Ndi Ọdọn̄ Fi Ndidu ke Ererimbot Oro Ndịk Mîdụhe?

“Nnyịn idu uwem ke ‘ini oro mme owo ẹkamade nsia ke ubọk kpukpru ini ẹnyụn̄ . . . ẹnen̄erede ẹkop ndịk,’ ke ntak ‘n̄kpọndịk emi ekemede nditịbe ke mbuari . . . ke usụn̄ ekededi’ ”

IKỌ emi, ẹkekotde isua oko ẹsịn ke magazine Newsweek, owụt ekikere ediwak owo emi ẹdude uwem ke ntịme ntịme ererimbot mfịn. Jesus Christ ama owụt ke utọ ndịk oro ọyọdọdiọn̄ okpon ke n̄kpet n̄kpet ini iso. Enye ama ebem iso etịn̄ aban̄a ini emi editịmede esịt edimụmde mme idụt isọn̄ ke ntak nnanenyịn, idem edinyụn̄ eyemerede mme owo oto ndịk ye edikama enyịn nse se idiwọrọde inọ ekondo. Nte ededi, ufọn idụhe nnyịn ndikop ndịk ye editịmede esịt koro Jesus ama adian do ete: “Ke ini mme n̄kpọ emi ẹtọn̄ọde ndiwọrọ, ẹmenede enyịn ke enyọn̄, ẹnyụn̄ ẹmenede ibuot mbufo ke enyọn̄, koro edifak mbufo ke asan̄a ekpere.”—Luke 21:25-28.

Ke etịn̄de aban̄a nte n̄kpọ editiede ye mbon oro ẹdidude uwem ke isọn̄ ke ẹma ẹkefak mmọ, Jehovah Abasi ọkọdọhọ ete: “Ikọt mi ẹyedụn̄ ke ufọk emem, ye ke idụn̄ ifụre, ye ke ebiet nduọk-odudu eke edide sụn̄-sụn̄.” (Isaiah 32:18) Jehovah n̄ko ama ada Micah, prọfet esie, etịn̄ ete: “Kpukpru mmọ ẹyetie ke idak vine mmọ ye ke idak fig mmọ; ndien baba owo kiet eke edinamde mmọ ndịk ididụhe.”—Micah 4:4.

Oro okpụhọrede didie ntem ye uwem oro idude mfịn! Afanikọn̄ oro owo mîdorike enyịn ididụhe aba. Utu ke ndikama nsia ke ubọk nnyụn̄ n̄kop ndịk kpukpru ini, nsinsi emem ye inemesịt ẹdidu.