“Iyosobo ke Obio Ubọn̄ Abasi”

“Edima Ufan! Rupert, ẹma ẹbiere ikpe n̄kpa ẹnọ mi mfịn. Kûfụhọ uban̄a mi. Mmọnọ fi ye kpukpru owo ke ufọk ima mi. Iyosobo ke Obio Ubọn̄ Abasi.”

FRANC DROZG ekewet mme ikọ emi ke June 8, 1942, esisịt ini mbemiso mbonekọn̄ Nazi ẹketopde enye ẹwot. Ntak ẹkewotde enye?

Nte ekemde ye n̄wetnnịm n̄kpọ oro odude ke Itie Ubon N̄kpọeset eke Idụt Kaban̄a Uwọrọ Ufụn ke Maribor, Slovenia, odomutịm oro ekedide isua 38 ke emana mi ama esịn ndidụk Wehrmannschaft, kpa n̄ka en̄wan mbon Germany ke Slovenia oro mbon Germany ẹkedụn̄de. Enye ekedi Bibelforscher, m̀mê Eyen Ukpepn̄kpọ Bible, nte ẹkediọn̄ọde Mme Ntiense Jehovah ini oro ke n̄kann̄kụk oro. Sia akanamde n̄kpọ ke n̄kemuyo ye Isaiah 2:4, enye ikenyịmeke ndinọ ekọn̄ Nazi ibetedem, ọdọhọde ete ke imọ idi andidu ke idak ukara Obio Ubọn̄ Abasi.—Matthew 6:33.

Ke Ptuj obio emana esie, ẹkediọn̄ọ Franc nte ifịk ifịk anditan̄a gospel Obio Ubọn̄ Abasi. (Matthew 24:14) Kpa ye ediwak n̄kpọsọn̄ idaha, enye ama ọkwọrọ eti mbụk ye unana edikpa mba tutu esịm ini emi ẹkemụmde enye ke May 1942.

Mbon Nazi ẹma ẹnen̄ede ẹkọbọ ediwak ke otu Mme Ntiense Jehovah ke Slovenia. Franc ekedi kiet ke otu akpa mbon oro ẹkewotde ke ntak mme edinịm ke akpanikọ ido ukpono esie. Ukem nte mme Christian akpa isua ikie, mme ikọ emi ẹma ẹsọn̄ọ enye idem: “Nnyịn inyene ndibe ke ediwak ukụt ndụk ke Obio Ubọn̄ Abasi.” (Utom 14:22) Mme akpatre ikọ esie oro, “Iyosobo ke Obio Ubọn̄ Abasi,” ẹkedi uyarade nte ke enye ama enịm ke akpanikọ ete ke ukara eke heaven edi ata ata ukara.

[Mme ebiet ẹdade ndise ẹto ke page 32]

Franc Drozg: Photo Archive-Museum of National Liberation Maribor, Slovenia; leta: Original kept in Museum of National Liberation Maribor, Slovenia