N̄kpọ Mmọn̄eyet Etịbe

OWEN, eyen isua iba-ye-ubak ekebre mbre ke ubet uyeremmọn̄ mmọ. Enye ama ọdọk ekesịm kọbọd ubet uyeremmọn̄ oro ete ye eka esie ẹkekerede ke enye ikpekemeke ndidọk. Enye ama okụt ekpeme emi enye akamade ke esịt kọbọd oro. Enye ama okụbọde ekpeme oro onyụn̄ ọn̄wọn̄ n̄kpọ oro ọkọdọn̄ọde ke esịt. N̄kpọ mmọn̄eyet ama etịbe.

Asid ọkọdọn̄ọ ke ekpeme oro, ndien ke mfụhọ, asid oro ama owot ekpri Owen. Ete ye eka esie ẹma ẹfụhọ etieti. Percy ete esie ama oyom ndọn̄esịt oto ufọkabasi mmọ. Enye ama obụp ete, “Ntak emi n̄kpọ emi etịbede?” Ọkwọrọ ederi ama ọbọrọ ete ke “Abasi okoyom ekpri angel efen ke heaven.” Sia Percy okokopde mfụhọ etieti, enye ekekere ke emi ama ọdiọk ebe nde. Ndi Abasi ekenen̄ede oyom utọ n̄kpọ mmọn̄eyet oro etịbe? Sia ekenen̄erede okụt edikpu, Percy ama ebiere nditre ufọkabasi ofụri ofụri.

Ke ekerede se iketịbede, Percy ama obụp ete: ‘Okûdi ekpri eyen mi ke okop ubiak ko? Nte nyafiak n̄kụt enye tutu amama?’

Ekeme ndidi afo n̄ko emesikere m̀mê nso isitịbe inọ owo ke ini enye akpade n̄ko m̀mê iyafiak ikụt mbonima nnyịn oro ẹkekpan̄ade. Ikọ Abasi, kpa Bible ọbọrọ mme mbụme emi. Bible ọnọ mbon oro ẹsobode ukem n̄kpọ mmọn̄eyet oro in̄wan̄-in̄wan̄ ibọrọ oro ọnọde ndọn̄esịt. Ke akande oro, enye ayarade utịbe utịbe idotenyịn oro Abasi ọnọde—kpa ediset ke n̄kpa.

Mbọk kot ibuotikọ oro etienede man ekpep n̄kpọ efen efen aban̄a utịbe utịbe idotenyịn emi.