekenyenyene ekeme ndinam akpanikọ Bible in̄wan̄ake enye.

Ke uwụtn̄kpọ, prọfesọ ukpepn̄kpọ ido ukpono ke North Carolina ke U.S.A., ọkọdọhọ ke Bible edi “n̄wed emi owo ewetde, emi onyụn̄ ọdọn̄ọde ekikere owo; ndien ke ediwak ekikere emi ẹdi nsio nsio, ndomokiet inyụn̄ ifọnke ndida nteme nnyịn nte ikpodude uwem.” Edieke owo okpokotde Bible nte okot “n̄wed emi owo ewetde,” ndi oro idinamke enye ofụmi ndausụn̄ m̀mê mme edumbet oro enye mîmaha?

Edi Bible ọdọhọ nnyịn itịn̄ enyịn ikpep imọ. Enye ọdọhọ ke mbon Beroea eyo Paul ẹma ẹbọ ikọ Abasi “ye ata ọkpọsọn̄ udọn̄, ẹnen̄ede ẹdụn̄ọde N̄wed Abasi ke usen ke usen ẹte ise m̀mê mme n̄kpọ emi ẹdi ntre.” (Utom 17:11) Oyom fi ada in̄wan̄-in̄wan̄ esịt n̄ko okot Bible nte mbon Beroea oro. Da in̄wan̄-in̄wan̄ esịt kot Bible man ọfiọk adua-owo-idem etop Abasi emi ọdọn̄ọde ke Bible.