“Owo Iba Ẹma Ẹkọn̄ Usụn̄ufọk Nnyịn”
“ISUA iba ẹdi emi nte nnyịn ikokop akwa mfụhọ ke ntak editaba ekpri eyenan̄wan nnyịn.” Ntre ke ẹketọn̄ọ leta oro ẹkewetde ke n̄wedmbụk n̄kpọntịbe Le Progrès, oro ẹkemịn̄de ke Saint-Étienne, France.
“Mélissa ekedi ọfiọn̄ ita ke emana onyụn̄ ọdọn̄ọ enyene-ndịk udọn̄ọ ẹkotde trisomy 18. Owo ikemeke ndisọsọp mfre utọ n̄kpọ mmọn̄eyet emi. Okposụkedi ẹkebọkde nnyịn nte mbon ido ukpono Catholic, nnyịn ima isinen̄ede ikere ite, ‘Abasi, edieke afo odude, ntak emi afo ayakde mme utọ n̄kpọ emi ẹtịbe?’” Nte an̄wan̄ade, eka oro ekewetde leta emi ama okop mfụhọ onyụn̄ anana un̄wam. Leta esie aka iso ete:
“Esisịt ini ke mme n̄kpọ oro ẹma ẹketịbe, owo iba ẹma ẹkọn̄ usụn̄ufọk nnyịn. Mma nsọsọp ndiọn̄ọ ke mmọ ẹdi Mme Ntiense Jehovah. Mma mben̄e idem ndisio mmọ unyọn̄ ukpono ukpono, edi ekem mma n̄kụt ediye uduot ekpri n̄wed oro mmọ ẹkenọde. Enye akaban̄a ntak emi Abasi ayakde ndutụhọ odu. Ntre mma mbiere ndiyak mmọ ẹdụk ẹdi man n̄kụt ndudue nnọ mmọ. Ke ini ẹtịn̄de ẹban̄a ndutụhọ, mma nsikere ke ubon nnyịn okụt ndutụhọ ebe nde ye nte ke nnyịn imakpa mba ndikop ikọ oro, ‘Abasi ọkọnọ nnyịn, Abasi onyụn̄ ọbọ.’ Mme Ntiense oro ẹma ẹtie ye ami ẹbe hour kiet. Mmọ ẹma ẹkpan̄ utọn̄ ẹnọ mi ẹnyụn̄ ẹnen̄ede ẹnyene esịtmbọm, ndien ke ini mmọ ẹkeyomde ndinyọn̄, ama enen̄ede enem mi ke idem tutu ndọhọ ama ekem mmọ ẹfiak ẹdi. Oro eketịbe isua iba emi ẹkebede. Ami ndịghe kiet ke otu Mme Ntiense Jehovah, edi mma ntọn̄ọ ndikpep Bible ye mmọ, ndien mmesidụk mme mbono esop mmọ ediwak ini nte n̄kekeme.”