“Ndi Ẹmefiọk Ntak Ndade Okụk Mbufo Nsọk Mbufo?”
‘OH, MMENEN̄EDE nyom okụk!’ ntre ke Nana, eka emi ọbọkde nditọ ikpọn̄, oro enyenede nditọiren ita onyụn̄ odụn̄de ke Kaspi ke Republic of Georgia, ekekere. Usenubọk kiet idotenyịn esie ndinyene okụk ama osu. Enye ama ọfiọhọ lari 300 ekpere itieutom mme bodisi. Owo ndomokiet ikodụhe ikpere. Emi ekenen̄ede edi ata ediwak okụk. Ke akpanikọ, Nana ikekwe lari 100 edide ikọn̄ kiet ke isua ition tọn̄ọ nte lari akakabade edi okụk idụt oro. Mbonurua n̄kann̄kụk idinyeneke utọ okụk oro idem ke ẹnamde mbubehe ke ediwak isua.
Nana ama ekere ete: ‘Nso ke nyom ndida okụk emi nnam edieke nduọkde mbuọtidem, uten̄e Abasi, ye idaha eke spirit mi?’ Enye ama ọkọri mme utọ edu Christian oro, idem ọyọde ọkpọsọn̄ ukọbọ ye umia ke ntak edinịm ke akpanikọ esie.
Ke ini akakade itieutom mme bodisi, Nana ama okụt bodisi ition ẹyomde n̄kpọ ke mbrenyịn. Enye ama edifiọk ke mmọ ẹkeyom okụk oro, ntre enye ama asan̄a ekpere mmọ okobụp ete: “Ndi enyene se isopde?”
Mmọ ẹma ẹbọrọ ẹte: “Okụk.”
“Okụk ifan̄?”
“Lari 300!”
Nana ama ọdọhọ ete: “Mma mfiọhọ okụk mbufo.” Ekem enye ama obụp ete: “Ndi ẹmefiọk ntak ndade okụk mbufo nsọk mbufo?” Mmọ ikọfiọkke.
Enye ama aka iso ete: “Koro ami ndi kiet ke otu Mme Ntiense Jehovah. Edieke mmen̄kpedịghe, n̄kpadaha okụk mbufo nsọk mbufo.”
Akwa owo bodisi oro ọkọduọkde okụk oro ama ọnọ Nana lari 20 ke ndiwụt esịtekọm mban̄a edinam akpanikọ esie.
Mbụk oro ama asuana usọp usọp ke ofụri n̄kann̄kụk Kaspi. Ke ndan̄nsiere, n̄wan kiet emi anamde utom nte andinịm ebiet asana emi okotode itieutom mme bodisi ọwọrọ edi ama ọdọhọ Nana ete: “[Akwa owo] esinịm n̄wed mbufo ke ọfis esie kpukpru ini. Idahaemi eyedi enye eyenen̄ede ada mmọ ke ọsọn̄urua n̄kpọ.” Bodisi kiet ama akam ọdọhọ ete: “Edieke kpukpru owo ẹkpedide Mme Ntiense Jehovah, anie akpabiat ibet?”