Ediwet N̄kpọ Ekedi Ata Akpan N̄kpọ ke Israel Eset
NTE akanam omokot ọwọrọetop uto Greece eset oro ẹkotde Iliad m̀mê enye oro ẹkotde Odyssey? Ẹkere ke ẹkewet mme uto oro ke ọyọhọ isua ikie usụkkiet m̀mê ọyọhọ isua ikie itiaita M.E.N. Mme uto emi ẹtie didie ke ẹmende ẹdomo ye Bible, emi ẹketọn̄ọde ndiwet ke ediwak isua ikie mbemiso ini oro? N̄wed oro The Jewish Bible and the Christian Bible ọdọhọ ete: “Ke nsụhọde n̄kaha, Bible etịn̄ aban̄a ediwet n̄kpọ ye se ẹwetde-wet utịm ike 429. Emi edi ata akpan n̄kpọ, akpan akpan ke ini itide ke Iliad etịn̄ aban̄a ediwet n̄kpọ ini kiet kpọt ke adan̄aemi Odyssey mîtịn̄ke iban̄a ndomokiet.”
N̄wed oro The Oxford Encyclopedia of Archaeology in the Near East ọdọhọ “ke etie nte ediwet n̄kpọ ekedi akpan ubak edinam utuakibuot ke Israel eset.” Ke uwụtn̄kpọ, ẹkewewet Ibet ediomi ndien nte ini akakade ẹma ẹsikot ke eferife ẹnọ kpukpru irenowo, iban, ye nditọwọn̄. Mme owo ẹma ẹsikot n̄ko ke otu ye ke idemmọ. Ke Alan Millard, akwa andikpep ke Ufọkn̄wed Ntaifiọk Liverpool, ama okodụn̄ọrede nsio nsio ikpehe Ibet oro, enye ekeberi ete: “Mme andiwet Bible ẹkenịm ke kpukpru nditọ Israel ẹma ẹkeme ndikot n̄wed nnyụn̄ n̄wet n̄kpọ.”—Deuteronomy 31:9-13; Joshua 1:8; Nehemiah 8:13-15; Psalm 1:2.
Apostle Paul ama etịn̄ nte mme Christian ẹkpesede ndisana uwetn̄kpọ emi, ete: “Ẹkewet kpukpru n̄kpọ oro ẹkewetde ke ini edem ndida nnọ nnyịn item, man otode ke ime oro nnyịn inyenede ye ndọn̄esịt eke otode N̄wed Abasi nnyịn ikpenyene idotenyịn.” Nte afo ke idemfo emenen̄ede ama Bible tutu esikot enye kpukpru usen?—Rome 15:4.