Mme Mbụme Ẹtode Mme Andikot
Nte Mme N̄ke 22:6 owụt ke edieke mme Christian ẹtịmde ẹkpep nditọ mmọ n̄kpọ, ke mmọ idikpọn̄ke usụn̄ Jehovah?
Ufan̄ikọ oro okot ete: “Tịm teme eyenọwọn̄ nte ekemde ye usụn̄ esie: ke ini enye akabarede idem akani owo, enye idikpọn̄ke enye.” Enen̄ede etie nte ke nditọwọn̄ oro ẹtịmde ẹkpep mmọ n̄kpọ ẹkeme ndika iso nnam n̄kpọ Jehovah ke ẹma ẹkekponi, kpa nte eto ọkọride etiene nte ẹdiọn̄de enye. Kpukpru mme ete ye eka ẹfiọk ke oyoyom ẹda ini ẹnyụn̄ ẹsịn ukeme ẹnam emi. Ana mme ete ye eka ẹtịn̄ enyịn ẹkpep, ẹteme, ẹsịn udọn̄ ẹnọ, ẹtụnọ ẹnyụn̄ ẹnịm nti uwụtn̄kpọ ẹnọ nditọ mmọ man mmọ ẹkabade ẹdi mbet Eyen Abasi. Ana mmọ ẹnam emi ke ima ẹnyụn̄ ẹnam ndien ndien ke ediwak isua.
Edi, ndi emi ọwọrọ ke edieke eyenọwọn̄ ọwọn̄ọrede ọkpọn̄ ndinam n̄kpọ Jehovah, ke edi sia ete ye eka esie mîketịmke ikpep enye n̄kpọ? Ke ndusụk idaha, ekeme ndidi mme ete ye eka iketịmke ibọk nditọ mmọ ke ntụnọ ye ke usụn̄ ukere n̄kpọ Jehovah. (Ephesus 6:4) Edi ufan̄ikọ oro iwọrọke ke kpukpru nditọwọn̄ oro ẹnọde eti ukpep ẹyenam n̄kpọ Abasi. Mme ete ye eka ikemeke ndinam nditọ mmọ ẹdi se ededi oro mmọ ẹyomde. Ukem nte ikpọ owo, nditọwọn̄ ẹnyene ifụre ndimek se mmọ ẹdinamde ye nte mmọ ẹdidude uwem. (Deuteronomy 30:15, 16, 19) Kpa ye ofụri ukeme oro mme ete ye eka ẹsịnde, ndusụk nditọ ẹsiwọn̄ọde ẹkpọn̄ Jehovah, kpa nte Solomon emi ekewetde ufan̄ikọ oro inemede mi, ọkọwọn̄ọrede ọkpọn̄ Jehovah. Jehovah ke idemesie ama enyene nditọ oro ẹkewọn̄ọrede ẹkpọn̄ enye.
Ntre, ufan̄ikọ oro inemede mi iwọrọke ke kpukpru nditọ ‘idikpọn̄ke se ẹkpepde mmọ,’ edi ọwọrọ ke ediwak idikpọn̄ke. Nso n̄kpọ nsịnudọn̄ ke emi edi ntem ọnọ mme ete ye eka! Edi n̄kpọ ndọn̄esịt ọnọ mme ete ye eka ndifiọk ke ukeme oro mmọ ẹsịnde ke ofụri esịt ndikpep nditọ mmọ ẹsan̄a ke usụn̄ Jehovah ayada nti utịp edi. Ẹsịn udọn̄ ẹnọ mme ete ye eka ẹda utom mmọ ke akpan n̄kpọ koro se mmọ ẹnamde ẹnen̄erede ẹtụk uwem nditọ mmọ.—Deuteronomy 6:6, 7.
Idem ke ini nditọwọn̄ ẹwọn̄ọrede ẹkpọn̄ ndinam n̄kpọ Jehovah, mme ete ye eka oro ẹketịn̄de enyịn ẹkpep nditọ mmọ n̄kpọ ẹkeme ndidori enyịn ke nditọ mmimọ ẹyefiak ẹbịne Jehovah. Akpanikọ Bible okop odudu, ndien nditọ isisọpke ifre ukpep oro mme ete ye eka ẹnọde mmọ.—Psalm 19:7.