“Ata Ọsọn̄urua Enọ Fo”

NTRE ke akani akpan isụn̄utom ukara Belgium okokot n̄wed oro Akakan Owo Oro Akanam Odude Uwem.a Enye ọkọbọ n̄wed emi ke ini mbọhọidụn̄ esie akakade ekese enye. Ekem enye ama ewet leta emi ndiwụt esịtekọm: “Ama enen̄ede enem mi ke ini afo ekedide edise mi nte ufan, edi se ikenen̄ede inem mi ikan edi ata ọsọn̄urua enọ fo emi: n̄wed oro ẹwetde ẹban̄a ‘Akakan Owo.’”

Akani akpan isụn̄utom ukara oro ama etịm odụn̄ọde n̄wed emi, onyụn̄ ọdọhọ ete: “Ata akamba ukpụhọde okpodu ke ererimbot mfịn edieke mme owo ẹkpenen̄erede ẹnyene udọn̄ ẹban̄a etop Gospel ẹnyụn̄ ẹda mme edumbet oro Jesus Christ ekekpepde ẹsịn ke edinam. Ufọn Esop Oro Esede N̄kpọ Aban̄a Ifụre Ererimbot ikpodụhe; mbon edinam oyomonsia ikpodụhe, afai ikponyụn̄ idụhe ke ererimbot.” Okposụkedi emi enye ekekerede ke oro ikemeke nditịbe, enye ama enen̄ede ama nte mbọhọidụn̄ esie ekedide edise enye.

Leta oro aka iso ete: “Afo odu ke ata eti otu mme owo emi mîkereke-kere ke n̄kpọ ẹyefọn m̀mê ke n̄kpọ idifọnke, edi emi ẹnịmde ke mme owo ẹyefọn, n̄kpọ ẹnyụn̄ ẹfọn.”

Mme Ntiense Jehovah ẹnịm ke Abasi edida ererimbot oro ọfọnde edi, idịghe ukeme oro mme owo ẹsịnde. Mmọ ẹdomo ndikpebe akakan owo oro, Jesus Christ. Nte Mme Ntiense Jehovah ẹdi ẹdise fi ke ndondo emi? Eyedi ayama mmọ ẹneme ye afo ẹban̄a akakan owo oro akanam odude uwem. Mmọ ẹyenyụn̄ ẹdara ndinọ fi n̄wed oro akani akpan isụn̄utom ukara ekenen̄erede ama.

[Ikọ idakisọn̄]