Ini Oro Ẹkpeyararede Ikọ Idịbi

Ndidịp ndusụk n̄kpọ ekeme ndida emem ndi utu ke utọk. Edi, ndi odu ini oro ẹkpeyararede ikọ idịbi? Tịm fiọk se prọfet Amos etịn̄de aban̄a Abasi esie: ‘Jehovah idinamke baba n̄kpọ kiet, ke mîbọhọke ini enye ayarade uduak esie ọnọ ikọt esie mme prọfet.’ (Amos 3:7) Nnyịn imekeme ndikpep n̄kpọ mban̄a ikọ idịbi ke mme ikọ emi. Jehovah ekeme ndidịp ndusụk n̄kpọ ke ndusụk ini ndien nte ini akade ayarade mmọ ọnọ ndusụk owo. Didie ke nnyịn ikeme ndikpebe Jehovah ke afan̄ emi?

Ke ndusụk idaha, mme ekpemerọn̄ oro ẹmekde ke esop Christian ẹsikụt ke enyene ufọn nditre ndiyarade ndusụk n̄kpọ. (Utom 20:28) Ke uwụtn̄kpọ, ke ẹnyenede ufọn esop ke ekikere, mmọ ẹkeme ndibiere ndidịp ọyọhọ ntọt aban̄ade ndusụk ndutịm m̀mê mme ukpụhọde oro ẹnamde ke mme ifetutom ke esop tutu esịm akpan ini.

Nte ededi, ke utọ idaha oro, edi akpan n̄kpọ ndinam an̄wan̄a mbon oro ẹbuanade m̀mê oyoyom ẹyarade n̄kpọ oro, ye ini, ye usụn̄ nte ẹdiyararede enye. Ndifiọk ini oro ẹdiyararede n̄kpọ ekeme ndin̄wam mmọ ndimụm ikọ idịbi n̄kama.—Mme N̄ke 25:9.