Ini Oro Owụtde Eti Ibuot Ndifehe

ERERIMBOT mfịn ọyọhọ ye abian̄a abian̄a uko ye en̄wan m̀mê mme idaha oro ẹtiede idomo idomo. Ẹsiwak ndise owo oro efehede ọkpọn̄ afanikọn̄ nte owo oro mînyeneke odudu m̀mê owo esịt ndịk. Enye ekeme ndikam n̄kabade ndi n̄kpọ nsahi.

Nte ededi, Bible anam an̄wan̄a ete ke mme ini ẹdu oro edifehe owụtde eti ibuot ye uko. Ke ndisọn̄ọ akpanikọ Bible emi, mbemiso osiode mme mbet esie ọdọn̄ utom ukwọrọikọ, Jesus Christ ọkọdọhọ mmọ ete: “Ke ini mmọ ẹkọbọde mbufo ke obio emi, ẹfehe ẹdụk ke obio efen.” (Matthew 10:23) Ih, mme mbet Jesus ẹkenyene ndidomo ndifehe mbọhọ mme andikọbọ mmọ. Mmọ ikenyeneke ndisịn idem ke utọ n̄kpọ nte ekọn̄ ido ukpono, ẹdomode ndinyịk mbon en̄wen ẹkabade esịt. Mmọ ẹkekama etop emem. (Matthew 10:11-14; Utom 10:34-37) Ntre utu ke ndinam n̄kpọ ke iyatesịt, mme Christian ẹkenyene ndifehe, ẹfen̄ede ẹkpọn̄ mme n̄kpọ oro ẹdide ntak iyatesịt. Ke usụn̄ emi, mmọ ẹma ẹmụm eti ubieresịt ọkọrọ ye ọsọn̄urua itie ebuana mmọ ye Jehovah ẹkama.—2 Corinth 4:1, 2.

Ẹkụt isio isio uwụtn̄kpọ ke n̄wed Mme N̄ke eke Bible. Enye etịn̄ aban̄a akparawa kiet emi eketienede n̄wan akpara kiet aka “nte enan̄ akade ndikpa,” utu ke ndifehe ke ini osobode idomo. Nso ikedi utịp? Ke ntak akayakde idem ọnọ idomo oro akabuanade uwem esie, nsobo ama esịm enye.—Mme N̄ke 7:5-8, 21-23.

Nso edieke afo okposobode idomo edibuana ke oburobụt ido idan̄ m̀mê osobode ndusụk idaha eken oro ẹkemede ndikama n̄kpọndịk? Nte ekemde ye Ikọ Abasi, nnennen n̄kpọ ndinam edidi ndifehe, ndifehe n̄kpọn̄ ebiet oro usọp usọp.—Mme N̄ke 4:14, 15; 1 Corinth 6:18; 2 Timothy 2:22.