Ntọt Mme Anditan̄a Obio Ubọn̄
N̄kpọmbana Ẹnọde Ufọkmbono Obio Ubọn̄
ITIEUTOM Esede Aban̄a N̄kann̄kụk ke Finland ama osio isua 2000 enịm nte “Isua Udiọn̄ N̄kann̄kụk.” Kiet ke otu mme anam ndutịm emi ama ọdọhọ ke “ntak ẹkotde isua oro isua udiọn̄ n̄kann̄kụk edi man ẹti kpukpru owo nte n̄kann̄kụk oro awawa mbiet ẹwakde otụkde uwem ofụri usen ye nsọn̄idem nnyịn.”
Ke January 12, 2001, ọfis n̄kọk itieutom Mme Ntiense Jehovah ke Finland ama ọbọ leta oto N̄ka Mme Ọdiọn̄ N̄kann̄kụk ke Finland. Leta oro ama anam an̄wan̄a nte ke ẹnọ Ufọkmbono Obio Ubọn̄ Mme Ntiense Jehovah ke Tikkurila kiet ke otu n̄kpọmbana ibuotikọ isua oro aban̄ade ndidiọn̄ n̄kann̄kụk, ke ntak ẹdiọn̄de n̄kann̄kụk ye in̄wan̄esa esie ke n̄wọrọnda usụn̄. Leta oro ama adian do ete ke “ofụri n̄kann̄kụk esie eyeye, enem owo ndise, onyụn̄ edi se ẹtịmde ẹma, edide ke ndaeyo m̀mê ke ukwọ edịm.”
Ẹkenọ Mme Ntiense Jehovah n̄kpọmbana emi ke Ufọkisen Rosendahl ke Tampere, Finland, ke edinam oro ntaifiọk ye mme anam mbubehe 400 ẹkedụkde. N̄ka Mme Ọdiọn̄ N̄kann̄kụk ke Finland ama ọnọ unyịme n̄ko ete ẹsịn enye ke n̄wedmbụk n̄kpọntịbe ye ndutịm usuanetop eken, ndien se ẹkewetde edi emi: “Ke nsio nsio ikpehe ke idụt emi, mme Ufọkmbono Obio Ubọn̄ Mme Ntiense Jehovah inyeneke mbiet, ẹtịm mmọ ediye ediye. Nte ẹtịmde ẹkama n̄kann̄kụk mmọ edemede kpukpru owo oro ẹsan̄ade ẹbe udọn̄. Ufọkmbono Obio Ubọn̄ oro odude ke Tikkurila ke ofụri ofụri edi uwụtn̄kpọ kiet aban̄ade ediye in̄wan̄esa. Ufọk oro ye akamba okụre esie ẹdiana kiet ẹwụt uyai ye usọ.”
Ufọkmbono Obio Ubọn̄ 233 ẹdu ke Finland, ediwak ẹnyene ndiye in̄wan̄esa. Nte ededi, se inamde mme itie emi ẹtịm ẹye edi koro mmọ ẹdide mme iwụk ebiet utuakibuot akpanikọ ye itie ukpep Bible. Mme Ntiense Jehovah oro ẹwakde ẹbe miliọn itiokiet ke ofụri ererimbot ẹnen̄ede ẹma Ufọkmbono Obio Ubọn̄ mmọ—edide enye oro ẹtịmde ẹbana m̀mê enye oro edide ukeuke. Oro edi ntak mmọ ẹnen̄erede ẹma nditịm enye n̄kama. Kpukpru owo ke n̄kann̄kụk mbufo ẹkeme ndidụk mme Ufọkmbono Obio Ubọn̄ emi!