Nte Ẹkpeyọde Mfụhọ

NTE afo omokop mfụhọ? Emana unana iwụk ye utọk emi ananam ediwak owo ẹkop mfụhọ. Ndusụk owo ẹkop mfụhọ sia mînyeneke utom. Mbon eken ke ẹyọ ubiak unọmọ mbabuat n̄kpọntịbe. Ke adan̄aemi mbon en̄wen ẹn̄wanade ye mfịna ubon, idiọk udọn̄ọ, m̀mê ndobo.

Edieke afo okopde mfụhọ, m̀mọ̀n̄ ke afo akpaka okoyom un̄wam? Ata ediwak owo ke ofụri ererimbot ẹsibọ ndọn̄esịt ke ndikot Ikọ Abasi, kpa Bible. Se idọn̄de mmọ esịt edi ikọ apostle Paul emi: “Itoro enyene Abasi ye Ete Ọbọn̄ nnyịn Jesus Christ, Ete mbọm ye Abasi kpukpru ndọn̄esịt: emi ọdọn̄de nnyịn esịt ke kpukpru ukụt nnyịn.” (2 Corinth 1:3, 4) Ntak mûkotke itien̄wed emi ye mme itie eken ke Bible fo? Ke anamde oro, afo ‘ọyọbọ ndọn̄esịt onyụn̄ ọsọn̄ọ ada.’—2 Thessalonica 2:17.

Ndibuana ye mbon oro ẹnamde n̄kpọ Jehovah ekeme n̄ko ndin̄wam owo ọyọ mfụhọ. Mme N̄ke 12:25 ọdọhọ ete: “Mfụhọ ke esịt owo oyonụk enye ọduọ: edi eti ikọ ayadat enye.” Ke ini idụkde mme mbono esop Christian, nnyịn imesikop “eti ikọ” emi ebietde “obukpa ọkwọk: . . . enịn̄e ukpọn̄, onyụn̄ ọnọ ọkpọ odudu.” (Mme N̄ke 16:24) Ntak mûdụkke mbono esop ke Ufọkmbono Obio Ubọn̄ Mme Ntiense Jehovah man okụt ke idemfo nte mbono emi ekemede ndisọn̄ọ fi idem?

Akam n̄ko ekeme ndinọ fi odudu. Edieke etiede nte editịmede esịt ke uwem akan fi ubọk, tịn̄ nte etiede fi ke idem nọ ‘Enye Emi okopde akam.’ (Psalm 65:2) Andibot nnyịn, Jehovah Abasi, ọfiọk nte etiede nnyịn ke idem akan nte nnyịn ifiọkde. Nnyịn imekeme ndiberi edem ke enye. Ikọ esie ọn̄wọn̄ọ ọnọ nnyịn ete: “Top mbiomo fo nọ Jehovah, ndien enye ayakama fi: enye idiyakke edinen owo esehede ke nsinsi.” (Psalm 55:22) Ih, “mmọ eke ẹberede ye Jehovah ẹyekop obufa nsọn̄idem.”—Isaiah 40:31.

Jehovah Abasi ọnọ nnyịn ofụri un̄wam oro iyomde man ikeme ndiyọ mfụhọ. Nte afo ayama ndida mmọ nnam n̄kpọ?