Ukpepn̄kpọ Oro Enen̄erede Ọfọn ye Nditọwọn̄

GLADYS anam utom ke ufọkn̄wed ke Mendoza ke Argentina. Usen kiet, enye ama asan̄a ebe ubet ukpepn̄kpọ kiet onyụn̄ okụt nte andikpep okotde N̄wed Mi eke Mme Mbụk Biblea ọnọ nditọwọn̄ ke ubet ukpepn̄kpọ. Gladys ama anam andikpep oro ọfiọk ke imọ idi kiet ke otu Mme Ntiense Jehovah onyụn̄ enyịme ndiwụt enye nte ẹkpenen̄erede ẹkpep n̄wed oro. Esịt ama enem andikpep oro ke se Gladys okowụtde enye, anam andikpep oro ama ebiere ndisida n̄wed emi n̄kpep nditọ ufọkn̄wed n̄kpọ kpukpru ini. Edi enye ekenyene ndibem iso mbọ unyịme nto mme etubom ufọkn̄wed. Esịt ama enen̄ede adat enye ke ini ẹkenọde enye unyịme.

Ekem, ke san̄asan̄a Usen Ukotn̄wed ke ufọkn̄wed oro, andikpep emi ama ọdọhọ nditọ ubet ukpepn̄kpọ esie ẹwọrọ ẹdida ẹkot ibuot kiet ke n̄wed oro ẹnọ nditọ ufọkn̄wed eken. Nte ẹkemade edinam emi ama anam ẹkot andikpep oro editịn̄ ikọ ke ufọkutom usuanetop ke ekebe ndise ke obio oro. Ke ini ẹkenemede n̄kpọ ẹban̄a edu uwem nditọ ufọkn̄wed, ẹma ẹbụp andikpep emi ẹte: “Nso ke esinam mbak nditọ ubet ukpepn̄kpọ fo ẹdisịn ntịme, edi ẹtie sụn̄-n̄?” Andikpep oro ama ọbọrọ ke N̄wed Mi eke Mme Mbụk Bible esin̄wam imọ. Enye ama ọdọhọ ke okposụkedi imọ mîkpepke ukpepn̄kpọ ido ukpono ke ufọkn̄wed, edi ke isida n̄wed emi ikpep nditọwọn̄ utọ nti edu nte ukpono, ime, edidianakiet, n̄kopitem, ye ima. Kpukpru owo ẹma ẹnyịme ke ukpepn̄kpọ emi enen̄ede ọfọn ye nditọwọn̄.

Ndi akpama ndikpep nditọ fo utọ nti edu emi? Emekeme ndidọhọ owo kiet ke otu Mme Ntiense Jehovah ọnọ fi ediye n̄wed emi kiet, N̄wed Mi eke Mme Mbụk Bible.

[Ikọ idakisọn̄]