Ntak Emi Mme Ntiense Jehovah Ẹkade Iso Ndiwaha Ufọk Fo?

KE OFỤRI ererimbot, ẹtịm ẹfiọk nte Mme Ntiense Jehovah ẹsịnde ifịk ẹnam utom ukwọrọikọ mmọ eke ufọk ke ufọk. Ndusụk owo ẹsikere ntak emi Mme Ntiense ẹsikade iso ndiwaha ufọk mmọ, akpan akpan edieke edide mmọ ikenyeneke udọn̄ ke etop Mme Ntiense oro. Leta iba ẹtode Russia ẹn̄wam ndinam emi an̄wan̄a.

Masha, eyenan̄wan isua 19 ke Khabarovsk, ọdọhọ ete: “Ke nditịn̄ akpanikọ, ke ini edem, mma nsifehe Mme Ntiense Jehovah nte idiọk udọn̄ọ.” Nte ededi, ke ama okokot magazine ifan̄ oro Mme Ntiense emi ẹsiode, enye ama okpụhọde edu esie. Masha ewet ete: “Mmọ ẹnen̄ede ẹnem ẹnyụn̄ ẹtat owo enyịn, edi ke edide akpan n̄kpọ akan, mmọ ẹnam fi ese ererimbot emi ke usụn̄ efen. Sụn̄sụn̄, mma ntọn̄ọ ndifiọk se idide uduak uwem.”

Ke obio Ussuriysk, emi oyomde usụn̄ ọkpọn̄ Vladivostok ke n̄kpọ nte kilomita 80, Svetlana ekewet ete: “Ami ndisụk ntọtọn̄ọ ndikot Enyọn̄-Ukpeme ye Awake! edi emi. Ẹnen̄ede ẹyom mme magazine emi ke eyo nnyịn emi. Kpukpru ibuotikọ esie ẹnenem mi. Mmọ ẹnen̄ede ẹdemede udọn̄, ẹsịne ifiọk, ẹnyụn̄ ẹtat owo enyịn. Ẹsọsọn̄ọ-o! Ẹsọsọn̄ọ ata etieti ke ndidu ke ererimbot emi nnyụn̄ nnam utọ eti utom oro ẹnen̄erede ẹyom mi.”

Mme Ntiense Jehovah ke ofụri ererimbot ẹda mbụme Paul emi anamde owo ekere n̄kpọ mi ke akpan n̄kpọ: “[Mme owo] ẹdinyụn̄ ẹnam didie ẹkop, ke ọkwọrọ-ikọ mîdụhe?” (Rome 10:14) Ntak emi mûdaha minit ifan̄ ukpan̄ utọn̄ ini efen oro Mme Ntiense ẹwahade ufọk fo? Afo n̄ko emekeme ndidara etop ndọn̄esịt oro odude ke Ikọ Abasi, kpa Bible.