“Ẹyom Owo Eke Odotde”

DAMASCUS ekedi obio uforo ke akpa isua ikie Eyo Nnyịn. Enye eketie nte ebiet nduọkodudu ọnọ udịm mbon isan̄ emi ẹketode mme obio edem usiahautịn ẹdi, koro in̄wan̄ mfri ẹma ẹdu barasuene. Ikebịghike ke Jesus Christ ama akakpa, ẹma ẹsiak esop Christian ke Damascus. Mme andibuana ẹma esịne mme Jew oro etiede nte ẹkekabade ẹdi mme anditiene Jesus ke ini Usọrọ Pentecost eke 33 E.N. ke Jerusalem. (Utom 2:5, 41) Ekeme ndidi ndusụk mbet ẹtode Judea ẹma ẹfen̄e ẹka Damascus ke ini ukọbọ eketịbede, ke ẹma ẹketọn̄ọ Stephen ke itiat.—Utom 8:1.

Etie nte ke 34 E.N. ke ẹkenọ Christian emi ekekerede Ananias, emi otode Damascus, n̄wọrọnda ifetutom. Ọbọn̄ ọkọdọhọ enye ete: “Daha, ka ke efak emi ẹkotde Nnen-nnen kobụp ke ufọk Judas ban̄a owo emi ekerede Saul, owo Tarsus: koro sese, enye ke ọbọn̄ akam.”—Utom 9:11.

Efak oro ekerede Nnen-nnen ọkọniọn̄ n̄kpọ nte kilomita kiet ye ubak, okonyụn̄ odu ke ufọt Damascus. Ndise eke ọyọhọ isua ikie 19 oro odude ke page emi anam nnyịn ifiọk nte efak oro eketiede ke eset. Ke ikerede iban̄a nte usụn̄ ini oro eketiede, anaedi ama ada Ananias ini ndikụt ufọk Judas. Nte ededi, Ananias ama okụt ufọk oro, ndien enye ndikaka mbịne Saul ama ada ekesịm Saul ndikabade ndi apostle Paul, kpa ifịk ifịk anditan̄a eti mbụk.—Utom 9:12-19.

Jesus ama osio mme mbet esie ọdọn̄ ete ẹka ẹkeyom “owo eke odotde” ndibọ eti mbụk. (Matthew 10:11) Nte an̄wan̄ade, Ananias okoyoyom Saul okụt. Ukem nte Ananias, Mme Ntiense Jehovah ẹsikop inemesịt ndiyom mbon oro ẹdotde, mmọ ẹsinyụn̄ ẹnem esịt ke ini mme owo ẹnyịmede eti mbụk Obio Ubọn̄. Ndikụt mbon oro ẹdotde esinam ukeme oro ẹsịnde ndiyom mmọ odot.—1 Corinth 15:58.

[Ndise ke page 32]

“Efak emi ẹkotde Nnen-nnen” mfịn

[Ebiet Ẹdade Ndise Ẹto ke page 32]

Ẹda ẹto n̄wed oro La Tierra Santa, Eboho II, 1830