Mme Mbụme Ẹtode Mme Andikot
Job okokụt ndutụhọ ebịghi adan̄a didie?
Ndusụk owo ẹkere ke idomo Job ama ada ediwak isua, edi n̄wed Job itịn̄ke iban̄a utọ ndutụhọ anyan ini oro.
Etie nte akpa ikpehe idomo Job, editaba nditọ ye inyene esie, eketịbe ke ata ibio ibio ini. Nnyịn ikot ite: “Edikem ke usen kiet, nditọ-iren [Job] ye nditọ-iban esie ẹdia n̄kpọ ẹnyụn̄ ẹn̄wọn̄ wine ke ufọk akpan mmọ.” (Sịghisịghi ubọkn̄wed edi eke nnyịn.) Job ama ọbọ etop ke adiana ke adiana nte ke enye amataba ekese—mme enan̄, mme ass, mme erọn̄, mme camel, ye mme asan̄autom esie oro ẹkekpemede mme ufene oro. Nte an̄wan̄ade, kpa ke ndondo oro Job ama okop aban̄a n̄kpa nditọ esie, oro ‘ẹkediade n̄kpọ ẹnyụn̄ ẹn̄wọn̄de wine ke ufọk akpan mmọ.’ Etie nte kpukpru emi ẹketịbe usen kiet.—Job 1:13-19.
Anaedi udiana ikpehe idomo Job ama ada ini akan akpa ikpehe idomo esie. Satan ama aka ebịne Jehovah ọkọdọhọ ke Job ọyọduọ edieke ndutụhọ oro otụkde enye ọkpọkpọ—otụkde ikpọkidem esie. Ekem ama ada “idiọk oyo etịm Job, ọtọn̄ọde ke ikpat-ukot esie, tutu esịm ke etịn̄-ibuot esie.” Ekeme ndidi ama ada ini udọn̄ọ emi nditara nyọhọ enye ofụri idem. Ndien eyedi ama ada ini mbụk aban̄ade “kpukpru idiọk n̄kpọ” emi ndisịm mbon oro ẹkedọhọde nte idide mbon ndọn̄esịt, oro ẹkedide ẹdise enye.—Job 2:3-11.
Eliphaz okoto Teman ke isọn̄ Edom, ndien Zophar okoto ikpehe kiet ke edere edere n̄kan̄ edem usoputịn Arabia, ntre obio emana mmọ ikoyomke usụn̄ ikpọn̄ eke Job ke Uz, emi ekemede ndidi okodu ke edere edere Arabia. Nte ededi, Bildad okoto ubon Shuah, ntre an̄wan̄a nte ke iman esie ẹkedụn̄ ke mben Euphrates. Edieke Bildad okodude ke obio emana esie ini oro, ekeme ndidi ama ada ediwak urua m̀mê ọfiọn̄ mbemiso enye okokopde aban̄a idaha Job onyụn̄ anamde isan̄ aka Uz. Nte ededi, ekeme ndidi owo ita oro ẹkedu ke mbọhọ Job ke ini ndutụhọ esie ọkọtọn̄ọde. Ke idaha ekededi, ke ini mme ufan Job ita ẹkedide ẹdisịm, mmọ ẹma “ẹsụhọde ẹtie ye enye ke isọn̄, ke usen itiaba ye ke okoneyo itiaba” ye unana editịn̄ ikọ.—Job 2:12, 13.
Ekem akpatre ikpehe idomo Job ama edisịm, oro ediwak ibuot ke n̄wed emi ẹbụkde ẹban̄a. Mbon oro ẹkedọhọde nte idide mbon ndọn̄esịt do ẹma ẹneni ekese eneni ẹnyụn̄ ẹtịn̄ ekese ikọ, ndien Job ama esibọrọ. Ke oro ama ekebe, akparawa oro Elihu ama ọnọ nsuannọ, ndien Jehovah ama etie ke heaven ọnọ Job edinen̄ede.—Job 32:1-6; 38:1; 40:1-6; 42:1.
Ntem, ekeme ndidi ndutụhọ Job ye ubiere esie ẹketịbe ke ufan̄ ọfiọn̄ ifan̄, eyedi ama osụhọde akan isua kiet. Ekeme ndidi afo ọmọfiọk oto ifiọk n̄kpọntịbe nte ke esitie nte n̄kpọsọn̄ idomo ẹbịghi ke nsinsi. Kpa ye oro, inaha nnyịn ifre ite ke mmọ ẹsinyene utịt, kpa nte eke Job ekenyenede. Inamke n̄kpọ m̀mê idomo oro nnyịn isobode ẹbịghi adan̄a didie, ẹyak nnyịn iti un̄wam Abasi, nte ẹwụtde ke mme ikọ eke odudu spirit emi: “Koro mfefere ukụt nnyịn, emi mîdibịghike bịghi, ọdọdiọn̄ anam nnyịn inyene nsinsi ubọn̄, eke okponde odobi.” (2 Corinth 4:17) Apostle Peter ekewet ete: “Abasi kpukpru mfọn, emi okokotde mbufo ete ẹdidụk ke nsinsi ubọn̄ Imọ ke Christ, ke ini mbufo ẹma ẹkụt ukụt ke ekpri ini, ayanam mbufo ẹfọn ẹma, ẹnyụn̄ ẹsọn̄ọ ẹda, ẹnyụn̄ ẹkop idem.”—1 Peter 5:10.