“Kiet ke Otu Akaka Utomusọ”

KE INI ẹkebọpde temple Jehovah ke Jerusalem ke ini ukara Edidem Solomon n̄kpọ nte isua 3,000 emi ẹkebede, ẹma ẹda okpoho ẹbot ediye n̄kpọ udọn̄ mmọn̄ ẹnịm ke inuaotop temple. Udobi esie ama ebe tọn 30, enye ama onyụn̄ esịne n̄kpọ nte lita mmọn̄ 40,000. Ẹkekot akaka akpan̄kpan̄ emi n̄kpọdiọhọ mmọn̄. (1 Ndidem 7:23-26) Albert Zuidhof, akani ese n̄kpọ mban̄a ilektrọnik ke Esop Ndụn̄ọde Idụt Canada ọdọhọ ke Biblical Archeologist ete: “Ke akpanikọ emi ekedi kiet ke otu akaka utomusọ oro akanam ẹnamde ke idụt Israel.”

Didie ke ẹkebot n̄kpọdiọhọ mmọn̄ emi? Bible ọdọhọ ete: “Edidem atara [okpoho] an̄wan̄a ke itịghede Jordan.” (1 Ndidem 7:45, 46) Zuidhof ọdọhọ ete: “Anaedi ukem usụn̄ oro mme odomutịm ẹsidade ẹtara okpoho ẹbot ikpọ n̄kanika ke ẹkeda ẹbot n̄kpọdiọhọ mmọn̄ emi.” Enye anam an̄wan̄a ete: “Ke nditịm ntịn̄, emi okoyom ẹkama n̄kpọ ubotn̄kpọ iba, kiet ke esịt ye enye eken ke edem, ekem ẹn̄wan̄a okpoho oro ẹtarade ẹdọn̄ ke ufọt n̄kpọ ubotn̄kpọ mbiba emi. Ndien ke akpatre ẹbom mme n̄kpọ ubotn̄kpọ oro.”

Ama oyom akamba usọ man ẹkeme ndibot akaka ndodobi akpan̄kpan̄ emi. Enye ekenyene ndisọn̄ idem n̄kem ndisịne okpoho emi odobide ke tọn 30, ndien ẹkenyene ndika iso ntara enye mbak idibomo m̀mê idinyene ndo. Anaedi emi ama oyom ediwak itie ubara utịm emi ẹbọpde ẹdian ọtọkiet man ẹkeme ndin̄wan̄a okpoho emi ẹtarade ndọn̄ ke n̄kpọ ubotn̄kpọ. Emi ekedi ata ọkpọsọn̄ utom!

Ke akam oro enye ọkọbọn̄de ke ini ẹkeyakde temple ẹnọ, Edidem Solomon ọkọkọm Jehovah Abasi ke kpukpru utom oro ẹkenamde ke temple emi, ọdọhọde ete: “Afo okonyụn̄ ọdọhọ ke inua fo, onyụn̄ ada ubọk fo anam osu.”—1 Ndidem 8:24.