Se Nsụhọdeidem Jehovah Ọwọrọde Ọnọ Nnyịn
DAVID edi owo emi okosobode ekese afanikọn̄. Edidem Saul, efịbe-ufụp ete n̄wan esie, ama otụhọde enye. Saul ama odomo ikata ndida eduat n̄wot David, onyụn̄ ebịne enye nte unam ke ediwak isua, anamde enye akabade edi nyon̄. (1 Samuel 18:11; 19:10; 26:20) Edi, Jehovah ama odu ye David. Jehovah ikanyan̄ake enye isio Saul kpọt ke ubọk edi ama anyan̄a enye osio ke ubọk mme asua en̄wen n̄ko. Ke ntre, ikọ David ekeme ndin̄wan̄a nnyịn, ke ini enye ọkọkwọde ete: “Jehovah edi akwa itiat mi, ye ufọk ekọn̄ mi, ye andinọ mi ubọhọ; Abasi akwa itiat mi; afo [Jehovah] . . . ọnọ mi otu-ekọn̄ edinyan̄a fo; [“nsụhọdeidem,” NW] fo onyụn̄ ofori mi.” (2 Samuel 22:2, 36) David ama oforo ke Israel. Didie, ndien ke nsụhọdeidem Jehovah akabuana?
Ke ini N̄wed Abasi ọdọhọde ke Jehovah osụhọde idem, enye idọhọke ke Jehovah enyene mmeme ke usụn̄ ekededi m̀mê ke enye odu ke idak mbon en̄wen. Utu ke oro, ediye edu emi owụt ke enye enyene akwa mbọm aban̄a mme owo emi ẹnen̄erede ẹyom ndinyene unyịme esie, enye onyụn̄ atua mmọ mbọm. Ke Psalm 113:6, 7, nnyịn ikot ite: ‘[Jehovah] osụhọrede ese n̄kpọ ke enyọn̄ ye ke isọn̄. Enye osio mme ubuene ke ntan emen.’ Enye ‘ndisụhọrede’ ọwọrọ ke “enye onụhọ” m̀mê ke “enye osụhọde Idemesie man ese.” (Today’s English Version; Young’s Literal Translation of the Holy Bible) Ntem, emi ọwọrọ ke Jehovah ke idemesie ama etie ke heaven “onụhọ,” m̀mê ‘osụhọrede idemesie,’ man etịn̄ enyịn ke idem David, kpa anana-mfọnmma owo emi okosụhọrede idem oyom ndinam n̄kpọ Abasi. Ke ntre, David ọnọ nnyịn nsọn̄ọ emi: ‘Okposụkedi Jehovah okon̄de, enye ese mbon nsụkidem.’ (Psalm 138:6) Nte Jehovah akadade mbọm ye ime anam n̄kpọ ye David ekpenyene ndisịn udọn̄ nnọ kpukpru mbon oro ẹyomde ndinam uduak Abasi.
Okposụkedi Jehovah nte Andikara odụn̄de ke ebiet oro okon̄de akan ke ofụri ekondo, enye enyịme ndisinam n̄kpọ ye nnyịn owo kiet kiet. Emi ọnọ nnyịn uko ndinyene mbuọtidem ke enye ọyọnọ nnyịn un̄wam idem ke ata n̄kpọsọn̄ idaha. Ntak ndomokiet idụhe ndikop ndịk ke enye eyefre nnyịn. Kaban̄a ikọt esie eke Israel eset, ẹtịn̄ nte odotde ẹban̄a Jehovah ẹte ke enye edi enye “emi eketide [mmọ] ke itie ukụt [mmọ]: koro ima esie odude ke nsinsi.”—Psalm 136:23.
Nte mme asan̄autom Jehovah mfịn, nnyịn imekeme ndisobo afanikọn̄ nte David okosobode. Mbon oro mîfiọkke Abasi ẹkeme ndisak nnyịn nsahi, mîdịghe ekeme ndidi nnyịn ke in̄wana ye unana nsọn̄idem mîdịghe itaba owo ke n̄kpa. Se ededi oro idaha nnyịn edide, nnyịn imekeme ndika mbịne Jehovah ke akam, idọhọ enye atua nnyịn mbọm. Jehovah ‘oyonụhọ’ etịn̄ enyịn ke idem nnyịn onyụn̄ okop akam nnyịn. Andiwet psalm eke odudu spirit ekewet ete: “Enyịn Jehovah ese mbon eti ido, utọn̄ esie onyụn̄ ọbiọn̄ọ ọnọ eseme mmọ.” (Psalm 34:15) Ndi itụkke fi esịt nditie n̄kere ediye edu nsụhọdeidem Jehovah?
[Mme ndise ke page 30]
Kpa nte Jehovah okokopde akam David, ọdọn̄ enye ndikop akam nnyịn mfịn