Ndọn̄esịt Ẹnọde Mbon Oro Ẹsemede Ẹyom Un̄wam

BIBLE idịghe n̄wed udọn̄ọ ibuot. Nte ededi, enye ọnọ nnyịn ndọn̄esịt onyụn̄ an̄wam nnyịn ndidara uwem kpa ye mme mfịna oro isobode. N̄wed Abasi etịn̄ nte enende ete: “Owo eke n̄wan amande omụhọ usen, onyụn̄ oyụhọ ukụt.” (Job 14:1) Unana mfọnmma nnyịn edi ntak ndusụk mfịna nnyịn. Edi anie enen̄ede edi ntak ndutụhọ owo?

Bible anam ẹdiọn̄ọ nte ke idiọk spirit oro ẹkotde Devil ye Satan edi ntak. Enye edi “andibian̄a ofụri ererimbot” onyụn̄ edi ntak ediwak afanikọn̄ oro ẹnọmọde ubonowo. Edi, Bible asian nnyịn n̄ko ete ke ini esie ọmọn̄ esịm utịt. (Ediyarade 12:9, 12) Ibịghike, Abasi eyesịbe odụk onyụn̄ etre kpukpru afanikọn̄ oro Satan adade etiene mme andidụn̄ isọn̄. Nte Bible ọdọhọde, edinen obufa ererimbot oro Abasi ọn̄wọn̄ọde eyetre unana idotenyịn ye nnanenyịn.—2 Peter 3:13.

Nso ndọn̄esịt ke edi ntem ndifiọk nte ke ndutụhọ owo edi ke ibio ini! Ke idak ukara Obio Ubọn̄ Abasi eke heaven ke ubọk Jesus Christ, ẹyetre ukwan̄ikpe ye ndutụhọ. N̄wed Abasi etịn̄ aban̄a Edidem oro Abasi emekde ete: “Koro enye ayanyan̄a ubuene ke ini enye esemede; ye owo ukụt, ye owo eke mînyeneke andinyan̄a. Enye ayatua eyen unana ye ubuene mbọm, onyụn̄ anyan̄a ukpọn̄ mme ubuene. Enye ayafak ukpọn̄ mi osio ke ukụt ye nnama: onyụn̄ ese iyịp mmọ ke n̄kpọ-uto.”—Psalm 72:12-14.

Ini oro ntịn̄nnịm ikọ emi edisude enen̄ede ekpere. Nnyịn imekeme ndidu uwem ke nsinsi ke paradise isọn̄ oro mme idaha ẹdifọnde. (Luke 23:43; John 17:3) Ifiọk oro ẹnyenede ẹban̄a mme ọnọ-ndọn̄esịt un̄wọn̄ọ N̄wed Abasi emi ọnọ mbon oro ẹsemede ẹyom un̄wam idotenyịn ye ndọn̄esịt.

[Ebiet Ẹdade Ndise Ẹto ke page 32]

Eyenan̄wan emi ofụhọde: Foto ILO/J. Maillard