Nte Idiọkido Akan Owo Ubọk?
Ekpri eyeneren emi oyomde ndifiọk se enye okụtde esịn ubọk emen n̄kpọ ke isọn̄, oro edi bọmb emi ẹsibụkde ke isọn̄, ndien bọmb emi etịbi enye enyịn onyụn̄ obiomo enye ndo. Eka otop nsekeyen esie ọduọk ke mbio mbenusụn̄. Owo emi ẹkesiode ke utom afiak aka itieutom oro okotop kpukpru owo emi enye okụtde owot, ndien ekem otop idemesie owot. Eren kiet emi ẹkponode ke obio asabade nditọwọn̄.
EDI n̄kpọ mfụhọ nditịn̄ ke mme utọ idiọkido emi ẹwak ẹkaha ke eyo nnyịn. Se ikam idide n̄kpọ mfụhọ ikan edi nte ke ediwot ofụri orụk ye edinam oyomonsia ẹsinam mme n̄kpọ oro ikebemde iso isiak do ẹtie nte ata n̄kpri n̄kpọ. Uwetn̄kpọ ewetmbụk n̄kpọntịbe kiet ke 1995 ọkọdọhọ ete: “Isua ikie emi edi eke Satan, ke ndiọkn̄kan idaha esie. Idụhe eyo ekededi ke ini edem emi mme owo akanam ẹwụtde ukeme, ye udọn̄ ẹkponde ntem, ke ndiwot ediwak miliọn mbon en̄wen ke ntak orụk, ido ukpono m̀mê n̄ka.”
Kpa ke ini emi, mme owo ke ẹsabarede ofụm ye isọn̄, ẹtaharede inyene isọn̄, ẹnyụn̄ ẹkpere ndiwot ediwak orụk unam n̄kụre. Ndi ubonowo ẹkeme ndikan ndiọi ido emi nnyụn̄ nnam ererimbot edi eti itie oro enyenede ifụre? Mîdịghe, ndi ndinam ntre etie nte ndiduọn̄ọ inụn̄ ke nsia ebiọn̄? Prọfesọ emi ewetde ata ediwak n̄kpọ aban̄a idiọkido ọkọdọhọ ete: “Ama enen̄ede ọdọn̄ mi ndinen̄ede n̄kpụhọ mme n̄kpọ ke ererimbot, ndinam ererimbot ọfọn. Edi n̄kwe ukpụhọde ndomokiet.” Ekeme ndidi etie fi ntre n̄ko.
Ererimbot etie nte nsụn̄ikan̄ emi awatde ke inyan̄ emi ọdiọn̄de-diọn̄ adaha onyụn̄ enyenede ndịk ke usen ke usen. Okposụkedi mîdụhe owo ke nsụn̄ikan̄ oro emi oyomde ndiwat ke enyene-ndịk inyan̄ oro, kpukpru ukeme oro ẹsịnde ndiwọrọ do ọwọrọ ikpîkpu. Nsụn̄ikan̄ oro osụk ebe okodụk idiọk oyobio.
Ke ndusụk udomo, ẹkeme ndidọhọ ke unana mfọnmma owo anam ererimbot aka iso ọdiọk ntem. (Rome 3:23) Kpa ye oro, etie nte udomo idiọkido, nte enye atarade, ye nte enye ebịghide, akan se ẹkpedọhọde ke owo kpọt anam. Ndi ekeme ndidi ke enyene ọkpọsọn̄ idiọk odudu oro enyịn mîkwe, emi akarade ubonowo? Ke edide ntre, nso ke enye edi, ndien didie ke ikeme ndikpeme idem nnyịn mbak odudu oro? Ibuotikọ oro etienede eyeneme mme mbụme emi.
[Ebiet Ẹdade Ndise Ẹto ke page 3]
© Heldur Netocny/Panos Pictures