Mbụk Oro Edemerede Mbuọtidem Ye Uko—Mme Ntiense Jehovah ke Ukraine
UKEM nte mme Christian akpa isua ikie ẹkesobode ukọbọ, ntre ke ikọt Abasi mfịn ẹsobo n̄ko. (Matthew 10:22; John 15:20) Iwakke ebiet emi ukọbọ ebịghide onyụn̄ ọsọn̄de ubọk nte ke Ukraine, kpa ebiet emi ẹkekpande utom ukwọrọikọ Obio Ubọn̄ ke isua 52.
2002 Yearbook of Jehovah’s Witnesses obụk aban̄a ikọt Abasi ke idụt oro. Enye edi mbụk oro aban̄ade mbuọtidem, uko, ye odudu oro ẹkewụtde ke ini ọkpọsọn̄ ukọbọ. Se itienede mi edi ndusụk ikọ esịtekọm oro ọfis n̄kọk itieutom eke Mme Ntiense Jehovah ke Ukraine ọkọbọde:
“Mmokụre ndikot 2002 Yearbook. Ke ini n̄kokotde mban̄a utom mbufo ke Ukraine, n̄kekemeke nditre nditua eyet. Nyom ndinam mbufo ẹdiọn̄ọ udomo nsịnudọn̄ oro n̄kọbọde nto ifịk ifịk uwụtn̄kpọ ye ọkpọsọn̄ mbuọtidem mbufo. Mmokop inemesịt ndidu ke ubon eke spirit kiet ye mbufo. Ẹsọsọn̄ọ ata eti eti!”—Andrée, France.
“Inua ikemeke nditịn̄ nte esịt enemde mi ye mbufo, n̄ko ye Jehovah, kaban̄a 2002 Yearbook emi. Mmọn̄eyet ama ọwọrọ mi ke enyịn ke ini n̄kokotde ediwak ifiọkutom nditọete oro ẹkebiatde mfọnn̄kan isua uwem mmọ ke mme ufọk-n̄kpọkọbi ye itienna ekikere. Mmama uko mmọ. Okposụkedi ndide Ntiense ke isua 27, mmekeme ndisụk n̄kpep n̄kpọ nto nditọete oro. Mmọ ẹnam mbuọtidem mi ke Ete nnyịn eke heaven, kpa Jehovah enen̄ede ọsọn̄.”—Vera, akani Yugoslavia.
“Ami n̄wet leta emi ye idatesịt ke ntak eti uwụtn̄kpọ ime ye nsọn̄ọnda mbufo ke mme isua ukọbọ oro. Ọyọhọ mbuọtidem mbufo ke Jehovah ye ubiere mbufo ndika iso nsọn̄ọ nda ẹnam ẹkpono mbufo. Ke adianade do, nsụhọdeidem mbufo ke mme ini idomo afiak ọsọn̄ọ se n̄kenịmde ke akpanikọ nte ke Jehovah isikpọn̄ke ikọt esie. Ke ntak eti uwụtn̄kpọ uko, nsọn̄ọnda, ye ime mbufo, nnyịn imekeme ndiyọ n̄kpri mfịna nnyịn mmemmem mmemmem.”—Tuteirihia, French Polynesia.
“N̄kenyene ndiwet mbufo ke mma n̄kokot Yearbook emi mma. Kpukpru mme akama-nsịnudọn̄ ifiọkutom esie ẹma ẹnen̄ede ẹtụk mi. Enem mi esịt ndidi andibuana ke esop oro anamde akpanikọ ntre onyụn̄ adianade kiet, emi enyenede ndausụn̄ oto ima ima Ete oro ekerede aban̄a owo, onyụn̄ ọnọde nnyịn odudu ke nnennen ini. Mma n̄kop mfụhọ ke nti mme asan̄autom Jehovah ndikenen̄ede mbọ ufen nnyụn̄ nduọk uwem mmọ. Edi mma n̄kop idatesịt n̄ko sia ediwak owo ẹma ẹdibọ akpanikọ ẹnyụn̄ ẹdi ẹdifiọk ima ima Ete nnyịn ke ntak uko ye ifịk mmọ.”—Colette, Netherlands.
“Ami ye n̄wan mi iwet man itịn̄ ke mbụk oro ikokotde ke Yearbook iban̄a Ukraine ama otụk nnyịn. Mbufo nditọete emi ẹnamde akpanikọ ẹma ẹnịm n̄wọrọnda uwụtn̄kpọ ime ke ini ọkpọsọn̄ ndutụhọ anyan ini oro. Ke n̄kemuyo ye Mme N̄ke 27:11, enyene ndidi Jehovah ekenem esịt didie ntem ndifiọk nte ke ata ediwak nditọete oro ẹnamde akpanikọ ke Ukraine ke ẹka iso ẹmụm nsọn̄ọnda oro n̄kpọ mîkemeke ndibiat ẹkama kpa ye kpukpru ndiọi edinam Devil.”—Alan, Australia.
“Mmọn̄eyet ama asiaha mi ke enyịn ke ini n̄kokotde mban̄a nditọete oro ke Ukraine. Mmọ ẹma ẹyọ ata ediwak n̄kpọ—ediwak isua n̄kpọkọbi, ndutụhọ, ufịk ye edidianade mmọ n̄kpọn̄ ubon mmọ. Nyom ndisian kpukpru nditọete oro, emi ẹsụk ẹdude ke mme esop mbufo, nte ke mmama nnyụn̄ n̄kpono mmọ eti eti. Mmokop idatesịt ke uko ye nsọn̄ọnda mmọ. Mmọfiọk ke spirit Jehovah ọkọnọ mmọ odudu. Jehovah enen̄ede ekpere nnyịn, ndien enye oyom ndin̄wam nnyịn.”—Sergei, Russia.
“Mma ntua ke ini n̄kokotde 2002 Yearbook. Ediwak nditọete ke esop nnyịn ẹtịn̄ ẹban̄a mbufo. Mbufo ẹnen̄ede ẹdi n̄kpọuto. Ami mmenen̄ede n̄kop inemesịt nditiene ndu ke akamba ubon eke spirit emi.”—Yeunhee, South Korea.
“Mbụk mbuọtidem, nsọn̄ọnda, ye ọkpọsọn̄ ima mbufo ke Jehovah ye Obio Ubọn̄ esie, enen̄ede otụk mi. Ndusụk ini nnyịn imesifre ndiwụt esịtekọm mban̄a ifụre oro nnyịn inyenede ye udia ke spirit oro Jehovah ọnọde nnyịn barasuene. Nte ededi, emi isidịghe ntre ye mbufo. Uwụtn̄kpọ mbuọtidem mbufo an̄wam nnyịn ndifiọk nte ke edieke nnyịn inyenede n̄kpet n̄kpet itie ebuana ye Abasi nnyịn, enye ọyọnọ nnyịn ukeme ndiyọ kpukpru orụk idomo.”—Paulo, Brazil.
“Mma n̄keme ndikot mme ifiọkutom mbufo ke 2002 Yearbook. Mmọ ẹma ẹnen̄ede ẹtụk mi, akpan akpan edemerede-owo-udọn̄ ifiọkutom Sista Lydia Kurdas. Mmenen̄ede mma eyenete an̄wan emi.”—Nidia, Costa Rica.
“Mfịn ke n̄kụre ndikot 2002 Yearbook. Nte n̄kokotde enye, mbuọtidem mi ke Jehovah ama etetịm ọsọn̄. Se mmendifreke tutu amama edi mbụk aban̄ade eyịghe oro ẹkenyenede ẹban̄a mbon oro ẹdade usụn̄. Emi ekpep mi ete n̄kûdede nnyene eyịghe mban̄a nditọete oro ẹdade usụn̄. Ẹsọsọn̄ọ eti eti! Udia eke spirit emi edi n̄kpọ nsịnudọn̄ onyụn̄ etịm nnyịn idem ọnọ ini emi ẹdidomode mbuọtidem nnyịn ise.”—Leticia, United States.
“Nnyịn imọkọm mbufo ke edemede-owo-udọn̄ Yearbook emi. Oro ekedi akpa ini emi ediwak mme asuanetop ẹkekotde ẹban̄a utom nditọete nnyịn ke Ukraine. Emi ama ọsọn̄ọ nditọete emi ẹdude mi idem. Ediwak owo, akpan akpan n̄kpri owo, ẹnen̄ede ẹsịn idem ke utom an̄wautom mmọ. Ndusụk owo ẹtọtọn̄ọ ndinam utom nte mme asiakusụn̄ ofụri ini m̀mê eke unọ un̄wam. Mbụk ẹban̄ade nditọete oro ẹkenamde utom Jehovah ke ini ukpan oro ẹma ẹsịn udọn̄ ẹnọ kpukpru owo.”—Kọmiti utom esop, Ukraine.”
Nsọn̄ọnda nditọete nnyịn ke Ukraine enen̄ede edi n̄kpọ nsịnudọn̄ ọnọ ikọt Jehovah ke ofụri ererimbot. Ke akpanikọ, ndikot mme edemede-owo-udọn̄ mbụk oro ẹdude ke Yearbook ke isua kiet kiet kpukpru ini edi eti usụn̄ ndisọn̄ọ mbuọtidem ye ime nnyịn ke akpan ini emi.—Mme Hebrew 12:1.