Ẹma Ẹnọ Ime Esie Utịp

Ediwak mbon eti esịt ẹsiyom mbonima mmọ ẹkpep ẹban̄a uduak Abasi ẹnyụn̄ ẹdu uwem inemesịt. Ke ini owo ayakde idem ọnọ Abasi, ekeme ndidi mbon en̄wen, n̄kpri ye ikpọ, ke ntak nti edu mmọ, ẹsitịp ẹsịn ke enye ndinam eti ubiere emi. Ntre ke ekedi ye Jearim, n̄kaiferi kiet ke Mexico, emi ekewetde leta oro etienede mi ọnọ ke usen akpan mbono eke Mme Ntiense Jehovah:

“Nyom mbufo ẹtiene mi ẹdat esịt. Ẹyak ntịn̄ ntak nnọ mbufo. Isua 18 emi ẹkebede, ke ini mmen̄kamanake kan̄a, ete ye eka mi ẹma ẹkpep akpanikọ. Eka mi ama anam n̄kọri, ndien ke ukperedem ami ye eyeneka mi eren ima inam n̄kọri n̄ko. Nnyịn ima idiana kiet ibọn̄ akam inọ Jehovah ite, ete nnyịn n̄ko akpakam etiene asan̄a ke usụn̄ oro adade esịm uwem mi. Isua 18 ẹmebe, ndien mfịn edi ata akpan usen ọnọ nnyịn. Ete mi ọmọn̄ ana baptism. Mmọkọm Jehovah sia enye mîkadaha utịt idi mbemiso n̄kpọ emi nnyịn iketiede ibet ke anyan ini mi etịbede. Jehovah sọsọn̄ọ-o!”

Ke ediwak isua emi ẹkebede, ubon ekpri n̄kaiferi emi ama enen̄ede ekere aban̄a edumbet oro odude ke item odudu spirit eke 1 Peter 3:1, 2, emi ọdọhọde ete: “Mbufo iban, ẹsụk idem ẹnọ ebe eke mbufo, man edieke ndusụk mmọ mînịmke ikọ Abasi ke akpanikọ, ẹkpedụri mmọ ẹda, itoho ke ukwọrọikọ, edi oto ke edu iban mmọ; ke adan̄aemi mmọ ẹkụtde nte mbufo iban ẹnyenede edisana ido ye ndịk.” Ndien ekpri Jearim ama enen̄ede ada mme ikọ Deuteronomy 5:16 emi esịn ke edinam: “Kpono usọ ye uka, kpa nte Abasi fo okowụkde fi.” Ke akpanikọ, ndida mme utọ edumbet oro nsịn ke edinam nnyụn̄ mbet Jehovah ke ime ama ada mme edidiọn̄ ọsọk Jearim ye ubon esie.