“Ẹsan̄a Ẹkpere Abasi, Ndien Enye Ayasan̄a Ekpere Mbufo”
Mbemiso ye ke Ama Ekekpep Bible—Nte Bible Okokpụhọde Eren Emi
IKWỌ ekedi uwem Rolf-Michael. Enye ekesida n̄kpọsọn̄ ibọk kpukpru ini. Ke ini ekedide uyen ke Germany, enye ama esin̄wọn̄ ekese mmịn onyụn̄ ada LSD, cocaine, ikọn̄ekpo, ye n̄kpọsọn̄ ibọk eken nte amama.
Ke ini okoyomde ndidịbe mmen n̄kpọsọn̄ ibọk mbe ndụk idụt Africa kiet, ẹma ẹmụm Rolf-Michael enye onyụn̄ abiat ọfiọn̄ 13 ke ufọk-n̄kpọkọbi. Enye ama ada ini n̄kpọkọbi oro ekere aban̄a ata uduak ke uwem.
Rolf-Michael ye Ursula n̄wan esie ẹma ẹyom uduak uwem ye akpanikọ ke mbrenyịn. Kpa ye mme edikpu oro mmọ ẹkekụtde ke mme inua-okot ufọkabasi Christian, mmọ ẹma ẹnyene ọkpọsọn̄ udọn̄ ndifiọk Abasi. Edi mmọ ẹma ẹnyene ekese mbụme ẹnyụn̄ ẹnyene mme ibọrọ oro mînọhọ uyụhọ ẹto nsio nsio otu ido ukpono. N̄ko-n̄ko, mme ido ukpono emi ikọnọhọ mmọ okopodudu ntak ndikpụhọde uwem mmọ.
Ekem Rolf-Michael ye Ursula ẹma ẹsobo ye Mme Ntiense Jehovah. Ke ama ọkọtọn̄ọ ndikpep Bible, item emi ama enen̄ede esịn udọn̄ ọnọ Rolf-Michael: “Ẹsan̄a ẹkpere Abasi, ndien enye ayasan̄a ekpere mbufo.” (James 4:8) Enye ama ebiere ‘ndisio akani owo nduọk, emi ekemde ye ido uwem esie ke eyo oko, nnyụn̄ mmen obufa owo nsịne, emi ẹbotde ebiet Abasi ke edinen ido ye edisana ido akpanikọ.’—Ephesus 4:22-24.
Didie ke Rolf-Michael ekpemen obufa owo esịne? Ẹma ẹwụt enye ke Bible nte ke ẹkeme ndida “nnennen ifiọk” (NW), nnam edu owo “edi obufa, enyene mbiet Andibot enye,” oro edi Jehovah Abasi.—Colossae 3:9-11.
Nte enye ekenyenede nnennen ifiọk, Rolf-Michael ama odomo ndinam uwem esie ekekem ye mme edumbet Ikọ Abasi. (John 17:3) Ikememke utom nditre n̄kpọsọn̄ ibọk, edi Rolf-Michael ama ọfiọk ufọn edika mbịne Jehovah ke akam nnyụn̄ mbọ un̄wam esie. (1 John 5:14, 15) Enye ama ọbọ un̄wam efen efen oto mbon oro ẹma ẹkededi Mme Ntiense Jehovah, emi ẹsịnde ifịk ndinam uduak Abasi.
Ndifiọk nte ke ererimbot ke ebebe efep ye nte ke mbon oro ẹnamde uduak Abasi ẹdidu ke nsinsi ama an̄wam Rolf-Michael n̄ko. Emi ikayakke enye emek ndima ererimbot emi edide ke ibio ini edi emek nsinsi edidiọn̄ emi edide n̄kpet n̄kpet itie ebuana ye ima ima Abasi, kpa Jehovah. (1 John 2:15-17) Ikọ Mme N̄ke 27:11 ama enen̄ede otụk Rolf-Michael: “Eyen mi, nyene ibuot, nyụn̄ dat mi esịt, man n̄kụt se ndibọrọde owo eke osụn̄ide mi.” Enye ama ada esịtekọm etịn̄ ete: “Ufan̄ikọ emi owụt nte ima Jehovah okponde, sia enye ọnọde mme owo ifet ndidat enye esịt.”
Ukem nte Rolf-Michael, n̄wan esie, ye nditọ mmọ ita, ediwak tọsịn owo ke mme itie ikie ẹmebọ ufọn ebe ke ndida mme edumbet Bible nsịn ke edinam. Ẹkeme ndikụt mme utọ owo oro ke esop Mme Ntiense Jehovah ke ofụri ererimbot. Ke mfụhọ, ẹdori Mme Ntiense ikọ ke ndusụk idụt ẹte ke mmọ ẹdi idiọk n̄ka emi ẹsibaharede ubon. N̄kpọntịbe Rolf-Michael owụt ke idịghe ntre.—Mme Hebrew 4:12.
Rolf-Michael ọdọhọ ke Matthew 6:33, emi etemede nnyịn ete inịm mme n̄kpọ eke spirit ke ebeiso ada ubon imọ usụn̄, etemede mmimọ nnennen usụn̄ uwem. Enye ye ubon esie ẹnen̄ede ẹwụt esịtekọm ẹnọ Jehovah kaban̄a inem inem uwem ubon oro mmọ ẹdude nte mme Christian. Mmọ ẹnyene ukem ekikere andiwet psalm emi ọkọkwọde ete: “Ndinam didie nnọ Jehovah usiene kpukpru mfọnido emi enye ọfọnde ye ami?”—Psalm 116:12.
[Se Ẹwetde ke Ikpọ Abisi ke page 9]
Abasi ọnọ mme owo ifet ndidat enye esịt
[Ekebe ke page 9]
Mme Edumbet Bible ke Ẹnam Utom
Ndusụk edumbet Bible emi ẹn̄wamde ediwak owo nditre ata ndiọi mbumehe ẹtiene emi:
“Mbufo emi ẹmade Jehovah, ẹsua idiọk ido.” (Psalm 97:10) Ke owo ama okokụt nte mme akama-n̄kpa edinam ẹdiọkde enye onyụn̄ enen̄erede asua mme edinam oro, esimem utom enye ndinam se inemde Abasi esịt.
“Owo eke asan̄ade ye mme enyene-ibuot eyenyene ibuot: edi nsan̄a mbon ndisịme ọyọdiọn̄ ọdiọk.” (Mme N̄ke 13:20) Man owo ekeme ndisịn n̄kpọsọn̄ ibọk ye mme n̄kpọ eken oro ẹnọde mbumehe, enye enyene nditetịn̄ enyịn mmek mme ufan esie. Ndinam ufan ye mme Christian emi ẹdin̄wamde enye nditre mbumehe emi enen̄ede ọfọn.
“Ẹkûtịmede esịt ke baba n̄kpọ kiet, edi ke kpukpru n̄kpọ, ẹsan̄a ye akam ye n̄kpe-ubọk ye ekọm, ẹsian Abasi se mbufo ẹyomde. Ndien emem Abasi, emi ayan̄ade ifiọk owo, eyekpeme mbufo esịt ye ekikere ke Christ Jesus.” (Philippi 4:6, 7) Owo ikemeke ndimen utọ emem esịt ye eke ekikere oro ndomo ye n̄kpọ efen ekededi. Ndien ndida akam mberi edem ke Abasi an̄wam owo ndiyọ mme mfịna uwem ye unana ediwọn̄ọde mbịne n̄kpọsọn̄ ibọk oro ẹnọde mbumehe.