Ntak Emi Ọsọn̄de Ndisụhọde Idem

AKAM etie nte ediwak owo ẹkere ke nsụhọdeidem inyeneke ufọn ke ererimbot mfịn. Mbon oro ẹsikarade mbon en̄wen ye mbon oro ẹtiede nte ẹnen̄ede ẹkụt unen ẹsidi mbon ukpọtiọ, mbon ntan̄idem, mbon oro ẹsiyomde ẹnam n̄kpọ ẹsịn ke uyo mmimọ. Esidọn̄ ata ediwak owo ndidu utọ uwem oro mme imọ ye mme ọwọrọiso owo ẹdude, edi isidọn̄ke mmọ nditie nte mbon nsụhọdeidem. Mbon oro ẹkụtde unen ẹsiwak ndinam inua mban̄a ukeme mmọ. Utu ke ndisụhọde idem, mmọ ẹsitan̄ idem ẹban̄a unen oro mmọ ẹkụtde.

Owo Canada emi edide anam-ndụn̄ọde ọkọdọhọ ke “‘edu ami-ami-ndu’ ọtọn̄ọ” ndidu ke idụt mmimọ. Ndusụk owo ẹkere ke nnyịn idu uwem ke ererimbot oro ẹmade udia-uwem ẹkan utom, ẹnyụn̄ ẹdọhọ ke mme owo mfịn ẹnen̄ede ẹkere ẹban̄a idemmọ kpọt. Etie nte ke mme owo imaha nsụhọdeidem ke utọ ererimbot emi.

Nte ededi, ediwak owo ẹyenyịme nte ke ọfọn ndusụk owo ẹsụhọde idem, koro esimem utom ndisan̄a n̄kpere mbon nsụhọdeidem. Edi ke ererimbot ndomoidem emi, ndusụk owo ẹkere ke edieke mmimọ isụhọrede idem, mme owo ẹdida mmimọ nte mbe.

Ikọ Abasi, kpa Bible, ama ebem iso etịn̄ ete ke mme owo ‘ẹyewụt idem’ ẹnyụn̄ “ẹtan̄ idem” ke eyo nnyịn. (2 Timothy 3:1, 2) Ndi ukwe ke ntịn̄nnịm ikọ emi ke osu? Nte emekere ke ufọn odu ndisụhọde idem? Mîdịghe, nte emekere ke ẹdida owo nsụhọdeidem nte mbe emi ẹkemede ndida nnam se ẹmama?

Ke akpanikọ, Bible ọnọ nti ntak oro akpanamde isụhọde idem inyụn̄ ima edu emi. Enye etịn̄ nti n̄kpọ aban̄a edu emi, esịn udọn̄ ọnọ mme owo ndinyene enye, onyụn̄ owụt ke owo ndinen̄ede nsụhọde idem iwọrọke ke enye edi mbe, edi akam owụt ke enye okop odudu. Ibuotikọ oro etienede ayanam emi an̄wan̄a.

[Ndise ke page 3]

Nnyịn ikpese didie unen oro ikụtde?