Ndifiọk Usụn̄ ke Akwa Inyan̄ibom

MARSHALL ISLANDS enyene se iwakde ibe n̄kpri ye ikpọ isuo 1,200, emi ediwak ke otu mmọ ẹkon̄de esisịt ẹkan inyan̄. Ke ẹwatde ẹsio ẹdụk inyan̄ esisịt, owo ikemeke ndida n̄kụt mme isuo emi aba. Kpa ye oro, mbon Marshall Islands eset emi ẹkesiwatde inyan̄ ẹma ẹsikeme ndito ekpri isuo kiet n̄wat n̄ka en̄wen, ẹfiọkde ebiet oro mmọ ẹkade ke Inyan̄ibom Pacific emi okponde n̄kpọ nte kilomita 650,000. Mmọ ẹkesan̄a didie ẹfiọk usụn̄? N̄wed usụn̄ inyan̄ibom oro mîwakke n̄kukọhọ, edi ekenen̄erede enyene ufọn, ekesida mmọ usụn̄. Ẹkesida eto ẹnam enye.

Mbon Marshall Islands oro ẹma ẹsida ifiọk uwat-inyan̄ ẹfiọk ke obotikọt esisio akpan mbufụt mmọn̄ oro ẹdade ẹfiọk ebiet emi isuo oro oyomde usụn̄ n̄kpọ nte kilomita 30 odude. Nsio nsio mbufụt mmọn̄ ẹma ẹdu oro akanade ẹkpep ẹdiọn̄ọ, ndien n̄wed usụn̄ inyan̄ibom oro ẹdade ẹto ẹnam ama esin̄wam mmọ ẹti nsio nsio mbufụt mmọn̄ emi. N̄wed usụn̄ inyan̄ibom oro ẹdade ẹto ẹnam eketie didie? Nte afo ekemede ndikụt ke ndise emi, ẹkekpana n̄kpri orụn̄ n̄kukịp m̀mê ayan̄ isịp mbakara man mmọ ẹkpeda ẹban̄a nsio nsio mbufụt mmọn̄. Ẹma ẹsiyịri utọ n̄kpọ nte ikpọk n̄kọn̄kọ ke n̄kpana emi man ẹwụt nsio nsio itie oro mme isuo ẹdude.

Ke ediwak isua, ẹkesidedịbe ẹkama n̄wed usụn̄ inyan̄ibom emi ẹka isan̄, mbon oro ẹmekde kpọt ke ẹkesiwụt n̄wed emi. Didie ke ekpri awat-inyan̄ ekekeme ndifiọk ndikama n̄wed usụn̄ inyan̄ibom emi? Ekedi n̄kukụre ke enye ama ọkọbọ ukpep onyụn̄ ọtọn̄ọ ndisinam se ẹkekpepde enye. Ata awat-inyan̄ ekesikpep ekpri awat-inyan̄ emi ke ndịbe, iso-ọfọn adade enye aka uwat ke mme n̄kpet n̄kpet isuo. Nte ekpri awat-inyan̄ emi ọtọn̄ọde ndifiọk nsio nsio uduot mbufụt mmọn̄, enye esinen̄ede ọfiọk ndikama n̄wed usụn̄ inyan̄ibom oro. Ndien nte ini akade enye esida ubom odụk inyan̄ ke idemesie.

Ke ukem usụn̄ oro, Ikọ Abasi kpa Bible ekeme ndida nnyịn usụn̄. Ke akpa, owo ekeme ndin̄wam nnyịn inyene akpan ifiọk N̄wed Abasi. Ekem, nte nnyịn ikade iso ikpep Ikọ Abasi, inyụn̄ idade mme edumbet esie isịn ke edinam, nnyịn iyọbuọt idem ke se enye etịn̄de. Ẹma ẹdọhọ Joshua, kpa andikada nditọ Israel usụn̄, ẹte okot Ikọ Abasi man enye “ekpeme ndinam kpukpru se ẹwetde ke esịt.” Abasi ama adian do ete: “Ntem ke afo edikụt unen ke usụn̄ fo, onyụn̄ etịm anam.” (Joshua 1:8) Ih, Bible ekeme ndiwụt nnyịn eti usụn̄ uwem oro edinamde ikụt unen.

[Ebiet Ẹdade Ndise Ẹto ke page 32]

© Greg Vaughn